Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 110: Timote Wangwamba Kuwovya Paulo

Nkhani 110: Timote Wangwamba Kuwovya Paulo

MNYAMATA yo utimuwona we ndi wakutumika Paulo ndi Timote. Timote wajanga ku Lustra pamoza ndi awiski kweniso anyina. Anyina ŵenga a Enike ndipu ambuyaki ŵenga a Loisi.

Yaka sonu nkhachitatu kuti Paulo waluti ku Lustra. Pangujumpha pafupifupi chaka kutuliya po Paulo ndi Barnaba anguziya ku Lustra kakwamba kuzipharazga. Ndipu sonu Paulo wanguweriyaku ndi mubwezi waki Sila.

Timote ndi Paulo

Kumbi waviziŵa vo Paulo wakambiya Timote? Iyu watimufumba kuti: ‘Kumbi ungayanja kwende pamoza ndi ini kweniso Sila? Iwi wakutiwovya kuchipharazga ku ŵanthu a kuvigaŵa vakutali.’

Timote wangumuka kuti: ‘Hinya, ndilutengi.’ Sonu nyengu yeniyo, Timote wangulekana nawu apapi ŵaki ndipu wanguluta pamoza ndi Paulo kweniso Sila. Kweni techendasambiri za ulendu wawu, tiyi tiwoni dankha vo vingumuchitikiya Paulo. Yapa ndipu pajumpha vyaka pafupifupi 17 kutuliya po Yesu wangumuwoneke panthowa ya kuluta ku Damasko.

Kumbuka kuti Paulo wanguza ku Damasko kuti wakabayi akusambira aku Yesu, kweni sonu iyu ndiyu wanguja wakusambira waku Yesu. Pavuli paki, arwani anyaki akhumbanga kubaya Paulo chifukwa akhumbanga cha kuti iyu wasambizengi vakukwaskana ndi Yesu. Kweni akusambira aku Yesu angumuwovya Paulo kuti wathaŵi. Yiwu angumuŵika m’chiteti ndipu angumutuzgiya kubwalu kwa mpanda wa msumba.

Pavuli paki Paulo wanguluta ku Antioke kuchipharazga. Uku ndiku akulondo aku Yesu angwamba kudanika kuti Akhristu. Sonu Paulo ndi Barnaba angutumika kutuwa ku Antioke kuchipharazga ku vyaru va kutali. Umoza wa misumba yo anguchifikaku wenga Lustra ko Timote wajanga.

Pati papita pafupifupi chaka chimoza, Paulo wanguluta ku Lustra kachiŵi. Kumbi waziŵaku ko Timote, Paulo ndi Sila anguluta ŵati atuwa ku Lustra? Tiyi tiwoni pamapu kuti tiziŵi malu ngo yiwu angulutaku.

Chakwamba yiwu anguluta ku Ikonio ndipu pavuli paki anguluta ku msumba wa Antioke. Ŵati atuwa uku, anguluta ku Troa, Filipi, Tesalonika ndi ku Berea. Kumbi wachiwona charu cha Athene pamapu po? Paulo wanguchipharazga so kweniko. Pavuli paki, angumala chaka chimoza ndi myezi 6 achipharazga mu Korinte. Ndipu pakumaliya anguzipumuwa kamanavi waka ku Efeso. Ŵati atuwa ku Efeso, angukwera boti kuwere ku Kaisarea ndipu anguchifika ku Antioki ko Paulo wajanga.

Sonu Timote wangwenda mitunda yitali ukongwa wachiwovya Paulo kupharazga “uthenga wamampha” ndi kwambiska mipingu yinandi yachikhristu. Kumbi nawi asani wakuwa, wazamuja muteŵeti waku Chiuta wakugomezgeka nge Timote?

Machitidu 9:19-30; 11:19-26; machaputala 13 mpaka 17; 18:1-22.

Map

1. Roma; 2. Malta; 3. Berea; 4. Tesalonika; 5. Korinte; 6. Filipi; 7. Athene; 8. Krete; 9. Troa; 10. Efeso; 11. Mileto; 12. Kolose; 13. Antioke; 14. Ikonio; 15. Lustra; 16. Kupro; 17. Antioke; 18. Kaisarea; 19. Yopa; 20. Damasko; 21. Yerusalemu; 22. Nyanja Yikulu (Meditereniyani)



Mafumbu

  • Kumbi mnyamata yo we pachithuthuzi ndiyani ndipu wajanga pani, nanga anyina ndi ambuyaki ŵenga ayani?
  • Kumbi Timote wangumukanji Paulo wati wamufumba kuti wayende pamoza ndi iyu kweniso Sila pa nchitu yakuchipharazga ku ŵanthu a kuvigaŵa vakutali?
  • Kumbi ndi nunkhu ko akulondo ŵaku Yesu angwamba kudanika kuti Akhristu?
  • Kumbi Paulo ndi Barnaba anguluta ku misumba niyi ŵati atuwa ku Antioke?
  • Kumbi Timote wangumuwovya wuli Paulo, nanga ndi fumbu nili lo achinyamata atenele kujifumba mazuŵa nganu?

Mafumbu ngakusazgiyapu

  • Ŵerenga Machitidu 9:19-30.

    Kumbi wakutumika Paulo wangulongo wuli kuti wenga ndi zeru wati wakumana ndi ŵanthu akususka uthenga wamampha? (Machi. 9:22-25, 29, 30; Mate. 10:16)

  • Ŵerenga Machitidu 11:19-26.

    Kumbi nkhani yo ye pa Machitidu 11:19-21, 26, yilongo wuli kuti mzimu waku Yehova ndiwu uvikiliya ndi kulongozga nchitu yakupharazga?

  • Ŵerenga Machitidu 13:13-16, 42-52.

    Kumbi lemba la Machitidu 13:51, 52, lilongo wuli kuti akusambira anguzomerezga cha kuti ŵanthu akususka aŵagongoweski? (Mate. 10:14; Machi. 18:6; 1 Pet. 4:14)

  • Ŵerenga Machitidu 14:1-6, 19-28.

    Kumbi mazu ngakuti ‘anguŵaseserekezga kwaku Yehova kuti waŵaphwere,’ ngatitiwovya wuli kuti tileki kudandawula mwambula kwenele asani tiwovya ŵanthu wo asambira sonu uneneska? (Machi. 14:21-23; 20:32; Yoha. 6:44)

  • Ŵerenga Machitidu 16:1-5.

    Kumbi kujipereka kwaku Timote kuti amudumuwi kulongo wuli kukhumbika kwa kuchita ‘vosi chifukwa cha uthenga wamampha’? (Machi. 16:3; 1 Ŵako. 9:23; 1 Ŵatesa. 2:8)

  • Ŵerenga Machitidu 18:1-11, 18-22.

    Kumbi lemba la Machitidu 18:9, 10, lilongo wuli mo Yesu wangujipereke pa kulongozga nchitu yakupharazga, nanga ivi vititipaska chigomezgu wuli mazuŵa nganu? (Mate. 28:20)