Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

“Mujisungi mu Chanju Chaku Chiuta”

 MUTU 10

Nthengwa Nchawanangwa Chakutuliya Kwaku Chiuta

Nthengwa Nchawanangwa Chakutuliya Kwaku Chiuta

“Chingwi cha mitegha yitatu kuti chidumuka liŵi cha.”WAKUTAULA 4:12.

1, 2. (a) Kumbi nyengu zinyaki tija ndi mafumbu wuli ngakukwaskana ndi ŵanthu wo atorana ŵaka, nanga nchifukwa wuli? (b) Kumbi tikambiskanengi mafumbu nanga?

KUMBI mutanja kuluta ku zowala? Anandi atanja kulutaku chifukwa yija nyengu yakukondweska ukongwa. Asani mwaluta, muwona ŵanthu wo akwatisa kuti avwala umampha. Kweniso visku vawu vilongo kuti mbakukondwa ukongwa. Pa zuŵa ili wosi amwemwete ndipuso awoneka kuti vinthu viŵayendiyengi umampha pa umoyu wawu wosi.

2 Chinanga kuti ve viyo, mungazomerezga kuti m’vigaŵa vinandi mazuŵa nganu nthengwa ziswera cha kumala. Po tigomezga kuti wo atorana ŵaka sonu vinthu viŵayendiyengi umampha, nyengu zinyaki titijifumba kuti: ‘Kumbi ŵanthu ŵenaŵa azamukondwanga? Kumbi nthengwa yaŵu yikhongi?’ Tingasaniya kwamuka kwa mafumbu yanga asani munthurumi ndi munthukazi agomezga Chiuta ndipuso agwiriskiya nchitu ulongozgi waki pa nkhani ya nthengwa. (Ŵerengani Nthanthi 3:5, 6.) Yiwu akhumbika kuchita viyo kuti alutirizgi kuja m’chanju chaku Chiuta. Tiyeni tiwoni mo Bayibolo limukiya mafumbu nganayi yanga: Nchifukwa wuli ŵanthu atorana? Asani mukhumba kuto pamwenga kuyirwa, kumbi ndiyani yo mungasankha kutorana nayu? Kumbi nthengwa mungayinozgeke wuli? Kumbi nchinthu wuli cho chingawovya akutorana kuti alutirizgi kuja ndi umoyu walikondwa?

NCHIFUKWA WULI ŴANTHU ATORANA?

3. Nchifukwa wuli chingaŵa chinthu chambula zeru kuto pamwenga kuyirwa pa vifukwa vambula kuvwika?

3 Anyaki agomezga kuti nthengwa yichitiska kuti munthu wakondwengi.  Akamba kuti asani munthu wechendato pamwenga kuyirwa wangasaniya likondwa cha pa umoyu. Kweni mbuneneska cha. Yesu yo wenga wambula kuto wangukamba kuti, umphara we nge chawanangwa ndipu wanguchiska ŵanthu wo angafiska kuja pa umphara kuti aje viyo. (Mateyu 19:10-12) Wakutumika Paulo nayu wangukonkhoska umampha wakuja pa umphara. (1 Ŵakorinte 7:32-38) Yesu ndi Paulo akuŵika dangu cha pa nkhani iyi, ndipu kukanizga kutorana nchimoza mwa “visambizu va mademoni.” (1 Timote 4:1-3) Kuja pa umphara kungaŵawovya ukongwa ŵanthu wo akhumba kuteŵete Yehova kwambula kutimbanyizgika. Chingaŵa chinthu chazeru cha kuto pamwenga kuyirwa pa vifukwa vambula kuvwika nge kuchichizgika ndi anyinu.

