Julani

Lutani pa menyu yachiŵi

Akaboni aku Yehova

Chitonga (Malawi)

Kumbi Mungayanja Kuziŵa Uneneska?

Kumbi Mungayanja Kuziŵa Uneneska?

UNENESKA wa vinthu wuli? Uneneska wa mafumbu nganyaki ngakukhumbika ukongwa ngo ŵanthu ŵakwamba kali kufumba. Panyaki imwi namwi mukufumbapu mafumbu nge ndi yanga:

  • Kumbi Chiuta watitiphwere nadi?

  • Kumbi nkhondu ndi masuzgu vyazamumala?

  • Kumbi nchinthu wuli cho chichitika asani munthu wafwa?

  • Kumbi abali ŵidu wo akufwa tazakuŵawona so?

  • Kumbi ndingachita wuli kuti Chiuta wavwengi marombu ngangu?

  • Kumbi ndingachita wuli kuti ndiŵi ndi umoyu wa likondwa?

Kumbi kwamuka kwa mafumbu yanga mungakusaniya pani? Pe mabuku nganandi ngo ngayesa kumuka mafumbu yanga, kweni nyengu zinandi mabuku yanga ngamuka mwakuyanana cha. Nganyaki ngagwira nchitu kanyengu kamanavi waka pavuli paki atingalembaso, pamwenga kulemba nganyaki ngo ngasele mu malu mwaki.

Kweni pe buku limoza pe lakugomezgeka lo limuka mwakukhorweska mafumbu yanga. Buku ili likamba uneneska. Ndichu chifukwa chaki Yesu wachiromba kwaku Chiuta wanguti: “Mazu ghinu mbuneneska.” (Yohane 17:17) Mazuŵa nganu tiziŵa kuti Mazu ngo Yesu wakambanga ndi Bayibolo. Pakuŵelenga kapepala yaka, muwonengi mo Bayibolo limukiya umampha mafumbu ngo nge pachanya yapa.

 Kumbi Chiuta Watitiphwere Nadi?

CHIFUKWA CHO ŴANTHU AFUMBIYA FUMBU ILI: Tija mu charu chenicho ŵanthu anandi wendi nkhaza ndipuso mbambura urunji. Kweniso visopa vinandi visambiza kuti ndi khumbu laku Chiuta kuti taŵanthu tisuzgikengi.

VYO BAYIBOLO LISAMBIZA: Chiuta ndiyu wachitiska vinthu viheni cha. Lemba la Jobu 34:10 lititi: “Chiŵe kutali ndi Chiuta kuti iyo wachiti ubendezi, ndipo chiŵe kutali ndi Wanthazizose kuti wabudi.” Chifukwa cha chanju chaki, Chiuta wakhumba kusintha charu kuti ŵanthu ŵazije pa chimangu. Ndichu chifukwa chaki Yesu wangutisambiza kuromba kuti: “Auskefwe mwaŵakuchanya, . . . Ufumu winu uze. Khumbu linu lichitike, panu pasi nge ndiko kuchanya.” (Mateyu 6:9, 10) Chiuta watitiphwere ukongwa, ndipu ngwakukhumbisiska kuti wafiski khumbu laki pa ŵanthu.—Yohane 3:16.

Wonani so Chiyambo 1:26-28; Yakobe 1:13; ndi 1 Petro 5:6, 7.

Kumbi Nkhondu ndi Masuzgu Vyazamumala?

CHIFUKWA CHO ŴANTHU AFUMBIYA FUMBU ILI: Ŵanthu anandi atufwa pa nkhondu. Ndipu taŵanthu tosi tikwaskika ndi masuzgu nga mu charu.

VYO BAYIBOLO LISAMBIZA: Chiuta wakamba za nyengu yo wazamuchitiska kuti pa charu chosi chapasi paziŵi chimangu. Mu Ufumu waki, ŵanthu ‘ŵazamusambira so nkhondu cha.’ Kweni, “ŵazamsula malipanga ghawo kuŵa vyakulimiya.” (Yesaya 2:4) Ndipu Chiuta wazamutuzgapu masuzgu ndi uheni wosi. Bayibolo lilayizga kuti: “[Chiuta] waleskengeko sozi lose ku maso ghawo, ndi nyifwa kuti yikaŵangapo so cha; chingana nchitenje, chingana ndi nkhuta, chingana mburwirwi, kuti vikaŵangapo so cha: chifukwa vyakudankha vyo [kusazyapu uheni ndi masuzgu] vyarutapo.”—Chivumbuzi 21:3,4.

