Julani

Lutani pa vo ve mukati

 MUTU 2

“Wangwenda ndi Chiuta”

“Wangwenda ndi Chiuta”

1, 2. Kumbi Nowa ndi banja laki agwiranga nchitu wuli, nanga akumananga ndi masuzgu nanga?

YERUZGIYANI kuti muwona Nowa yo waja pachimkoku wapumuwa. Iyu wanyululuka uku walereska chingaraŵa chikulu cho wakhoma. Po waja pavwika fungu la phula kweniso kuvwika chiwawa cha vipangizu vakukhome. Nowa wawona ŵana ŵaki achigwira nchitu yakucheka mathabwa mwaphamphu. Pa nyengu iyi pajumpha vyaka vinandi kutuliya po ŵana ŵaki, awolu ŵawu ndi muwolu waki akwambiya kugwira nchitu iyi. Kweni nchitu yiwoneka kuti yeche yikulu.

2 Ŵanthu a m’chigaŵa chawu awonanga nge kuti Nowa ndi banja laki losi mbazereza. Ŵanthu yaŵa asekanga ukongwa asani Nowa ndi ŵana ŵaki akhoma chingaraŵa kweniso asani apharazga kuti pacharu chosi paŵengi zandi. Yiwu awonanga nge kuti vo Nowa waŵakambiyanga venga vambula machitika. Azizwanga kuti nchifukwa wuli Nowa ndi banja laki anangiya ŵaka nthazi ndi nyengu yawu pa nchitu yambula mutu waki. Kweni Yehova Chiuta wamuwonanga viyo cha mteŵeti waki Nowa ndi banja laki.

3. Kumbi Nowa wangwenda ndi Chiuta m’nthowa wuli?

3 Bayibolo likamba kuti: “Nowa wangwenda ndi Chiuta.” (Ŵerengani Chiyambo 6:9.) Kumbi fundu yeniyi ying’anamuwanji? Ying’anamuwa kuti Chiuta wayendanga pacharu pamwenga kuti Nowa wanguluta kuchanya cha. Kweni ying’anamuwa kuti Nowa wavwiyanga ndi kwanja Chiuta ndi mtima waki wosi ndipu venga nge kuti Yehova ndi Nowa ayendiyanga limoza nge mabwezi. Pati pajumpha vyaka vinandi, Bayibolo linguzikamba kuti: “Ndi chivwanu Nowa, . . . wanguchisuska charu.” (Ŵah. 11:7) Kumbi chivwanu chingumovya wuli Nowa kususka charu? Kumbi chivwanu chaku Nowa chingatisambizanji mazuŵa nganu?

Munthu Wambula Kalema M’charu Chiheni

4, 5. Kumbi mijalidu yinguheneka wuli pacharu m’nyengu yaku Nowa?

4 Nowa wangukuliya m’charu cho chahenekiyangahenekiyanga. Vinthu viheni ukongwa vingwamba kuchitika kutuliya m’nyengu ya munthu murunji Enoke, yo wenga mbuyaki waku Nowa kweniso yo wangwenda ndi Chiuta. Enoke wangukambiya limu kuti zuŵa lakweruzgiya  ŵanthu aheni pacharu lituza. M’nyengu yaku Nowa mijalidu yinguheneke limu pacharu. Yehova wanguwona kuti charu chavunda, chifukwa chakuti chinguzaza ndi chiwawa. (Chiy. 5:22; 6:11; Yuda 14, 15) Kumbi nchinthu wuli cho chinguchitiska kuti vinthu viheneki viyo pacharu?

5 Angelu anyaki ndiwu angwambisa masuzgu yanga. Pa nyengu iyi ndipu mungelu munyaki wagarukiya kali Yehova ndi kujisambuska Satana Diabolo. Satana wangukamba vinthu vaboza vakukwaskana ndi Chiuta ndipu wangunyenga Adamu ndi Eva kuti abudiyi Chiuta. M’nyengu yaku Nowa, angelu anyaki nawu angugarukiya Yehova. Yiwu anguthaŵa kuchanya ko Chiuta wanguŵaŵika kuti ajengi, anguza pacharu chapasi kuzija nge mbanthu ndi kuto anthukazi akutowa. Angelu akugaruka yaŵa anguchitiska kuti ŵanthu achitengi vinthu vabwekabweka.Chiy. 6:1, 2; Yuda 6, 7.