4. Kumbi banja lamampha litovya wuli pa kulera ŵana?

4 Kumbi pe vifukwa vakwenere vo munthu wangakhumbiya kuto pamwenga kuyirwa? Hinya. Nthengwa nayu nchawanangwa chakutuliya kwaku Chiuta widu wachanju. (Ŵerengani Chiyambo 2:18.) Mwaviyo, nthengwa ye ndi vinthu vinyaki vamampha ndipuso ŵanthu asaniya vitumbiku. Mwakuyeruzgiyapu, nthengwa yamampha yichitiska kuti ŵanthu aje ndi umoyu wamampha wa banja. Kuti ŵana aleleki umampha ndi apapi ŵawu, akhumbika kuja m’banja lamampha lo mwe chanju, lo asambiza ŵana ndipuso lo apapi apereka ulongozgi. (Sumu 127:3; Ŵaefesu 6:1-4) Chinanga kuti ve viyo, kubala ŵana ndichu chifukwa pe cha chakuti munthu watole pamwenga wayirwiyi.

5, 6. (a) Mwakukoliyana ndi Wakutaula 4:9-12, kumbi ŵanthu ayanduwa wuli m’banja asani atanjana? (b) Kumbi nthengwa yingaja wuli nge chingwi cha mitegha yitatu?

5 Ŵanaŵaniyani lemba lo patuwa mutu wa nkhani yeniyi kweniso mavesi nganyaki: “Kuŵa ŵaŵi nkhwamampha kwakuruska yumoza, chifukwa mu kutakataka kwawu ŵe ndi mphotu yamampha. Pakuti asani ŵaŵa ŵaŵi yumoza wakayuskanga munyaki; kweni owe kwaku yo we yija asani wawa walivi munyaki wakumuyuska. Ndipuso, asani ŵaŵi agona pamoza, afundiskana; kweni kumbi yumoza wangajifundiska wuli? Nanga yumoza wangamuruska munyaki pakumikana nayu, kweni ŵaŵi akamuruskanga, chingwi cha mitegha yitatu kuti chidumuka liŵi cha.”Wakutaula 4:9-12.

 6 Fundu yikulu pa lemba ili, njakuti ŵanthu akutorana akhumbika kwanjana. Nthengwa yikhumbika kuti ŵanthu wo atorana ayanjanengi ukongwa. Nge mo lemba ili lilongole, kwanjana kungachitiska kuti ŵanthu akutorana awovyanengi, apembuzanengi kweniso avikiliyanengi. Kuti nthengwa yije yakukho pakhumbika chinthu chinyaki kuruska ŵaka kukoliyana kwa ŵanthu ŵaŵi. Nge mo vesi ili lakambiya, chingwi cha mitegha yiŵi chingadumuka, kweni nkhwakusuzga kuti chingwi cho chaposeka ndi mitegha yitatu chidumuki. Asani munthurumi ndi munthukazi ŵe ndi chilatu chakukondweska Yehova pa umoyu wawu, nthengwa yawu yija nge chingwi cha mitegha yitatu. Mwaviyo, nthengwa yawu yingaja yakukho asani wosi atijipereka ukongwa kwaku Yehova.

7, 8. (a) Kumbi mbulongozgi wuli wo Paulo wakulembe Akhristu wo ŵe pa umphara wo asuzgika ndi chiryokuryoku chakugonana? (b) Kumbi Bayibolo likambanji pa nkhani ya nthengwa?

7 Nthengwa ndi malu ngija ngo ŵanthu angamalisiya chiryokuryoku chawu chakugonana. M’nthengwa ndimu kugonana kutuŵa kwakukondweska. (Nthanthi 5:18) Chinanga kuti munthu wangajumpha nyengu yo chiryokuryoku chakugonana chija chanthazi, iyu wangasuzgika mbwenu ndi chiryokuryoku cha kugonana. Asani watondeka kujiko, chiryokuryoku cha viyo chingachitiska kuti munthu wachiti ureŵi. Paulo wangukambirika kulembe ŵanthu ambula kuto ndipuso kuyirwa ulongozgi wakuti: “Kweni asani alivi kujitintha, atorani: chifukwa nkhwamamphaku kutorana kwakuruska kukolezga mtima [kusuzgika ndi chiryokuryoku].”1 Ŵakorinte 7:9, 36; Yakobe 1:15.