Wonani so Sumu 37:10, 11; 46:9; ndi Mika 4:1-4.

Kumbi Nchinthu Wuli Cho Chichitika Asani Munthu Wafwa?

CHIFUKWA CHO ŴANTHU AFUMBIYA FUMBU ILI: Visopa vinandi visambiza kuti asani munthu wafwa, mzimu waki ulutiliya kuŵa ndi umoyu. Anyaki agomezga kuti ŵakufwa akhoza kupweteka ŵanthu amoyu, pamwenga kuti Chiuta walanga ŵanthu aheni ndi motu wamuyaya.

VYO BAYIBOLO LISAMBIZA: Asani munthu wafwa, umoyu waki umaliya penipo. Lemba la Wakutaula 9:5 lititi: “Ŵakufwa . . . ŵaziŵa kanthu cha.” Chifukwa chakuti iwu ŵaziŵa kanthu cha, ŵatuvwa kanthu cha, pamwenga kuchita chechosi cha, vingachitika cha kuti iwu apweteki pamwenga kovya ŵanthu amoyu.—Sumu 146:3, 4.

Wonani so Chiyambo 3:19 ndi Wakutaula 9:6, 10.

 Kumbi Abali Ŵidu wo Akufwa Tazakuŵawona So?

CHIFUKWA CHO ŴANTHU AFUMBIYA FUMBU ILI: Tosi tikhumba kuja ndi umoyu walikondwa pamoza ndi abali ŵidu. Ndichu chifukwa chaki tikhumbisiska kuziŵawona so abali ŵidu wosi wo akufwa.

VYO BAYIBOLO LISAMBIZA: Ŵanthu anandi wo akufwa azamuyukiskika. Yesu wakulayizga kuti, ‘ŵose ŵamu miunda . . . ŵazamutuwamu.’ (Yohane 5: 28, 29) Mwakukolerana ndi khumbu lakudankha laku Chiuta, ŵanthu wo azamuyuka, azamukuŵa ndi mwaŵi wa kuja pa charu chapasi cha paradayisu. (Yesaya 65:21-22) Layizgu laku Yesu lisazgiyapu umoyu wambula matenda ndipuso wamuyaya ku ŵanthu ŵakuvwiya. Lekani Bayibolo likamba kuti: “Ŵakurunjika ŵaharenge charu, ndipo ŵakajanga paku cho muyaya.”—Sumu 37:29.

Wonani so Jobu 14:14, 15; Luka 7:11-17; ndi Machitidu 24:15.

Kumbi Ndingachita Wuli Kuti Chiuta Wavwengi Marombu Ngangu?

CHIFUKWA CHO ŴANTHU AFUMBIYA FUMBU ILI: Ŵanthu ŵamuvisopa vyosi aromba. Kweni ndipuuli, anandi atijivwa kuti marombu ngawu ngamukika cha.

VYO BAYIBOLO LISAMBIZA: Yesu wakutisambiza kuti titenele cha kuwerezga marombu pamwenga kusunga pamtima. Iyu wanguti, “Pakuromba mungawerezgawerezga ŵaka cha.” (Mateyu 6:7) Asani tikhumba kuti Chiuta wavwi marombu ngidu, titenele kuromba mu nthowa yo iyu watiyizomerezga. Kweni chakudankha, tikhumbika kusambira vyo iyu wakhumba ndipu pavuli paki tingaromba mwakuyana ndi khumbu laki. Lemba la 1 Yohane 5:14 likonkhoska kuti: “Asani tipempha kanthu kwakuyana ndi khumbu [laku Chiuta] iyu watuvwa ifwe.”

Wonani so Sumu 65:2; Yohane 14:6, 14; ndi 1 Yohane 3: 22.

