Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 108: Panthowa ya ku Damasko

Nkhani 108: Panthowa ya ku Damasko

KUMBI wamuziŵa yo wagona pasi po? Iyu ndi Saulo. Kumbuka kuti iyu ndiyu wangusunga mikhanju ya ŵanthu wo aponyanga mya Stefano. Awona ukweru wakuŵala ukongwa wo. Kumbi nchinthu wuli cho chichitika yapa?

Stefano wati wabayika, Saulo ndiyu wenga mulongozgi pakusaka akulondo aku Yesu kuti waŵabayi. Iyu wayendanga nyumba ndi nyumba ndipu waŵakonga ndi kuchiŵaŵika m’jeri. Akusambira anandi anguthaŵiya ku misumba yinyaki ndipu angwamba kupharazga “uthenga wamampha.” Kweni Saulo wanguluta so ku misumba yinyaki kuti wakasaniyi akulondo aku Yesu. Sonu yapa we paulendu wakuluta ku Damasko. Kweni iyu we munthowa, panguchitika chinthu chinyaki chakuziziswa.

Mwamabuchibuchi ukweru wakutuliya kuchanya unguŵaliya po penga Saulo. Iyu wanguwa pasi nge mo tiwone yapa. Pavuli paki kunguvwika mazu ngakuti: ‘Saulo, Saulo! Nchifukwa wuli utindisuzga?’ Ŵanthu wo ŵenga ndi Saulo anguwona ukweru ndipuso anguvwa mazu, kweni avwanga cha vo vakambikanga.

Sauli wanguja wachibulumutiya chifukwa cha ukweru

Saulo wangufumba kuti: ‘Ndimwi ayani, Ambuya?’

Kunguvwika so mazu ngakuti: ‘Ndini Yesu, mweniyo utimusuzga.’ Yesu wangukamba ivi chifukwa chakuti Saulo wachisuzga akulondo ŵaki, Yesu wavwanga nge kuti wasuzga iyu.

Sonu Saulo wangufumba kuti: ‘Ndichitenji Ambuya?’

Yesu wangukamba kuti: ‘Soka, luta ku Damasko. Ndipu kweniko wamukambirika vakwenele kuchita.’ Saulo wati wasoka ndi kujura masu, wanguwona chinthu chechosi cha. Iyu wanguja wachibulumutiya. Ndipu ŵanthu wo wenga nawu, angumuko pajanja ndi kuluta nayu ku Damasko.

Yesu wangukamba ndi wakusambira waki yumoza kuti: ‘Soka Hananiya. Luta ku msewu wo udanika kuti Msewu Wakunyoroka. Asani wachifika kunyumba yaku Yuda, ukafumbi za munthu yo wadanika kuti Saulo. Ndasankha iyu kuja muteŵeti wangu wapade.’

Hananiya wanguvwiya. Wati wakumana ndi Saulo, iyu wangumuko ndi kukamba kuti: ‘Ambuya andituma kwaku iwi kuti uyambi so kulereska ndipuso kuti uzaziki ndi mzimu utuŵa.’ Nyengu yeniyo, m’masu mwaku Saulo mungutuwa vinthu vakuwoneka nge mamba ndipu iyu wangwamba so kulereska.

Saulo wangugwira nchitu yikulu yakupharazga kwa ŵanthu a mitundu yinandi. Iyu wanguzija wakutumika Paulo ndipu tisambirengi vinandi vakukwaskana ndi iyu. Kweni tiyi tiwoni dankha vo Chiuta wangutuma Petro kuti wachiti.

Machitidu 8:1-4; 9:1-20; 22:6-16; 26:8-20.



Mafumbu

  • Kumbi Saulo wanguchitanji Stefano wati wabayika?
  • Kumbi nchakuziziswa wuli cho chinguchitika Sauli wachiluta ku Damasko?
  • Kumbi Yesu wangukambiya Saulo kuti wachitenji?
  • Kumbi Yesu wangutuma Hananiya kuti wachitenji, nanga nchinthu wuli chinguchitika kuti Saulo wayambi so kulereska?
  • Kumbi Saulo wangwamba kuziŵika ndi zina lakuti yani, nanga iyu wangupaskika nchitu wuli?

Mafumbu ngakusazgiyapu

  • Ŵerenga Machitidu 8:1-4.

    Kumbi mayeseru ngo mpingu wufya wa Akhristu ungukumana nangu nganguwovya wuli kuti chigomezgu cha Chikhristu chivwiki kutali, nanga ivi viyanana wuli ndi vo vichitika mazuŵa nganu? (Machi. 8:4; Yesa. 54:17)

  • Ŵerenga Machitidu 9:1-20.

    Kumbi nchitu zitatu zo Yesu wangulongo kuti wamupaskengi Saulo zenga nizi? (Machi. 9:15; 13:5; 26:1; 27:24; Ŵaro. 11:13)

  • Ŵerenga Machitidu 22:6-16.

    Kumbi tingaja wuli nge Hananiya, nanga nchifukwa wuli kuchita viyo nkhwakukhumbika? (Machi. 22:12; 1 Timo. 3:7; 1 Pet. 1:14-16; 2:12)

  • Ŵerenga Machitidu 26:8-20.

    Kumbi kusintha kwaku Saulo kuja Mukhristu kungawovya wuli ŵanthu wo akutorana ndi munthu yo ndi Kaboni cha mazuŵa nganu? (Machi. 26:11; 1 Timo. 1:14-16; 2 Timo. 4:2; 1 Pet. 3:1-3)