8 Kaya pe vifukwa wuli vo vingachitiska munthu kuti wato pamwenga wayirwi, kweni wangachita umampha kunozgeke. Paulo wangukamba kuti, kweni kwaku wo atorana “aŵengi ndi suzgu mu umoyu waliŵavu.” (1 Ŵakorinte 7:28) Ŵanthu akutorana akumana ndi masuzgu ngo amphara akumana nangu cha. Asani mukhumba kuto pamwenga kuyirwa, kumbi mungachita wuli kuti masuzgu ngakaŵi ngamana ndipuso kuti mukaje ndi vitumbiku vinandi m’nthengwa yinu? Nthowa yimoza nkhusankha mwazeru munthu yo mukhumba kutorana nayu.

 KUMBI NDIYANI YO NGWAKWENERE KUTORANA NAYU?

9, 10. (a) Kumbi Paulo wanguyeruzgiya wuli kofya ko kuŵapu asani Kaboni watorana ndi munthu yo ndi Kaboni cha? (b) Kumbi nchinthu wuli cho chichitika kanandi asani munthu wakana kuvwiya ulongozgi waku Chiuta wakukanizga kutorana ndi munthu yo ndi Kaboni cha?

9 Paulo wakulemba fundu yakukhumbika ukongwa yo yitenere kugwiriskikiya nchitu pakusankha munthu wakutorana nayu. Iyu wangukamba kuti: “Mungaŵanga akumangirizgana ndi ambula chivwanu cha.” (2 Ŵakorinte 6:14) Iyu wanguyeruzgiya nthengwa ndi nchitu yakulima. Asani nyama ziŵi zakupambana msinkhu pamwenga nthazi azimangiriya kuti zilimiyi limoza, zosi zingasuzgika. Mwakuyana ŵaka, tiziŵa kuti munthu yo ndi Kaboni asani wangatorana ndi Kaboni cha wangakumana ndi masuzgu. Asani yumoza wakhumba kulutirizga kwanja Yehova kweni munyaki watoliyaku kanthu cha, vilatu vawu vituŵa vakupambana ndipu ivi vingachitiska masuzgu nganandi. Ndichu chifukwa chaki Paulo wanguchiska Akhristu kuti atenere kutorana “mu wanasi wa Ambuya.”1 Ŵakorinte 7:39.

10 Pa vifukwa vinyaki, Akhristu ambula kuto pamwenga kuyirwa awona kuti nkhwamampha kutorana ŵaka ndi munthu weyosi kuruska kuja ŵija. Anyaki asankha kukana kugwiriskiya nchitu fundu za m’Bayibolo ndipu atorana ndi munthu yo wateŵete Yehova cha. Kanandi vinthu vaviyo vichitiska masuzgu. Ŵanthu aviyo asanirika kuti atorana ndi munthu yo wangaŵa wakusuzga kukambiskana nayu vinthu vakukhumbika ukongwa pa umoyu. Phukwa lo angaŵa nalu pavuli pakuti atorana ndi munthu waviyo, lingaruska phukwa lo ŵenga nalu ŵechendato pamwenga kuyirwa. Chinthu chakukondweska nchakuti, pe Akhristu masauzandi nganandi ambula kuto pamwenga kuyirwa wo agomezga ndi kulondo ulongozgi waku Chiuta pa nkhani yeniyi. (Ŵerengani Sumu 32:8.) Chinanga kuti akhumba kuto pamwenga kuyirwa, yiwu alutirizga kuja pa umphara mpaka penipo azamusaniriya munthu wakwenere yo wangasanirika pakati pa ŵanthu wo asopa Yehova Chiuta.