6. Kumbi Anefilimu anguchitiska kuti pacharu paje mijalidu yamtundu wuli, nanga Yehova wangusimikizga kuti wachitengenji?

6 Angelu yaŵa angubala ŵana wo ŵenga vinkhara vanthazi ukongwa kuruska ŵanthu anyaki wosi. Bayibolo litiŵadana kuti Anefilimu kung’anamuwa kuti “Akuwiska,” wo awiska anyawu pasi. Anefilimu yaŵa ŵenga ŵanthu ankhaza ukongwa, ndipu ndiwu anguchitiska kuti charu chiheneki. Ndichu chifukwa chaki Mulengi wanguwona kuti, “Utimbanizi wa munthu wenga ukuru m’charu ndipuso mateskedu ngosi nga maŵanaŵanu nga mumtima ngenga ngaheni pe nyengu zosi.” Yehova wangusimikizga kuti watuzgengepu ŵanthu aheni wosi pacharu mu vyaka 120.—Ŵerengani Chiyambo 6:3-5.

7. Kumbi Nowa ndi muwolu waki akhumbikanga kuvikiliya ŵana wawu ku mijalidu yabwekabweka niyi?

7 Ŵanaŵaniyani ŵaka mo venge vakusuzga kuja ndi banja m’charu chiheni viyo! Kweni Nowa wenga ndi banja ndipu muwolu waki wenga  munthu wamampha ukongwa. Nowa wati wafika vyaka 500, muwolu waki wangumubaliya ŵana anthurumi ŵatatu, ndipu mazina ngawu ngenga: Shemu, Hamu ndi Yafete. * Nowa pamoza ndi muwolu waki akhumbikanga kuvikiliya ŵana ŵawu ku mijalidu yabwekabweka yo yenga m’charu. Ŵana yaŵa atenere kuti akhumbiranga Anefilimu wo ŵenga “virimbi” ndipuso “ŵanthu ŵambiri.” Penga pakusuzga kuti Nowa ndi muwolu waki avikiliyi ŵana ŵawu kuti aleki kuvwa nkhani zakukwaskana ndi nkhaza za Anefilimu yaŵa, kweni aŵasambizanga uneneska waku Yehova Chiuta, yo watinkha vinthu viheni vosi. Yiwu akhumbikanga kovya ŵana ŵawu kuti aziŵi kuti Yehova vamupwetekanga ukongwa kuwona viwawa ndipuso kugaruka kwa ŵanthu.Chiy. 6:6.

Nowa ndi muwolu waki akhumbikanga kuvikiliya ŵana ŵawu ku mijalidu yabwekabweka

8. Kumbi Apapi azeru mazuŵa nganu angamuyezga wuli Nowa ndi muwolu waki?

8 Apapi a mazuŵa nganu angavwisa umampha ukongwa mo Nowa ndi muwolu waki angusuzgikiya pakulera ŵana. Charu cho tijamu chazaza ndi ŵanthu achiwawa kweniso ambula kuvwiya. Kanandi m’matawuni musanirika ampupuka wo achita vauchigeŵenga. Masaza ndi mafilimu nganandi nga ŵana ngaja ngachiwawa. Apapi azeru atesesa kovya ŵana ŵawu mwa kuŵasambiza mijalidu yamampha yakukwaskana ndi Yehova, Chiuta wachimangu yo wazamutuzgapu vinthu vosi vachiwawa. (Sumu 11:5; 37:10, 11) Asani apapi mbaphamphu, ŵana akhoza kusambira kuchita vinthu vamampha chinanga kuti aja m’charu chiheni. Nowa ndi muwolu waki angufiska kovya ŵana ŵawu. Ŵana ŵawu ŵati akuwa, anguzija ŵanthu amampha ukongwa ndipu anguto anthukazi amampha wo ayanjanga kuteŵete Yehova Chiuta pa umoyu wawu.

