Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

“Mujisungi mu Chanju Chaku Chiuta”

 FUNDU ZAKUKUMALIYA

Kumbi Mphavakuchitika Nivi po Munthukazi Watenere Kuvwala Chinthu Kumutu, Nanga Nchifukwa Wuli?

Kumbi Mphavakuchitika Nivi po Munthukazi Watenere Kuvwala Chinthu Kumutu, Nanga Nchifukwa Wuli?

Kumbi mphavakuchitika nivi po munthukazi wachikhristu wakhumbika kuvwala chinthu kumutu, nanga nchifukwa wuli? Tiyeni tikambiskani fundu zo wakutumika Paulo wangukambirika kulemba pa nkhani yeniyi. Iyu wangupereka ulongozgi wo ungatiwovya kuti vo tisankha pa nkhani iyi viperekengi ulemu kwaku Chiuta. (1 Ŵakorinte 11:3-16) Paulo wangukonkhoska fundu zitatu zo zingachitiska kuti munthukazi wavwali chinthu kumutu nge: (1) vakuchitika, (2) malu ngo watenere kuchitiya viyo ndipuso (3) chilatu chaki.

Vakuchitika. Paulo wakukamba vakuchitika viŵi, rombu ndi kutawula. (Vesi 4, 5) Kuromba ndi nthowa yakulongolore ndi Yehova. Mazuŵa nganu kutawula kungamiya nchitu ya kusambiza Bayibolo yo ateŵeti achikhristu achita. Kumbi Paulo wang’anamuwanga kuti munthukazi watenere kuvwala chinthu kumutu nyengu yeyosi asani waromba pamwenga kusambiza Bayibolo? Awa. Malu ngo munthukazi warombe pamwenga kusambiziya ndingu ngangachitiska kuti wavwali chinthu kumutu pamwenga cha.

Malu. Vo Paulo wangulemba vilongo kuti m’banja ndipuso mumpingu ndimu munthukazi wachikhristu watenere kuvwala  chinthu kumutu pa vakuchitika vinyaki. Iyu wakukamba kuti: “Mutu wa munthukazi ndi murumu [waki] . . . munthukazi yosi, mweniyo waromba pamwenga watawula ndi mutu waki wambula kufukika [kuvwala chinthu], walengeska mutu waki.” (Vesi 3,5) Munthurumi ndiyu wapaskika udindu wakuja mutu wabanja. Munthukazi wakhumbika kutumbika udindu wenuwu chifukwa asani waleka kuchita viyo wayuyuwa murumu waki. Mwakuyeruzgiyapu, asani munthukazi wachitiska sambiru la Bayibolo pe murumu waki, iyu wangalongo kuti watumbika udindu wa murumu waki asani wavwala chinthu kumutu. Iyu watenere kuchita viyo kaya murumu waki ngwakubatizika pamwenga cha, chifukwa munthurumi ndiyu mutu wabanja. * Asani munthukazi wakhumba kuromba pamwenga kusambiza pe mwana waki munamana munthurumi yo wakubatizika, watenere kuvwala chinthu kumutu chifukwa chakuti ndi mutu wabanja cha, kweni chifukwa cha udindu wo ukuperekeka kwa anthurumi wosi wo Mbakhristu akubatizika.

Pa vakuchitika va mpingu, Paulo wangukamba so kuti: “Asani yumoza wachita suskanu pakukhumba kususka ŵaka, tilivi isi kalusu kaviyo, chinanga ndi mumipingu yaku Chiuta.” (Vesi 16) Mumpingu wachikhristu, udindu upaskika kwa anthurumi akubatizika. (1 Timote 2:11-14; Ŵahebere 13:17) Anthurumi pe ndiwu aja ŵara pamwenga ateŵeti akovya mumpingu ndipu Chiuta waŵapaska udindu wakuphwere mskambu waki. (Machitidu 20:28) Nyengu zinyaki, munthukazi wachikhristu wangagwira nchitu yakwenere kugwirika ndi m’bali wakubatizika ndipuso wakwenere. Mwakuyeruzgiyapu, wangakhumbika kuchitiska unganu wakunozgeke uteŵeti wakumunda asani palivi m’bali wakwenere yo wangachitiska. Pamwenga asani muzichi wachitiska sambiru la Bayibolo pe munthurumi wakubatizika. * Chifukwa chakuti nchitu izi zakukwaskana ukongwa ndi vakuchitika va mpingu wachikhristu, iyu wakhumbika kuvwala chinthu kumutu kulongo kuti waziŵa kuti nchitu yo wachita yikuperekeka kwa anthurumi.