11. Kumbi nchinthu wuli cho chingakuwovyani kuti musankhi mwazeru munthu wakutorana nayu? (Wonani so bokosi lakuti, “ Kumbi yo Ndikhumba Kutorana Nayu Waje ndi Mijalidu Niyi?”)

 11 Mbuneneska kuti ndi muteŵeti waku Yehova weyosi cha yo wangaŵa wamampha kutorana nayu. Asani mukhumba kuto pamwenga kuyirwa, penjani munthu yo mungayanana nayu mijalidu, vilatu vauzimu ndipuso yo watanja Chiuta nge imwi. Muŵanda wakugomezgeka ndi wakuwamu wapereka mabuku nganandi ngo ngangatiwovya pa nkhani yeniyi, ndipu mungachita umampha ukongwa kuromba ndi kuŵanaŵaniya ulongozgi wa m’Malemba wenuwu kuti ukuwovyeni pakusankha chinthu chakukhumbika ukongwa chenichi. *Ŵerengani Sumu 119:105.

12. Kumbi ndi mudawuku nuwu wo uchitika m’vyaru vinandi, nanga m’Bayibolo mwe chakuwoniyapu wuli cho chingatiwovya?

12 M’vyaru vinandi apapi ndiwu asankhiya mwana wawu munthu wakuti watorani nayu. Kanandi ŵanthu a midawuku yeniyi agomezga kuti apapi ŵe ndi zeru ukongwa ndipuso aziŵa vinthu vinandi, ndichu chifukwa chaki atenere kusankhiya mwana wawu munthu wakutorana nayu. Nge mo achitiyanga m’nyengu yakali, nthengwa zaviyo kanandi zitenda umampha. Chakuwoniyapu chaku Abrahamu pakutumiza muteŵeti waki kuti wakasaniriyi Yisaki munthukazi, chingawovya apapi mazuŵa nganu asani angakhumba kusaniriya mwana wawu munthu wakutorana nayu. Abrahamu wanguŵika maŵanaŵanu ngaki pa ndalama pamwenga kutchuka cha. M’malu mwaki, iyu wanguyesesa kuti wasaniriyi Yisaki munthukazi pakati pa ŵanthu wo asopanga Yehova. *Chiyambo 24:3, 67.

 KUMBI MUNGANOZGEKE WULI NTHENGWA YAMAMPHA?

13-15. (a) Kumbi fundu yo ye pa Nthanthi 24:27, yingamuwovya wuli munthurumi yo wakhumba kuto? (b) Kumbi munthukazi wangachita wuli kuti wanozgeke nthengwa?

13 Asani mukhumba kuyirwa pamwenga kuto mungachita umampha kujifumba kuti, ‘Kumbi nde wakunozgeka nadi?’ Pakumuka fumbu yili, mungaŵanaŵananga ŵaka va chanju, kugonana, ubwezi pamwenga kubala ŵana cha. M’malu mwaki, munthu yo wakhumba kuto pamwenga kuyirwa watenere kuŵanaŵaniya maudindu ngo nge m’banja.

14 Munthurumi yo wapenja kuto watenere kuŵanaŵaniya ukongwa fundu yakuti: “Longosole kubwalu nchitu yaku ujilongosole vosi vakumunda, ndipu pavuli paki uzengi nyumba yaku.” (Nthanthi 24:27) Kumbi fundu yikulu pa lemba yili njakuti wuli? Kali asani munthurumi wakhumba kuto, wakhumbikanga kujifumba kuti, ‘Kumbi nde wakunozgeka kuphwere ndi kovya munthukazi kweniso ŵana wo ndingazija nawu?’ Iyu wakhumbikanga dankha kugwira nchitu ndi kuphwere munda ndipuso mbewu zo walima. Fundu yeniyi yigwira so nchitu mazuŵa nganu. Munthu yo wakhumba kuto, wakhumbika kunozgeke udindu wo wazamuja nawu. Asani we ndi nthazi watenere kugwira nchitu. Mazu ngaku Chiuta ngakamba kuti munthu yo waleka kuphwere banja laki mwakuliŵavu, mwauzimu ndipuso waleka kuziŵa masuzgu ngo banja laki likumana nangu, waja muheni kuruska munthu yo walivi chivwanu.Ŵerengani 1 Timote 5:8.