‘Ujipangiyi Chingaraŵa’

9, 10. (a) Kumbi Yehova wangumutuma nchitu wuli Nowa yo yinguchitiska kuti vinthu visinthi pa umoyu waki? (b) Kumbi Yehova wangumukambiyanji Nowa vakukwaskana ndi kawonekeru ka chingaraŵa kweniso chilatu chaki?

9 Zuŵa linyaki vinthu vingusinthiya limu pa umoyu waku Nowa. Yehova wangukambiya mteŵeti waki wakwanjiwa Nowa, kuti wakhumba kutuzgapu uheni pacharu chapasi. Chiuta wangutuma Nowa kuti: ‘Ujipangiyi chingaraŵa cha chimiti.’Chiy. 6:14.

10 Chingaraŵa ichi chenga sitima cha nge mo ŵanthu anyaki aŵanaŵaniya. Chingupangika nge maboti ngo titingaziŵa cha. Chenga nge chibokosi chikulu. Yehova wangukambiya Nowa ukulu waki, kawonekeru kaki ndipuso wangumukambiya kuti wachimati phula mkati ndi kubwalu. Wangukambiya so Nowa chifukwa cho wangumutumiya nchitu iyi kuti: “Ndikatoliyanga zandi wa maji pacharu . . . Chinthu chosi cha pacharu chapasi chikafwanga.” Kweni Yehova wanguchita phanganu ndi Nowa lakuti: “Ukaserenga muchombu ndi ŵana ŵaku, muwolu waku ndi ŵawoli ŵa ŵana ŵaku.” Nowa wakhumbikanga so kuserezgamu  mitundu yosi ya nyama. Pa nyengu ya Zandi iyi, chamoyu chechosi cho chenga m’chingaraŵa ndichu chatingi chipozomokengi.Chiy. 6:17-20.

Nowa ndi banja laki agwiriyanga nchitu limoza kuti afiski vo Chiuta wanguŵakambiya

11, 12. Kumbi Nowa wakhumbikanga kugwira nchitu yikulu ukongwa niyi, nanga iyu wanguchitanji?

11 Nowa wangupaskika nchitu yikulu ukongwa. Chingaraŵa cho wakhumbikanga kukhoma chenga mamita 133 mu utali, 22 mu usani ndipuso 13 mu msinkhu. Chenga chikulu ukongwa kujumpha masitima nga mazuŵa nganu. Kumbi Nowa wangugwentha nchitu yo wangutumika, kudandawula pamwenga kusintha kuti wachipangi m’nthowa yo iyu wanguwona kuti njipusu? Bayibolo limuka kuti: “Nowa wanguchita ichi; wanguchita chechosi cho Chiuta wangumulanguliya.”Chiy. 6:22.

12 Nchitu yakukhoma chingaraŵa yinguto vyaka akhumba 40 mpaka 50. Yiwu akhumbikanga kutema vimiti kuguguza mikoku, kucheketerezga ndi kuvilunga pamoza. Chingaraŵa chakhumbikanga kuja cha vigaŵa vitatu vakuyerekana, vipinda kweniso khomu m’mphepeti mwaki. Viwoneka kuti chingaraŵa ichi chenga ndi mawindu m’chanya ndipuso chenga cha libanda kuti maji ngawengi umampha pasi.Chiy. 6:14-16.

13. Kumbi ndi nchitu wuli yo Nowa wakhumbikanga so kugwira yo yenga yakusuzga ukongwa kuluska kukhoma chingaraŵa? Kumbi ŵanthu achitanga wuli Nowa wachiŵatcheŵeska?

