Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 109: Petro Wakumana ndi Kornelio

Nkhani 109: Petro Wakumana ndi Kornelio

YO WAMA po ngwakutumika Petro ndipu wo ŵe kuvuli kwaki mbanyaki. Kumbi nchifukwa wuli munthu yo wagwadiya Petro? Kumbi iyu wakhumbika kuchita viyo? Kumbi munthu yo wagwada wamuziŵa kuti ndi yani?

Petro wakumana ndi Kornelio

Munthu uyu ndi Kornelio. Iyu ndi mula wa asilikali a ku Roma. Kornelio wamuziŵanga cha Petro, kweni wangutumika kuti wadaniyi Petro kunyumba kwaki. Tiyi tiwoni mo ivi vinguchitikiya.

Ayuda ndiwu ŵenga akulondo akwamba aku Yesu, kweni Kornelio wenga m’Yuda cha. Kweni iyu wayanjanga Chiuta, warombanga kwaku Iyu, kweniso wachitiyanga ŵanthu vinthu vinandi vamampha. Zuŵa linyaki ndi msana, m’ngelu wangumuwoneke ndipu wangumukambiya kuti: ‘Chiuta wakondwa nawi ndipu wamukengi marombu ngaku. Sonu tuma ŵanthu kuti akadani munthu munyaki zina laki Petro. Iyu waja ku Yopa, m’nyumba yaku Simoni yo waja kufupi ndi nyanja.’

Nyengu yeniyo, Kornelio wangutuma ŵanthu kuti akapenji Petro. Mawa laki, ŵanthu yaŵa ŵe pafupi kufika ku Yopa, Petro wangukwera pachanya pa nyumba yaku Simoni. Ndipu Chiuta wanguchitiska Petro kuŵanaŵana kuti wawonanga salu yikulu yo yatuwanga kuchanya. Pasalu yo pawonekanga nyama za mitundu yosi. Kweni mwakuyana ndi malangu ngaku Chiuta, nyama izi zenga zambula kwenere kurya, kweni iyu wanguvwa mazu ngakuti: ‘Soka Petro. Baya ndipu uryi.’

Petro wangumuka kuti: ‘Awa, ndechendaryepu chinthu chakufipiskika.’ Kweni wanguvwa so mazu ngakuti: ‘Leka kudana vinthu vo Chiuta wavitozga sonu kuti vakufipiskika.’ Ivi vinguchitika katatu. Ndipu Petro weche kuŵanaŵana cho vinthu ivi vang’anamuwanga, ŵanthu wo angutumika ndi Kornelio angufika ndipu angufumba zaku Petro.

Petro wangusikiya pasi ndipu wangukamba kuti: ‘Munthu yo mupenja, ndini. Mwapukwanji?’ Ŵanthu wo ŵati akonkhoska kuti m’ngelu wangukambiya Kornelio kuti wadaniyi Petro kunyumba kwaki, Petro wanguzomera kuti walutengi nawu. Mlenji waki, Petro ndi anyaki anguluta ku Kaisarea kwaku Kornelio.

Kornelio wanguwunganiska abali ŵaki ndi mabwezi ngaki ngapamtima. Petro wati waza, wangukumana ndi Kornelio. Iyu wangugwada pamalundi ngaku Petro, nge mo utimuwone yapa. Kweni Petro wangumukambiya kuti: ‘Soka, ini nani nde munthu waka.’ Ndichu chifukwa chaki Bayibolo likamba kuti nkhunanga kugwadiya ndi kusopa munthu. Kweni titenere kusopa Yehova pe.

Sonu Petro wangwamba kupharazgiya ŵanthu wo anguwungana. Iyu wanguti: ‘Ndawona kuti Chiuta walonde ŵanthu wosi wo akhumba kumuteŵete.’ Iyu weche kulongolo, Chiuta wangutumiza mzimu utuŵa ndipu ŵanthu angwamba kulongolo vineneru vakupambanapambana. Ivi vinguziziswa akusambira aku Yesu a Chiyuda wo anguza ndi Petro, chifukwa yiwu aŵanaŵananga kuti Chiuta watanja Ayuda pe. Sonu yapa angusambirapu kuti Chiuta wawona mtundu umoza wa ŵanthu kuti ngwakuzirwa kuphara mitundu yinyaki cha. Kumbi fundu iyi njamampha cha kuti tosi tiyikumbukengi?

Machitidu 10:1-48; 11:1-18; Chivumbuzi 19:10.



Mafumbu

  • Kumbi munthu yo wagwada pachithuthuzi po ndiyani?
  • Kumbi mungelu wangumukambiyanji Kornelio?
  • Kumbi Chiuta wanguchitiska kuti Petro wawonenji wati wakwera pachanya pa nyumba yaku Simone ku Yopa?
  • Kumbi nchifukwa wuli Petro wangukaniza Kornelio kumugwadiya ndi kumusopa?
  • Kumbi nchifukwa wuli akusambira a Chiyuda wo ŵenga ndi Petro anguzizwa?
  • Kumbi ndi sambiru lakuzirwa nili lo titenele kusambira pa ulendu waku Petro wakuluta kwaku Kornelio?

Mafumbu ngakusazgiyapu

  • Ŵerenga Machitidu 10:1-48.

    Kumbi mazu ngaku Petro ngo ngasanarika pa Machitidu 10:42, ngalongonji pankhani ya kupharazgika kwa uthenga wamampha wa Ufumu? (Mate. 28:19; Marko 13:10; Machi. 1:8)

  • Ŵerenga Machitidu 11:1-18.

    Kumbi Petro wangulongo mtima wuli wati waziŵa mo Yehova wawoniyanga ŵanthu amitundu yinyaki, nanga isi tingalondo wuli chakuwoniyapu chaki? (Machi. 11:17, 18; 2 Ŵako. 10:5; Ŵaefe. 5:17)