Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Yezgani Chivwanu Chawu

Kalata Yakutuliya ku Wupu Wakulongozga

Kalata Yakutuliya ku Wupu Wakulongozga

Akwanjiwa Abali ndi Azichi:

Nkhani zakukondweska za mutu wakuti, “Yezgani Chivwanu Chawu,” zingwamba kulembeka mu Chigongwi cha Alinda cha January 1, 2008. Chituliyi nyengu iyi, nkhani izi zilembeka mu Chigongwi cha Alinda, asani pajumpha myezi yitatu yeyosi.

Kumbi ŵanthu wo aŵerenga magazini iyi, akambanjipu? Munthukazi munyaki wati waŵerenga nkhani yaku Marta wangulemba kuti: “Ndinguseka ukongwa ndati ndaŵerenga nkhani iyi chifukwa ndivu nani ndichita, nyengu zosi nditangwanika ndi kubika asani kwaza alendu mwakuti ndiluwaku kulekezga dankha nchitu kuti ndichezengi ndi anyangu.” Wampupuka munyaki wangukamba vo vingumukondweska ukongwa wati waŵerenga nkhani yaku Estere, iyu wanguti: “Ndiŵanaŵana kuti taŵanthu titanja kufipiya mtima nkhani ya vakuvwala ndi mafashoni ngasonu. Mbuneneska kuti tikhumbika kuvwala umampha, kweni tingajumphiskanga mwesu cha.” Iyu wangukamba so kuti: “Yehova wakhorwa ndi umunthu widu wamkati.” Mzichi munyaki wangukwaskika ukongwa wati waŵerenga nkhani ya wakutumika Petro, ndipu wangukamba kuti: “Ndingukwaskika ukongwa mwakuti ndawonanga nge kuti vo vinguchitikiya Petro vachitikiyanga ini. Ndinguja nge ndengaku. Ndayesesanga kujiserezga m’nkhani yaki ndi kuwona nge kuti vinthu vo nkhani yikonkhoska vichitika sonu.”

Ŵanthu yaŵa azumbulika yapa kweniso anyaki anandi wo akulemba maŵanaŵanu ngawu pakuwonga nkhani zo anguŵerenga, azomerezgana ndi vo wakutumika Paulo wakulemba kuti: “Vo vosi vingulembeke limu, vingulembeke kusambizika kwidu.” (Ŵar. 15:4) Yehova wakulemba nadi nkhani zosi izi m’Bayibolo ndi chilatu chakuti tisambirepu kanthu. Kwali taja vyaka vilinga mu uneneska, weyosi waku isi wangayanduwa ukongwa ndi nkhani izi.

Titikuchiskani mosi kuti muŵerengi buku ili asani mwalilonde ŵaka. Ligwiriskiyeni nchitu pa Kusopa kwa Pabanja ndipu muwonengi kuti ŵana aliyanjengi ukongwa. Asani mwaziyamba kulisambira pa Sambiru la Bayibolo la Mpingu, muzisanirikengepu sabata yeyosi kuti lingazikujumphaningi chinanga ndi sambiru limoza cha. Liŵerengeni mwakufwasa ndipu mujengi nge kuti muwona vo vachitikanga; mujengi nge kuti vo muŵerenga vichitikiya imwi. Yesani kuvwa nge mo ŵanthu wo akambika m’nkhani yo muŵerenga avwiyanga kuti muwoni vo akumananga navu. Yeruzgiyani mo yiwu anguchitiya pa vo angukumana navu ndi vo imwi mwatingi muchitengi asani vinguchitikiya imwi.

Te akukondwa ukongwa kukupaskani buku ili. Tipempha kuti likuwovyeni ukongwa pamoza ndi banja linu. Titikuyanjani ukongwa kweniso titikukhumbiyani vamampha vosi,

Wupu Wakulongozga wa Akaboni aku Yehova