13 Mukuluta kwa vyaka, chingaraŵa chingwamba kumala ndipu Nowa watenere kuti wangukondwa ukongwa chifukwa ŵanthu a m’banja laki awovyananga nayu. Iyu wakhumbikanga so kugwira nchitu yinyaki yo yenga yakusuzga ukongwa kuluska yakukhoma chingaraŵa. Bayibolo lititikambiya kuti Nowa “wangumemeza urunji.” (Ŵerengani 2 Petro 2:5.) Mwachiganga, Nowa wangulongozga pa nchitu yakutcheŵeska ŵanthu kuti Yehova wanangengi ŵanthu aheni pambula kuswera. Kumbi yiwu anguchita wuli? Pati pajumpha vyaka vinandi, Yesu Khristu wanguzikamba vakukwaskana ndi m’nyengu yaku Nowa kuti ŵanthu wo “ŵanguziŵa kanthu cha.” Iyu wangukamba kuti angutangwanika ndi vakuchitika va zuŵa ndi zuŵa nge, kurya, kumwa, kuto ndi kuyirwa, mwakuti angutoliyaku kanthu cha vo Nowa waŵakambiyanga. (Mat. 24:37-39) Tiziŵa so kuti ŵanthu anandi amunyozanga limoza ndi banja laki, anyaki amuwofyanga ndi kumususka. Atenere so kuti achitanga vinthu vakutimbanyizga nchitu yakukhoma chingaraŵa.

Chinanga kuti ŵanthu awonanga mo Chiuta watumbikiyanga Nowa, kweni amunyozanga ndipu atoliyangaku kanthu cha wachiŵapharazgiya

14. Kumbi mabanja ngachikhristu mazuŵa nganu ngangasambiranji kwaku Nowa ndi banja laki?

14 Kweni Nowa ndi banja laki angulekapu cha. Nowa ndi banja laki angulutirizga kukhoma chingaraŵa chinanga kuti ŵanthu a m’chigaŵa chawu aŵawonanga kuti azelezeka. Mabanja ngachikhristu ngangasambira vinandi kwaku Nowa ndi banja laki. Ndipuso isi tija m’mazuŵa ngo Bayibolo litingadana kuti “nyengu zizitu.” (2 Tim. 3:1) Yesu wangukamba kuti nyengu yo tijamu yiyanana ndi nyengu yo Nowa wakhomanga chingaraŵa. Asani ŵanthu atitisuska, atitinyoza, pamwenga kutitombozga chifukwa cha uthenga wa Ufumu waku Chiuta wo tipharazga  tingachita umampha kukumbuka Nowa. Masuzgu yanga tayamba ndisi cha kukumana nangu.

Sere M’chingaraŵa

15. Kumbi mbabali aku Nowa naŵa wo angufwa iyu wepafupi kufika vyaka 600?

15 Pati pajumpha vyaka vinandi, Nowa wangumaliza kukhoma chingaraŵa. Nowa we pafupi kufika vyaka 600, abali ŵaki anyaki angufwa, ndipu ivi vingumukwaska ukongwa. Awiski a Lameke angufwa. * Pati pajumpha vyaka 5 kutuliya po Lameke wangufwiya, ambuyaki aku Nowa a Metusele nawu angufwa ŵati afika vyaka 969. Metusele ndiyu wangujaku ndi umoyu kwa vyaka vinandi ukongwa pa ŵanthu wo akulembeka m’Bayibolo. (Chiy. 5:27) Metusele ndi Lameke angujapu ndi umoyu munthu wakwamba Adamu wechendafwi.

16, 17. (a) Kumbi Nowa wangulonde uthenga wuli wati wafika vyaka 600? (b) Konkhoskani vinthu vambula kuluwika vo Nowa ndi banja laki anguwona.