Kumbi Ndingachita Wuli Kuti Ndiŵi ndi Umoyu Walikondwa?

CHIFUKWA CHO ŴANTHU AFUMBIYA FUMBU ILI: Ŵanthu anandi agomezga kuti angaŵa ndi umoyu walikondwa asani angaŵa akutowa, andalama ndipuso akutchuka. Mwaviyo, iwu apenjapenja vinthu ivi kweni umoyu walikondwa atiwusaniya mbwenu cha.

VYO BAYIBOLO LISAMBIZA: Pakukamba za mo ŵanthu angaŵiya ndi likondwa Yesu wanguti: ‘Mbamwaŵi ŵasauchi mu mzimu, pakuti ngwawu Ufumu wa kuchanya.’ (Mateyu 5:3) Tingasaniya umoyu walikondwa pija asani tingachitapu kanthu kuti timalisi nja yidu yauzimu, yakuti tiziŵi uneneska waku Chiuta ndi khumbu laki lo wakulenge isi taŵanthu. Uneneska uwu usanirika mu Bayibolo. Kuziŵa uneneska uwu kungatovya kuziŵa vinthu vyakwenere ndi vyambura kwenere. Kuzomerezga kuti uneneska wa mu Bayibolo ulongozgengi vyakusankha ndi vyakuchita vidu, kutichitiskengi kuŵa ndi umoyu walikondwa.—Luka 11:28.

Wonani so Nthanthi 3:5, 6, 13-18 ndi 1 Timote 6:9, 10.

 Apa tawona waka fundu zimanavi za mwenimo Bayibolo lamukiya mafumbu 6 yanga. Kumbi mungayanja kuziŵa vinandi vyakujumpha yapa? Asani namwi mwe “ŵasauchi mu mzimu,” mutenere kuti mungayanja nadi kuziŵa vinandi. Panyaki mungaŵa ndi mafumbu nganyaki nge ndi yanga: ‘Asani Chiuta watitiphwere nadi, nchifukwa uli wazomerezga kuti pa charu paŵi uheni ndi masuzgu? Kumbi ndingachita wuli kuti umoyu wa banja langu uwi wa likondwa?’ Bayibolo limuka mwakukhorweska mafumbu yanga ndi nganyaki ngo mungaŵa nangu.

Chinanga wuli ve viyo, ŵanthu anandi aziŵaniza kuŵelenga Bayibolo. Atiliwona kuti ndakuvukiska kweniso ndakusuzga kulivwiska. Kumbi mungayanja kuti ŵanthu anyaki akuwovyeni kusaniya kwamuka kwa mafumbu yanga mu Bayibolo? Akaboni ŵaku Yehova ŵendi nthowa ziŵi zo zingamuwovyani.

Nthowa yakwamba ndi buku lakuti, Kumbi Bayibolo Lisambizanji Weniukongwa? Buku ili likupangika kuti liwovyi ŵanthu kuwona mo Bayibolo limukiya mafumbu ngo ŵanthu atuŵa nangu. Nthowa yachiŵi ndi sambiru la Bayibolo lawezi la panyumba. Akaboni ŵaku Yehova angayanja kusambira namwi Bayibolo panyumba pinu pamwenga kwekosi ko mungayanja, kweniso panyengu yo imwi mungasankha sabata yeyosi. Sambiru ili lawovya ŵanthu anandi pa charu chosi chapasi. Ndipu anandi afika pakukamba mazu ngakukondweska ngakuti: “Ndasaniya uneneska!”

Paliviso chuma chinyaki cho tingasaniya kuphara cho che mu Bayibolo. Lititifwatuwa kuti tileki kugomezga vinthu nge mizimu, masaramusi, ndi misiku, kweniso kuti tileki kutimbanyizika maŵanaŵanu ndi kuti tileki kuŵa ndi mantha. Lititipaska chilindizga, likondwa kweniso lititikambiya chifukwa cho tikulengeke. Yesu wanguti: “Ndipu muziŵengi uneneska, ndipu uneneska wo usandusengi imwi ŵanangwa.”—Yohane 8:32.