Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 107: Stefano Waponyeka Mya

Nkhani 107: Stefano Waponyeka Mya

MUNTHU yo wajikama pasi po ndi Stefano. Iyu wenga wakusambira wakugomezgeka waku Yesu. Kweni awona vo vitimuchitikiya yapa sonu. Ŵanthu yaŵa atimuponya ndi mya yikuluyikulu. Kumbi nchifukwa wuli yiwu atimutinkha viyo mpaka kumuchitiya chinthu chakofya ichi? Tiyi tiwoni.

Stefano waponyeka mya

Chiuta wawovyanga Stefano kuti wachitengi vakuziziswa. Sonu ŵanthu yaŵa akondwanga navu cha ndipu asuskanga vinthu vawuneneska vo iyu wasambizanga ŵanthu. Kweni Chiuta wangumupaska zeru zinandi Stefano ndipu iyu wanguŵalongo ŵanthu wo kuti asambizanga vinthu vaboza. Ivi vinguŵakwiyiska ukongwa. Sonu yiwu angumuko ndi kudana ŵanthu kuti azikambi vinthu vaboza vakukwaskana ndi iyu.

Mula wa asembi wangufumba Stefano kuti: ‘Kumbi ivi vawuneneska?’ Stefano wangumuka mwa kukamba nkhani yamampha yakutuliya m’Bayibolo. Kukumaliya kwa nkhani yaki, wangukamba za mo ŵanthu aheni atinkhiyanga achimi aku Yehova m’nyengu yakali. Iyu wangukamba so kuti: ‘Namwi muyanana waka ndi ŵanthu yaŵa. Mungubaya Yesu muteŵeti waku Chiuta ndipu muvwiya cha malangu ngaki.’

Ivi vinguŵakwiyiska ukongwa alongozi a visopa. Yiwu angukukuta minyu chifukwa cha kukwiya. Kweni pavuli paki, Stefano wanguyunuska mutu ndi kukamba kuti: ‘Awonani! Ndiwona Yesu kuchanya kuti wama kujanja lamaryi laku Chiuta.’ Ndipu nyengu yeniyo ŵanthu angujala makutu ndi manja ngawu ndipu angutchimbiriya kwaku Stefano. Yiwu angumuko ndi kumutuzgiya kubwalu kwa msumba.

Sonu yapa yiwu anguzuwa mikhanju yawu ndipu angumupaska Saulo kuti waŵasungiyi. Kumbi wamuwona Saulo? Pavuli paki anyaki angwamba kumuponya mya Stefano. Sonu Stefano wangujikama pasi nge mo uwone yapa ndipu wanguromba kwaku Chiuta kuti: ‘Yehova, mungaŵalanganga cha ŵanthu yaŵa chifukwa cha vinthu viheni vo achita.’ Stefano wanguziŵa kuti ŵanthu anyaki angupusiskika ndi alongozi a visopa. Pakumaliya paki Stefano wangufwa.

Kumbi asani munthu munyaki wakuchitiya chinthu chiheni, utimuwezge pamwenga upempha Chiuta kuti wamulangi? Ivi ndivu Stefano ndi Yesu anguchita cha. Yiwu achitiyanga lisungu ŵanthu wo aŵachitiyanga nkhaza. Tiyi nasi tichitengi nge mo Yesu ndi Stefano achitiyanga.

Machitidu 6:8-15; 7:1-60.



Mafumbu

  • Kumbi Stefano wenga yani, nanga Chiuta wamuwovyanga kuchitanji?
  • Kumbi Stefano wangukambanji vo vingukwiyiska alongozgi a visopa?
  • Kumbi ŵanthu anguchitanji nayu Stefano ŵati amutuzgiya kubwalu kwa msumba?
  • Kumbi pachithuthuzi po, mnyamata yo wama po pe mikhanju ndi yani?
  • Kumbi Stefano wangurombanji kwaku Yehova wechendafwi?
  • Nge mo Stefano wanguchitiya, kumbi isi titenele kuchitanji asani munthu munyaki watichitiya chinthu chiheni?

Mafumbu ngakusazgiyapu

  • Ŵerenga Machitidu 6:8-15.

    Kumbi ndi nthowa zachinyengu nizi zo alongozgi a visopa agwiriskiya nchitu pakwesa kulekeska nchitu yakupharazga ya Akaboni ŵaku Yehova? (Machi. 6:9, 11, 13)

  • Ŵerenga Machitidu 7:1-60.

    Kumbi nchinthu wuli cho chinguwovya Stefano kumiya uthenga wamampha pamasu pa Mphara yamilandu mwakuvwika umampha, nanga isi tingasambiranjipu? (Machi. 7:51-53; Ŵaro. 15:4; 2 Timo. 3:14-17; 1 Pet. 3:15)

    Kumbi titenele kuja ndi maŵanaŵananu wuli pa ŵanthu wo asuska nchitu yidu? (Machi. 7:58-60; Mate. 5:44; Luka 23:33, 34)