 Pe vakuchitika vinandi vakukwaskana ndi kusopa vo munthukazi wakhumbika cha kuvwala chinthu kumutu. Mwakuyeruzgiyapu, munthukazi wakhumbika cha kuvwala chinthu kumutu asani wamuka pa maunganu nga mpingu, wapharazga kunyumba ndi nyumba ndi murumu waki pamwenga m’bali munyaki wakubatizika ndipuso asani waromba ndi ŵana ŵaki ambula kubatizika. Nyengu zinyaki munthukazi wangakayikiya pa vakuchitika vinyaki asani nkhwakwenere kuvwala chinthu kumutu pamwenga cha, asani ve viyo watenere kufufuza m’mabuku ngidu. * Asani wakayikiya mbwenu ndipu njuŵi yaki yitimutuma kuti wavwali chinthu kumutu, wangananga cha asani wangachita viyo nge mo chithuzi chalongore.

Chilatu. Pavesi 10 tisaniya vifukwa viŵi vo munthukazi wachikhristu watenere kuchitiya viyo. Vesi lo likamba kuti: “Munthukazi watenere kufukika mutu waki [“kulongo kuti watumbika udindu,” NW], pa chifukwa cha angelu.” Chakwamba, wonani mazu ngakuti “kulongo kuti watumbika udindu.” Kuvwala chinthu kumutu ndi nthowa yo munthukazi walongore kuti waziŵa udindu wo Yehova wakupaska anthurumi wosi akubatizika mumpingu. Mwaviyo, walongo kuti watanja Yehova Chiuta ndipuso ngwakugomezgeka. Chachiŵi, chisanirika m’mazu ngakuti “chifukwa cha angelu.” Kumbi vakulengeka vanthazi vauzimu vikwaskika wuli asani munthukazi wavwala chinthu kumutu?

Angelu akondwa kuwona kuti gulu losi laku Yehova, lakuchanya ndi la pacharu chapasi litumbika Chiuta. Angelu nawu ayanduwa ndi chakuwoniyapu chamampha cho ŵanthu ambula kufikapu alongo pa nkhani yeniyi. Nawuso akhumbika kuvwiya Yehova, chifukwa angelu anyaki angutondeka kuchita viyo. (Yuda 6) Angelu angakondwa kuwona munthukazi wachikhristu yo waja wachiteŵete Yehova kwa nyengu yitali, waziŵa vinthu  vinandi ndipuso ngwazeru ukongwa kuphara m’bali wakubatizika m’mpingu kweni walongo kuti watijithereska ku udindu wo m’bali yo wenawu. Anthukazi anyaki mbakusankhika kuti akawusiyi limoza ndi Khristu kuchanya ndipu wenuwu mbudindu ukulu kuphara wo angelu ŵenawu. Anthukazi aviyo nchakuwoniyapu chamampha ukongwa kwa angelu mazuŵa nganu. Anthukazi wosi achikhristu ŵe ndi mwaŵi ukulu ukongwa wakulongo kuti avwiya asani agomezgeka ndipuso atijithereska pa masu pa angelu akugomezgeka mamiliyoni nganandi.

^ ndimi 5 Munthukazi wachikhristu watenere cha kuromba mwakukwezga mazu asani pe murumu waki wakubatizika, kupatuwaku asani murumu waki watondeka kulongoro chifukwa cha matenda.

^ ndimi 6 Muzichi wakhumbika cha kuvwala chinthu kumutu asani wachitiska sambiru la Bayibolo pe munthurumi wambula kubatizika yo ndi murumu waki cha.

^ ndimi 7 Kuti muziŵi vinandi, wonani Chigongwi cha Alinda cha Chichewa cha July 15, 2002, peji 26-27 ndi cha November 15, 2009, peji 12-13.