Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 106: Atuzgika M’jeri

Nkhani 106: Atuzgika M’jeri

AWONA m’ngelu yo wajula chisasa cha khomu la jeri. Ŵanthu wo watiŵajuliya mbakutumika aku Yesu. Tiyi tiwoni vo vinguchitika kuti yiwu aŵikiki m’jeri.

Mungelu wathaŵa akutumika

Pangujumpha waka nyengu yimanavi kutuliya po akusambira aku Yesu angulonde mzimu utuŵa. Sonu ivi ndivu vinguchitika: Zuŵa linyaki ndi musana, Petro ndi Yohane anguluta kunyumba yakusopiyamu ku Yerusalemu. Ndipu pafupi ndi khomu penga munthu yo wenga mukwakwa kutuwa pa unamana waki. Zuŵa lelosi ŵanthu amunyamuwanga kuluta nayu kunyumba yakusopiyamu, kuti wakapempheskengi ndalama ku ŵanthu wo aserenga mukati. Iyu wati wawona Petro ndi Yohane wanguŵapempha kuti amupaskeku chawanangwa. Kumbi akutumika yaŵa anguchita wuli?

Yiwu anguma ndi kulereska munthu wakusuzgika yo. Ndipu Petro wanguti: ‘Ndalama ndilivi, kweni ndikupaskengi cho ndenachu. Mu zina laku Yesu, soka, yenda!’ Pavuli paki, Petro wangumuko janja lamaryi ndipu munthu yo wanguduka ndi kwamba kwenda. Ŵanthu ŵati awona chakuziziswa ichi, anguzizwa ndipuso angukondwa ukongwa.

Petro wangukamba kuti: ‘Isi tachita chakuziziswa ichi chifukwa cha nthazi yaku Chiuta yo wanguyuska Yesu.’ Petro ndi Yohane ŵeche kulongolo, alongozgi a visopa anguza pafupi. Yiwu angukwiya ukongwa chifukwa Petro ndi Yohane akambiyanga ŵanthu za kuyukiskika kwaku Yesu. Ndipu anguŵako ndi kuŵayika m’jeri.

Mawa laki, alongozi a visopa ŵenga ndi unganu ukulu. Yiwu angudaniska Petro, Yohane ndi munthu yo angumuchizga kuti ŵazi pa unganu uwu. Ndipu alongozi a visopa anguŵafumba kuti: ‘Ndi nthazi wuli yo yakupangiskani kuti muchiti chakuziziswa ichi?’

Petro wanguŵakambiya kuti ndi nthazi yaku Chiuta mweniyo wanguyuska Yesu ku ŵakufwa. Asembi angusoŵa chakuchita, chifukwa atingi asuskengi cha kuti chakuziziswa ichi chinguchitika nadi. Sonu asembi anguŵatcheŵeska akusambira aku Yesu kuti angakambanga so cha zaku Yesu ndipu anguŵaleka kuti aluti.

Akutumika anguleka cha kupharazga zaku Yesu ndi kuchizga akutama. Nkhani ya vakuziziswa ivi yinguwanda. Ndipu ŵanthu wo atuliyanga mu matawuni ngakuzunguliya Yerusalemu azanga ndi akutama ŵawu kuti akutumika aziŵachizgi. Ivi vinguchitiska alongozi avisopa kuti ayambi kuchita sanji, sonu yiwu anguko akutumika ndi kuŵaŵika m’jeri. Kweni yiwu angujaliskamu cha.

Ndi usiku, m’ngelu waku Chiuta wangujula pakhomu la jeri nge mo uwone yapa. Ndipu m’ngelu uyu wangukamba kuti: ‘Lutani, mukami m’nyumba yakusopiyamu ndipu mukalutirizgi kukambiya ŵanthu.’ Sonu ndi mulenji alongozi avisopa angutuma ŵanthu kuti akako akutumika m’jeri, kweni anguchisaniya kuti mulivi. Pavuli paki, anguchiŵasaniya kuti apharazga m’nyumba yakusopiyamu ndipu anguŵako kuluta nawu ku Mphara yikulu ya milandu.

Alongozi a visopa angukamba kuti: ‘Tikukukanizgani kuti mungasambizanga so cha zaku Yesu, kweni imwi mwazaza Yerusalemu ndi chisambizu chinu.’ Ndipu akutumika wo angumuka kuti: ‘Titenere kuvwiya Chiuta nge wakuwusa, kuluska ŵanthu.’ Ndipu yiwu angulutirizga kusambiza ŵanthu “uthenga wamampha.” Kumbi ichi nchakuwoniyapu chamampha cha cho isi titenere kulondo?

Machitidu chaputala 3 mpaka 5.



Mafumbu

  • Kumbi nchinthu wuli cho chinguchitikiya Petro ndi Yohane zuŵa linyaki achiluta kunyumba yakusopiyamu?
  • Kumbi Petro wangumukambiyanji munthu yo wenga mukwakwa, nanga nchinthu wuli cho wangumupaska cho chenga chakukhumbika ukongwa kuluska ndalama?
  • Nchifukwa wuli alongozgi a visopa angukwiya, nanga anguchitanji nayu Petro kweniso Yohane?
  • Kumbi Petro wanguŵakambiyanji alongozgi a visopa, nanga yiwu anguŵatcheŵeskanji akutumika?
  • Nchifukwa wuli alongozgi a visopa ŵenga ndi sanji, kweni nchinthu wuli chinguchitika akutumika ŵati aŵikika m’jeri kachiŵi?
  • Kumbi akutumika angumukanji ŵati aŵatole ku Mphara yikulu ya milandu?

Mafumbu ngakusazgiyapu

  • Ŵerenga Machitidu 3:1-10.

    Chinanga wuli mazuŵa nganu tilivi nthazi yakuchitiya vakuziziswa, kumbi mazu ngaku Petro ngo nge pa Machitidu 3:6, ngatitiwovya wuli kuziŵa kuzirwa kwa uthenga wa Ufumu? (Yoha. 17:3; 2 Ŵako. 5:18-20; Ŵafi. 3:8)

  • Ŵerenga Machitidu 4:1-31.

    Asani ŵanthu atitisuska mu uteŵeti, kumbi tingalondo wuli abali ŵidu Achikhristu a mu vyaka 100 vakwamba? (Machi. 4:29, 31; Ŵaefe. 6:18-20; 1 Ŵatesa. 2:2)

  • Ŵerenga Machitidu 5:17-42.

    Kumbi ŵanthu anyaki wo mba Kaboni cha, akali ndi amazuŵa nganu alongo wuli kuti ŵe ndi maŵanaŵananu ngamampha panchitu yakupharazga? (Machi. 5:34-39)