16 Nowa wati wafika vyaka 600, wangulonde uthenga wakutuliya kwaku Yehova Chiuta wakuti: ‘Sere m’chombu ndi ŵamunyumba yaku wosi.’ Pa nyengu iyi, Chiuta wangukambiya Nowa kuti waserezgi nyama za mitundu yosi m’chingaraŵa, wangumukambiya kuti waserezgi 7 pa mtundu wewosi wa nyama zakuphotoka zo zenga zakwenere kupereka sembi kweni zinyaki zosi kuti waserezgi ziŵiziŵi.Chiy. 7:1-3.

 17 Vo vinguchitika pa zuŵa ili, vitenere kuti venga vambula kuluwika. Nowa ndi banja laki awonanga nyama zakupambanapambana masawuzandi nganandi, zikuluzikulu ndi zimanazimana kusazgapu viyuni. Nyama zinyaki zenga zakofya zinyaki zenga zakufwasa; zinyaki zenga zakwenda, zakuphururuka ndipuso zakukwaŵa. Tingaŵanaŵananga kuti Nowa wayesanga kusuzgika ndi kuzikhweme m’chingaraŵa cha. Bayibolo likamba kuti, ‘zingusere m’chingaraŵa pamoza ndi Nowa.’Chiy. 7: 9.

18, 19. (a) Kumbi tingamuka wuli mafumbu nga ŵanthu wo asuska vo vinguchitika m’nkhani yaku Nowa? (b) Kumbi vo Yehova wangusankha pakupozomoska nyama vilongo wuli kuti iyu ngwazeru?

18 Ŵanthu akususka angafumba kuti: ‘Vinthu vaviyo ivi vingachitika wuli? Ndipu nyama zenizi zinguja wuli mwachimangu mumalu ngafinyi?’ Jifumbeni kuti: Kumbi Mulengi wa chilengedu chosi wangatondeka kuŵeta nyama zo iyu wakulenga ndipuso kuzichitiska kuti zije mwachimangu? Kumbukani kuti Yehova ndiyu Chiuta yo wakulenga nyama. Pavuli pa vyaka vinandi, Yehova wangugaŵa Nyanja Yiyera ndipuso wangumika lumwi. Asani wanguchita vosi ivi, watingi watondekengi pani kuchita vo vakonkhoskeka m’nkhani yaku Nowa? Palivi cho chingamutonda, ndipu ndivu wanguchita nadi.

19 Chiuta wakakhumbengi so kupozomoska nyama izi m’nthowa yinyaki, watingi watondekengi cha. Kweni iyu wangusankha kugwiriskiya nchitu nthowa yo yititikumbuska udindu wo Yehova wangupaska ŵanthu pakwamba kuti aphweriyengi vamoyu vosi. (Chiy. 1:28) Ndichu chifukwa chaki apapi anandi mazuŵa nganu agwiriskiya nchitu nkhani yaku Nowa pakusambiza ŵana ŵawu kuti Yehova wawona kuti nyama ndi ŵanthu wo wakulenga mbakuzirwa.

20. Kumbi Nowa ndi banja laki angutangwanika ndi nchitu wuli kwati kwaja sabata yimoza kuti Zandi wazi?

 20 Yehova wangukambiya Nowa kuti kwaja sabata yimoza kuti Zandi wazi. Nowa ndi banja laki atenere kuti angutangwanika ukongwa. Wonani kuti ŵenga ndi nchitu yikulu yakuserezga nyama zosi m’chingaraŵa, vakurya va nyama ndi vawu, kuviŵika pamalu ngaki kweniso kuserezgamu katundu wawu. Muwolu waku Nowa ndi akumwana ŵaki nawu angutangwanika ndi nchitu ya kunozga vinthu m’chingaraŵa kuti muje nge m’nyumba.

21, 22. (a) Nchifukwa wuli titenere cha kuzizwa ndi vo ŵanthu a m’chigaŵa chaku Nowa achitanga? (b) Kumbi ŵanthu wo anyozanga Nowa ndi banja laki anguleka wuli?