15 Munthukazi yo wakhumba kuyirwa nayu watenere kunozgeke maudindu ngakulungakulu ngo wazamuja nangu m’banja. Bayibolo likonkhoska nchitu ndi mijalidu yinyaki yo munthukazi wakhumbika kuja nayu kuti wawovyi murumu waki ndipuso kuphwere nyumba yaki. (Nthanthi 31:10-31) Anthurumi ndi anthukazi wo achimbiriya ŵaka nthengwa kwambula kunozgeke maudindu ngo azamukuŵa nangu m’banja, mbambunu, chifukwa chakuti aziŵa cha vo angazichitiya munthu yo atoranengi nayu. Chinthu chakukhumbika ukongwa ku ŵanthu  wo akhumba kutorana nchakuti, atenere kunozgeke kugwiriskiya nchitu fundu zaku Chiuta m’banja lawu.

16, 17. Kumbi wo akhumba kuto pamwenga kuyirwa atenere kuŵanaŵaniya fundu za m’Malemba nizi?

16 Kunozgeke nthengwa kusazgapu kuŵanaŵaniya maudindu ngo Chiuta wakupaska munthurumi ndi munthukazi. Munthurumi wakhumbika kuziŵa vo kuja mutu wabanja lachikhristu kung’anamuwa. Udindu wenuwu ung’anamuwa kuti munthurumi wachitiyengi munthukazi nkhaza cha. M’malu mwaki, iyu watenere kuyezga mo Yesu wachitiya umutu waki. (Ŵaefesu 5:23) Munthukazi wachikhristu nayu wakhumbika kuziŵa udindu wo munthukazi we nawu m’banja. Kumbi iyu wazamuvwiya “dangu la murumu waki”? (Ŵaroma 7:2) Munthukazi we kali pasi pa dangu laku Yehova ndi Khristu. (Ŵagalatia 6:2) Udindu wo murumu waki we nawu m’banja ndi dangu so linyaki. Kumbi iyu wangawovya ndi kuvwiya udindu wa murumu waki yo ndi munthu wambula kufikapu? Asani wawona kuti wangafiska cha, mbwenu wangachita umampha kuleka kuyirwa.

17 Mwaviyo, weyosi watenere kunozgeke kuphwere vo munyaki wazamukhumbika. (Ŵerengani Ŵafilipi 2:4.) Paulo wangulemba kuti: “Yumoza ndi yumoza, yosi wamwanjengi viyo muwolu waki waku yija nge ndi yija; ndipu muwolu wopi murumu waki.” Chiuta wangovya Paulo kuziŵa kuti cho munthurumi wakhumba ukongwa, nkhutumbikika ndi muwolu waki. Munthukazi nayu wakhumbisiska kwanjika ndi murumu waki.Ŵaefesu 5:21-33.

Pa nyengu ya chibwezi, ŵanthu anandi asankha munthu wakuŵaperekeza

18. Nchifukwa wuli ŵanthu wo ŵe pa chibwezi akhumbika kujiko?

18 Nyengu ya chibwezi njakuseŵe cha, kweni ndi nyengu yakuti munthurumi ndi munthukazi aziŵani umampha kuti awoni asani mbakwenere kutorana. Kweniso ndi nyengu yakuti asambiri kujiko chifukwa weyosi wakhumba kulongorana chanju ndi munthu yo wakopeka nayu, ndipu nkhwambula kusuzga kuti ŵanthu wo ŵe pa chibwezi alongorani chanju cho nchakwenere ŵanthu wo akutorana pe. Chinanga kuti vingaŵa viyo, ŵanthu wo atanjana nadi atcheŵa ndi vinthu vo vingatimbanyizga umoyu wauzimu wa munthu yo atanja. (1 Ŵatesalonika 4:6) Mwaviyo, asani mwe ndi chibwezi, mujikongi ndipu jalidu  lenili likuwovyeningi pa umoyu winu wosi, kaya mutoranengi pamwenga cha.

