Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 116: Vo Tingachita Kuti Tizilonde Umoyu Wamuyaya

Nkhani 116: Vo Tingachita Kuti Tizilonde Umoyu Wamuyaya

KUMBI ungakamba vo kamsungwana yaka ndi anyaki yaŵa aŵerenga? Yiwu aŵerenga buku lenili uŵerenga iwi, lakuti: Buku Langu la Nkhani za m’Bayibolo. Ndipu nawu aŵerenga nkhani yeniyi uŵerenga iwi yakuti “Vo Tingachita Kuti Tizilonde Umoyu Wamuyaya?”

Mwana waŵerenga

Kumbi waviziŵa vo yiwu asambira? Chakwamba, yiwu asambira kuti titenele kuziŵa zaku Yehova ndi Mwana waki Yesu kuti tizije ndi umoyu wamuyaya. Bayibolo likamba kuti: ‘Kuti muzije ndi umoyu wamuyaya, mutenele kusambira zaku Chiuta yumoza pe wawuneneska ndi za Mwana yo iyu wangutuma pacharu, Yesu Khristu.’

Kumbi tingasambira wuli zaku Yehova Chiuta ndi Mwana waki Yesu? Nthowa yakwamba nkhuŵerenga Buku Langu la Nkhani za m’Bayibolo kutuwa kukwamba mpaka kukumaliya. Ilu likonkhoska vinandi vakukwaskana ndi Yehova ndi Yesu. Kweniso likonkhoska vinthu vinandi vo yiwu akuchita ndipuso vo azamuchita. Kweni kusazgiya pa kuŵerenga buku ili, titenele so kuchita vinandi.

Bayibolo

Kumbi waliwona buku linyaki lo le pasi po? Buku ili ndi Bayibolo. Upemphi munthu munyaki kuti wakuŵerenge vigaŵa vinyaki va m’Bayibolo, mo mwatuwa nkhani za m’buku ili. Bayibolo le ndi fundu zosi zakovya kuti isi titeŵete umampha Yehova kweniso kuti tizilonde umoyu wamuyaya. Sonu titenele kuŵerenga Bayibolo nyengu zosi.

Kweni kusambira waka zaku Yehova Chiuta ndi Yesu Khristu nkhakukwana cha. Tikhoza kuziŵa vinthu vinandi vakukwaskana ndi yiwu ndipuso visambizu vawu, kweni umoyu wamuyaya tingatondeka kuziwulonde. Sonu kumbi waviziŵa vinyaki vo vikhumbika?

Umoyu widu utenele kukoliyanaku ndi vo tisambira. Kumbi utimukumbuka Yuda mKeriote? Iyu wenga yumoza wa ŵanthu 12 wo Yesu wangusankha kuŵa akutumika ŵaki. Yuda waziŵanga vinthu vinandi vakukwaskana ndi Yehova kweniso Yesu. Kweni nchinthu wuli cho chingumuchitikiya? Iyu wangwamba mtima wambunu ndipu wanguguliska Yesu kwa arwani ŵaki ndi ndalama 30 zasiliva. Sonu Yuda wazamulonde cha umoyu wamuyaya.

Kumbi utimukumbuka Gehazi, yo tikumusambira mu Nkhani ya nambala 69? Iyu wakhumbanga vakuvwala ndi ndalama zo zenga zaki cha. Sonu wangupusika boza kuti wapaskiki vinthu ivi. Kweni Yehova wangumulanga. Ndipu Yehova wazakutilanga so isi asani tileka kuvwiya malangu ngaki.

Kweni pe ŵanthu anandi amampha wo nyengu zosi ateŵetiyanga Yehova mwakugomezgeka. Isi nasi tikhumba kuŵa ngati yiwu, asi viyo? Samuele nchakuwoniyapu chamampha cho titenele kulondo. Kumbuka kuti mu Nkhani ya nambala 55, tingusambira kuti iyu wangwamba kuteŵete pa chihema chaku Yehova we ndi vyaka vinayi pamwenga vinkhondi. Sonu kwali iwi we ndi vyaka vilinga, ivi ving’anamuwa kuti weche munamana cha kuti uyambi kuteŵete Yehova.

Hinya, tosi tikhumbika kulondo Yesu Khristu. Nge mo tikusambiriya mu Nkhani ya nambala 87, kuti chinanga iyu wenga weche mwana, panyengu yo wenga m’nyumba yakusopiyamu, wakambiyanga ŵanthu zakukwaskana ndi Awiski a kuchanya. Nasi tilondongi vo iyu wachitanga. Titenere kukambiya ŵanthu anandi wo tingafiska, zakukwaskana ndi Chiuta widu wamampha Yehova kweniso Mwana waki, Yesu Khristu. Asani tichitengi vinthu ivi, tikhoza kuzija ndi umoyu wamuyaya m’paradayisu waku Chiuta panu pacharu.

Yohane 17:3; Sumu 145:1-21.



Mafumbu

  • Kumbi nchinthu wuli cho titenele kuziŵa kuti tizije ndi umoyu wamuyaya?
  • Nge mo msungwana ndi anyaki wo achitiya pachithuthuzi po, kumbi tingasambira wuli zaku Yehova Chiuta ndi Yesu?
  • Kumbi ndi buku linyaki nili lo uwona pachithuthuzi, nanga nchifukwa wuli titenele kuliŵerenga pafupipafupi?
  • Kusazgiyapu pakusambira zaku Yehova ndi Yesu, nchinthu wuli chinyaki cho chikhumbika kuti tizisaniyi umoyu wamuyaya?
  • Kumbi tisambiranji mu Nkhani ya nambala 69?
  • Kumbi chakuwoniyapu chamampha chaku Samuele cho che mu Nkhani ya nambala 55 chilongonji?
  • Kumbi tingalondo wuli chakuwoniyapu chaku Yesu Khristu, nanga asani tingachita viyo, nchinthu wuli cho tingakhoza kuzichita munthazi?

Mafumbu ngakusazgiyapu

  • Ŵerenga Yohane 17:3.

    Kumbi Malemba ngalongo wuli kuti kuziŵa zaku Yehova Chiuta ndi Yesu Khristu, kung’anamuwa vinandi kuluska kusunga waka fundu pamtima? (Mate. 7:21; Yako. 2:18-20; 1 Yoha. 2:17)

  • Ŵerenga Sumu 145:1-21.

    Kumbi tendi vifukwa vinyaki nivi vo tingalumbiya Yehova? (Sumu 145:8-11; Chivu. 4:11)

    Kumbi Yehova ‘ngwamampha kwaku wosi’ munthowa wuli, nanga venivi vititiwovya wuli kundele kufupi ukongwa ndi yiyu? (Sumu 145:9; Mate. 5:43-45)

    Asani titimwanja Yehova, kumbi tikhumbisiskengi kuchitanji? (Sumu 119:171, 172, 175; 145:11, 12, 21)