21 Kumbi ŵanthu wo wajanga nawu m’chigaŵa chaki anguchita wuli? Mpaka pa nyengu iyi, “kuti ŵanguziŵa kanthu cha,” chinanga kuti awonanga mo Yehova watumbikiyanga Nowa ndi vosi vo wachitanga. Yiwu awonanga mo nyama zandondiyanga m’chingaraŵa. Kweni tingazizwanga cha kuti nchifukwa wuli anguleka kutoliyaku kanthu. Mazuŵa nganu napu, ŵanthu awona maukaboni ngakuti te m’mazuŵa ngakumaliya, kweni atoliyaku kanthu cha. Ndipuso, wakutumika Petro wangukambiya limu kuti, ŵakunyoza ŵakanyozanga ndipu ŵakanenanga ŵanthu wo avwiya vo Chiuta watiŵatcheŵeska. (Ŵerengani 2 Petro 3:3-6.) Nowa ndi banja laki nawu anyozekanga viyo.

22 Kumbi kunyoza uku kungumaliya pani? Bayibolo lititikambiya kuti Nowa ndi banja laki ŵati asere m’chingaraŵa limoza ndi vinyama, “Ambuya angumujaliya mukati [“Yehova wangujala chisasa,” NW].” Asani ŵanthu wo aŵanyozanga ŵenga pafupi, atenere kuti anguja cheti ŵati awona vo Chiuta wanguchita. Asani anguleka kuwona vo vinguchitika, mbwenu vuwa ndiyu yinguŵajala pamulomu yati yayamba kuwa. Yingupopoma kwambula kulekezga mpaka charu chosi chinguzaza maji nge mo Yehova wangukambiya.Chiy. 7:16-21.

23. (a) Kumbi tiziŵa wuli kuti Yehova wangukondwa cha ndi nyifwa ya ŵanthu aheni a m’nyengu yaku Nowa? (b) Nchifukwa wuli tingachita umampha kwezga chivwanu chaku Nowa mazuŵa nganu?

23 Kumbi Yehova wangukondwa ndi nyifwa ya ŵanthu aheni yaŵa? Awa. (Ezek. 33:11) Iyu wanguŵapaska nyengu yakuti asinthi ndi kwamba kuchita cho nchamampha. Kumbi atingi afiskengi? Vo Nowa wanguchita pa umoyu waki vimuka fumbu lenili. Mwa kwenda ndi Yehova ndi kuvwiya Chiuta waki m’vinthu vosi, Nowa wangulongo kuti atingi afiskengi. Mwakuchita viyo, chivwanu chaki chingususka charu cha m’nyengu yaki ndipu wangulongo kuti ŵanthu a m’mgonezu waki ŵenga aheni. Chivwanu chaki chingutaska iyu ndi banja laki. Asani mungayezga chivwanu chaku Nowa, mujitaskengi ndi kutaska akwanjiwa ŵinu. Mwakulingana ndi Nowa, mukhoza kwenda ndi Yehova Chiuta nge Mubwezi winu. Ndipu mujengi nayu pa ubwezi mpaka muyaya.

^ ndimi 7 M’nyengu yakali, ŵanthu ajanga ndi umoyu utali ukongwa kuluska mazuŵa nganu. Viwoneka kuti ajanga ndi umoyu utali kweniso ajanga anthazi chifukwa chakuti pangujumpha nyengu yitali cha kutuliya po Adamu ndi Eva ŵenga akufikapu.

^ ndimi 15 Viwoneka kuti zina lo Lameke wangupaska mwana waki lakuti Nowa, lang’anamuwanga kuti “Kupumuwa” pamwenga “Kupembuzga” ndipuso wangukambiya limu kuti Nowa wazamufiska uchimi wakukwaskana ndi zina laki mwa kulongozga mtundu wa ŵanthu kuti uzipumuwi ku masuzgu ngo akumananga nangu chifukwa chakutembeka kwa nyata. (Chiy. 5:28, 29) Lameke wangufwa wechendawoni kufiskika kwa uchimi uwu. Viwoneka so kuti abali ŵaki wosi wo wanguwa nawu be limoza kweniso anyina angufwa pa Zandi.