KUMBI uwonanji pachithuthuzi ichi? Ili ndi gulu lankhondu ndipu lakwera pa mahachi ngatuŵa. Kweni awona ko mahachi yanga ngatuliya. Yingu ngatchimbiya mu mtambu kutuliya kuchanya kuza pacharu chapasi. Kumbi kuchanya kwe mahachi nadi?

Yesu nge Fumu kuchanya

Awa, yanga ndi mahachi chayingu cha. Tiziŵa ivi chifukwa chakuti mahachi chayingu ngangatchimbiya cha mu mtambu, asi viyo? Kweni Bayibolo likonkhoska za mahachi ngakuchanya. Kumbi utichiziŵa chifukwa chaki?

Nchifukwa chakuti kali ŵanthu agwiriskiyanga nchitu ukongwa mahachi pankhondu. Sonu Bayibolo likamba za ŵanthu wo akwera pa mahachi kutuwa kuchanya kuza pacharu, kulongo kuti Chiuta wazamuchita nkhondu ndi ŵanthu pacharu. Kumbi utiliziŵa zina la malu nga nkhondu iyi? Ndi Haramagedone. Nkhondu iyi yazamutuzgapu uheni wosi pacharu chapasi.

Yesu ndiyu wazamuja mulongozgi wa nkhondu iyi pa Haramagedone. Kumbuka kuti Yehova wakusankha Yesu kuja fumu ya boma laki. Ndichu chifukwa chaki Yesu wavwala chisoti chachifumu. Ndipu lipanga lo, lilongo kuti iyu wazamubaya arwani ŵaku Chiuta wosi. Sonu kumbi titenele kuzizwa kuti Chiuta wazamubaya ŵanthu wosi aheni?

Jula Nkhani ya nambala 10. Kumbi uwonanji pachithuthuzi po? Uyu ndi Zandi mukulu yo wangubaya ŵanthu aheni. Kumbi ndiyani wanguchitiska Zandi uyu? Wenga Yehova Chiuta. Sonu jula Nkhani ya nambala 15. Kumbi nchinthu wuli chichitika yapa? Msumba wa Sodomu ndi wa Gomora utufya ndi motu wo Yehova wangutumiza.

Jula so Nkhani ya nambala 33. Awona vo vachitikiya mahachi ndi magareta ngankhondu nga Aegipiti. Kumbi ndiyani wanguchitiska kuti ngabiri m’maji? Wenga Yehova. Iyu wanguchita ivi kuti wavikiliyi ŵanthu ŵaki. Jula so Nkhani ya nambala 76. Ukhoza kuwona kuti Yehova wanguzomerezga kuti ŵanthu ŵaki Ayisraele, abayiki chifukwa cha uheni wawu.

Mwaviyo, isi tingazizwanga cha kuti Yehova wazamutuma gulu laki lankhondu lakuchanya kuti lizituzgepu uheni wosi pacharu chapasi. Kweni kuti uziŵi kuti ivi ving’anamuwanji, jula kuseri tiwoni.

Chivumbuzi 16:16; 19:11-16.



Mafumbu

  • Kumbi nchifukwa wuli Bayibolo likamba za mahachi nga kuchanya?
  • Kumbi nkhondu yaku Chiuta yo wazamukurwa ndi ŵanthu aheni pacharu chapasi yidanika kuti wuli, nanga chilatu cha nkhondu iyi nchakuti wuli?
  • Kumbi pachithuthuzi palongo kuti ndiyani yo wazamuja mulongozgi pankhondu iyi ndipu nchifukwa wuli iyu wavwala chisoti chachifumu, nanga lipanga laki limiyanji?
  • Asani ungawona so Nkhani ya nambala 10 ndi 15, nchifukwa wuli titenele cha kuzizwa kuti Chiuta wazamunanga ŵanthu aheni?
  • Kumbi Nkhani za nambala 3336 ndi 76, zititilongo wuli kuti Chiuta wazamunanga ŵanthu aheni chinanga wuli yiwu akamba kuti atimusopa?

Mafumbu ngakusazgiyapu

  • Ŵerenga Chivumbuzi 19:11-16.

    Kumbi Malemba ngalongo wuli kuti Yesu Khristu ndiyu wakwera pa hachi yituŵa? (Chivu. 1:5; 3:14; 19:11; Yesa. 11:4)

    Kumbi ndopa zo zikuwazika pa chakuvwala cha kubwalu chaku Yesu, zisimikizgiya wuli kuti kupunda kwaki nkhwakusimikizgika ndipuso wakumalizengi? (Chivu. 14:18-20; 19:13; Yesa. 63:1-6)

    Kumbi mbayani wo atenele kuti asazgikiyapu pa gulu la nkhondu lenilo lilondo Yesu pa hachi yaki yituŵa? (Chivu. 12:7; 19:14; Mate. 25:31, 32)