Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 105: Angulindizga mu Yerusalemu

Nkhani 105: Angulindizga mu Yerusalemu

ŴANTHU yaŵa ŵe yapa mbakulondo ŵaku Yesu. Yiwu anguvwiya Yesu ndipu anguja mu Yerusalemu. Panyengu yo wosi alindizgiyanga, kunguvwika chiwawa m’nyumba yosi. Chiwawa cho chavwikanga nge chimphepu chikulu ukongwa. Ndipu pavuli paki malaŵi ngakuwoneka nge malilimi nga motu nganguwoneka pamutu pa akusambira aku Yesu. Kumbi wawuwona motu pamutu pa ŵanthu yaŵa? Kumbi venivi vang’anamuwanganji?

Mzimu utuŵa pa akutumika akwamba

Ichi chenga chakuziziswa. Panyengu iyi, Yesu wenga kuchanya ndi Awiski ndipu wangupaska akulondo ŵaki mzimu utuŵa waku Chiuta. Kumbi wachiziŵa cho mzimu uwu unguŵachitiska? Wosi angwamba kulongolo vineneru vakupambanapambana.

Ŵanthu anandi a mu Yerusalemu ŵati avwa chiwawa cho chavwikanga nge chimphepu chikulu, anguza kuti aziwoni cho chachitikanga. Kweniso ŵanthu anyaki wo ŵenga a mitundu yinyaki, anguza ku phwandu la Pentekoste la Ayisraele. Ndipu alendu yaŵa angulonde chakuziziswa. Yiwu anguvwa akusambira achilongolo mu vineneru vawu, za vinthu vakuziziswa vo Chiuta wanguchita.

Alendu yaŵa angukamba kuti: ‘Ŵanthu wosi yaŵa mba ku Galile. Kumbi nchinthu wuli cho chaŵawovya kuti akambi vineneru vakupambanapambana va mu vyaru vo isi tatuliya?’

Sonu Petro wangusoka ndipu wangukonkhoske ŵanthu za mo Yesu wangubayikiya ndipuso kuti Yehova wangumuyuska ku ŵakufwa. Petro wangudanirizga kuti: ‘Sonu Yesu we kuchanya, ku janja lamaryi laku Chiuta. Ndipu iyu watumiza mzimu utuŵa wo wangulayizga. Ndichu chifukwa chaki mwawona ndi kuvwa vakuziziswa ivi.’

Petro wati wakamba ivi, ŵanthu anandi angwamba kuchita chitima chifukwa cha vo vinguchitikiya Yesu. Ndipu yiwu angufumba kuti: ‘Sonu titenere kuchitanji?’ Petro wanguŵakambiya kuti: ‘Mutenere kusintha umoyu winu ndi kubatizika.’ Pazuŵa lenilo, ŵanthu pafupifupi 3,000 angubatizika ndipu anguja akulondo ŵaku Yesu.

Machitidu 2:1-47.



Mafumbu

  • Nge mo chithuthuzi chilongole, kumbi nchinthu wuli chinguchitikiya akulondo Yesu wo alindizganga mu Yerusalemu?
  • Kumbi alendu wo anguza ku Yerusalemu angulonde chakuziziswa wuli?
  • Kumbi Petro wanguŵakonkhoskiyanji ŵanthu?
  • Kumbi ŵanthu anguchita wuli ŵati avwa vo Petro wangukonkhoska nanga iyu wanguŵakambiya kuti achitenji?
  • Kumbi mbanthu alinga wo angubatizika pazuŵa la Pentekoste mu 33 C.E.?

Mafumbu ngakusazgiyapu

  • Ŵerenga Machitidu 2:1-47.

    Kumbi mazu ngaku Petro ngo ngasanilika pa Machitidu 2:23, 36, ngalongo wuli kuti mtundu wosi wa Chiyuda ukwaskika ndi nkhani yakubayika kwaku Yesu? (1 Ŵatesa. 2:14, 15)

    Kumbi Petro nchakuwoniyapu chamampha wuli pankhani ya kusanda Malemba? (Machi. 2:16, 17, 29, 31, 36, 39; Ŵako. 4:6)

    Kumbi Petro wangugwiriskiya nchitu wuli ‘maki nga ufumu wakuchanya,’ ngakwamba ngo Yesu wangulayizga kuti wamupaskengi? (Machi. 2:14, 22-24, 37, 38; Mate. 16:19)