KUMBI MUNGACHITA WULI KUTI NTHENGWA YINU YIJE YAKUKHO?

19, 20. Kumbi Mkhristu watenere kuyiwona wuli nthengwa mwakupambana ndi mo ŵanthu anandi atiyiwone mazuŵa nganu? Konkhoskani.

19 Kuti ŵanthu aje ndi nthengwa yakukho akhumbika kuziŵa kuzirwa kwa phanganu la nthengwa. Kukamba uneneska, nthengwa mphakumaliya pa vinthu cha kweni nkhwamba kwa chinthu cho Yehova wakuchipanga kuti chije kwa nyengu yosi. (Chiyambo 2:24) Chakupaska chitima nchakuti ŵanthu anandi mazuŵa nganu awona viyo cha. Ŵanthu anyaki akamba kuti nthengwa ye nge vingwi viŵi vo avimanga pamoza. Nyengu zinyaki yiwu aziŵa cha kuti vo ayeruzgiya, vikoliyana ndi mo ŵanthu anandi awone nthengwa. Nchifukwa wuli tikamba viyo? Chinanga kuti vingwi vo vamangika vikhumbika cha kufwatuka bwekabweka kweni vingamangika ndi kufwatulika mwambula kusuzga.

20 Ŵanthu anandi mazuŵa nganu awona kuti nthengwa nchinthu chambula kujaliska. Yiwu ayirwa pamwenga kuto ndi maŵanaŵanu ngakuti amusaniya venivo akhumba m’nthengwa ndipu aŵanaŵana so kuti amumaliska nthengwa asani achikumana ndi masuzgu. Kumbukani chakuyeruzgiyapu cha chingwi cho Bayibolo ligwiriskiya nchitu pa nkhani ya nthengwa. Vingwi vo amangiya sitima vija vakukho ukongwa, ndipu vidumuka cha chinanga kungaŵa chimphepu chikulu. Mwakuyana ŵaka, ŵanthu akutorana atenere kukunthiyapu. Kumbukani mazu ngaku Yesu ngakuti: “Chenicho Chiuta wamangirizga pamoza munthu wangafwatuwanga cha.” (Mateyu 19:6) Asani mukhumba kuto pamwenga kuyirwa mutenere kuwona nthengwa nge mo Yesu wayiwoniyanga. Kumbi mapanganu nga nthengwa ngachitiska kuti nthengwa yije mphingu? Awa.

21. Kumbi ŵanthu akutorana atenere kuja ndi maŵanaŵanu wuli, nanga nchinthu wuli cho chingaŵawovya kuchita viyo?

21 Munthurumi ndi munthukazi atenere kulutirizga kuwonana mwakwenere. Asani weyosi watesesa kuwona mijalidu yamampha  mwa munyaki, nthengwa yawu yingaja yakukondweska ndipuso yakusisipuwa. Kumbi nkhwakusuzga kuwona vinthu vamampha mu murumu winu pamwenga muwolu winu wambula kufikapu? Yehova wawona vamampha pe mwaku isi, ndichu chifukwa chaki watitiwona mwakwenere. Wakulemba sumu wangufumba kuti: “Asani imwi mwasunganga mauheni ngidu, mphanyi ndiyani yo watingi wamengi Ambuya?” (Sumu 130:3) Munthurumi ndi munthukazi atenere kuwonana mwakwenere ndipuso atenere kugowokiyana.Ŵerengani Ŵakolose 3:13.

22, 23. Kumbi Abrahamu ndi Sara akulongo chakuwoniyapu wuli ku ŵanthu akutorana mazuŵa nganu?

 22 Asani ŵanthu akutorana akunthiyapu kwa vyaka vinandi, nthengwa yawu yingaja yakukondweska ndipuso angasaniya vitumbiku vinandi. Bayibolo lititikonkhoske vakukwaskana ndi nthengwa yaku Abrahamu ndi Sara pa nyengu yo ŵenga akukota. Nawuso akumananga ndi masuzgu nganandi pa umoyu wawu. Ŵanaŵaniyani Sara yo wenga ndi vyaka va m’ma 60. Iyu wangusiya nyumba yamampha m’msumba wa Uru ndi kuchija m’mahema umoyu waki wosi. Chinanga kuti venga viyo, iyu wanguvwiya murumu waki. Nge wakovya Abrahamu, Sara wawovyanga murumu waki mwaulemu kuti vo wasankha vifiskiki. Iyu wenga wakujithereska ku murumu waki. Chinanga ndi “mu mtima” mwaki wadananga Abrahamu kuti mbuyaki. (Chiyambo 18:12; 1 Petro 3:6) Iyu watumbikanga Abrahamu kutuliya pasi pa mtima.

23 Chinanga kuti venga viyo, Abrahamu ndi Sara nyengu zosi awonanga vinthu mwakuyanana cha. Nyengu yinyaki Sara wangukamba vinthu vo vinguchitiska kuti Abrahamu ‘wakaripi.’ Kweni Yehova wati wamulongozga, Abrahamu wangujiyuyuwa ndipu wanguvwiya vo muwolu waki wangukamba, ivi vinguchitiska kuti banja lawu litumbikiki. (Chiyambo 21:9-13) Ŵanthu wo aja m’nthengwa kwa vyaka vinandi ndipuso chinanga ndi wo atorana ŵaka sonu, angasambira vinandi kutuliya ku banja lenili lo lawopanga Chiuta.

24. Kumbi ndi nthengwa nizi zo zitumbika Yehova Chiuta, nanga nchifukwa wuli?

24 Mumpingu wachikhristu, mwe masauzandi nganandi nga ŵanthu akutorana wo ŵe ndi likondwa m’mabanja ngawu chifukwa anthukazi atumbika ukongwa arumu ŵawu ndipuso anthurumi atanja ndi kutumbika awolu ŵawu, kweniso wosi achitiya vinthu limoza kuti aŵiki khumbu laku Yehova panthazi pa umoyu wawu. Asani mukhumba kuto pamwenga kuyirwa, mutenere kusankha mwazeru munthu yo mukhumba kutorana nayu, mukhumbika so kunozgeke umampha ndipuso yesesani kuti m’nthengwa yinu mukaje chimangu ndi chanju ndi chilatu chakuti nthengwa yo yikatumbiki Yehova Chiuta. Asani mungachita viyo, nthengwa yinu yakukuwovyani kulutirizga kuja m’chanju chaku Chiuta.

^ ndimi 11 Wonani Mutu 2, m’buku la Chinsinsi cha Chimwemwe cha Banja, lakupharazgika ndi Akaboni aku Yehova.

^ ndimi 12 Ŵanthu akugomezgeka akali nge Abrahamu ndi Yakobe atonga muta. M’nyengu yakali kweniso ya Ayisraele, Yehova wanguzomerezga kuti ŵanthu atongi muta. Ndi Yehova cha yo wangwambiska muta, kweni wanguwuzomerezga ŵaka. Chinanga kuti ve viyo, Akhristu aziŵa kuti Yehova wazomerezga so cha kuti ateŵeti ŵaki atongi muta.Mateyu 19:9; 1 Timote 3:2.

Ziŵani Vinandi

CHIGONGWI CHA ALINDA—CHAKUSAMBIRA

Jani ndi Nthengwa Yakukho Ndipuso Yalikondwa

Mugwiriskiyengi nchitu vinthu vinkhondi kuti nthengwa yinu yije yakukho ndipuso yalikondwa.