Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 104: Yesu Wawere KuchanyaYesu Wawere Kuchanya

Nkhani 104: Yesu Wawere KuchanyaYesu Wawere Kuchanya

YESU wangujilongo kwa akumulondo ŵaki nyengu zinandi. Nyengu yinyaki wangujilongo kwa akusambira ŵaki 500. Kumbi waviziŵa vo Yesu wanguŵakambiya panyengu iyi? Iyu wanguŵakambiya za ufumu waku Chiuta. Yehova wangutuma Yesu pacharu kuti wazisambizi za Ufumu. Ndipu iyu wangulutirizga kuchita ivi chinanga mphavuli pa kuyuka kwaki.

Yesu wawele kuchanya

Kumbi ukumbuka kuti ufumu waku Chiuta nchinthu wuli? Ufumu ndi boma chayilu laku Chiuta lakuchanya ndipu Chiuta wasankha Yesu kuja fumu. Nge mo tikusambiriya, Yesu wakulongo kuti wazamuja fumu yamampha ukongwa chifukwa wanguryisa ŵanthu anja, wanguchizga akutama ndipuso wanguyuska akufwa.

Panyengu yo Yesu wazamuwusa nge fumu kuchanya kwa vyaka 1,000, kumbi pacharu pazamuja wuli? Panyengu iyi, charu chosi chazamuja paradayisu wakutowa. Pazamuŵavi nkhondu, kubayana, matenda chinanga ndi nyifwa. Tiziŵa kuti ivi vazamuchitika nadi, chifukwa Chiuta wangupanga charu kuti chije paradayisu kuti ŵanthu ajemu ndi likondwa. Ichi ndichu chifukwa chaki Iyu wangupanga munda wa Edene pakwamba. Ndipu Yesu wazamuwoneseska kuti vo Chiuta wakhumba kuti vizichitiki vafiskika.

Sonu nyengu yakuti Yesu wawere kuchanya yingukwana. Yesu wangujilongo kwa akusambira ŵaki kwa mazuŵa 40. Ndipu yiwu angusimikizga kuti iyu wanguyuka nadi. Kweni wechendalekani ndi akusambira ŵaki iyu wanguŵakambiya kuti: ‘Muje mu Yerusalemu mpaka po mulondiyengi mzimu utuŵa.’ Mzimu utuŵa ndi nthazi yo Chiuta wagwiriskiya nchitu ndipu ye nge mphepu. Nthazi iyi yazamuwovya akulondo Yesu kuchita khumbu laku Chiuta. Pakumaliya paki Yesu wanguti: ‘Mwazamupharazga zaku ini ku vigaŵa vakutali va charu chapasi.’

Yesu wati wamaliza kukamba ivi, panguchitika chinthu chinyaki chakuziziswa. Iyu wangwamba kukwera kuchanya nge mo uwone pachithuthuzi yapa. Ndipu wangwamba kubisika ndi mitambu mwakuti akusambira ŵaki angumuwona so cha. Yesu wati wakwera kuchanya wangwamba kuwusa akulondo ŵaki pacharu chapasi.

Akusambira aleleska kuchanya

1 Ŵakorinte 15:3-8; Chivumbuzi 21:3, 4; Machitidu 1:1-11.



Mafumbu

  • Mbakusambira alinga wo anguwona Yesu panyengu yinyaki, ndipu iyu wanguŵakambiyanji?
  • Kumbi Ufumu waku Chiuta nchinthu wuli, ndipu umoyu wazamuja wuli pacharu chapasi panyengu yo Yesu wazamuwusiya nge Fumu kwa vyaka 1,000?
  • Kumbi Yesu wanguwoneke kwa akusambira ŵaki kwa mazuŵa ngalinga, nanga sonu iyi yenga nyengu yakuti iyu wachitenji?
  • Kumbi Yesu wanguŵakambiyanji akusambira ŵaki iyu we pafupi kulekana nawu?
  • Kumbi nchinthu wuli cho chichitika pachithuthuzi, nanga Yesu wangubisika ndi vinthu wuli?

Mafumbu ngakusazgiyapu

  • Ŵerenga 1 Ŵakorinte 15:3-8.

    Kumbi nchifukwa wuli wakutumika Paulo wangukamba ndi chigomezgu chosi vakukwaskana ndi chiyuka chaku Yesu, nanga ndi vinthu wuli vo Akhristu atenele kukamba ndi chigomezgu chosi mazuŵa nganu? (1 Ŵako. 15:4, 7, 8; Yesa. 2:2, 3; Mate. 24:14; 2 Timo. 3:1-5)

  • Ŵerenga Machitidu 1:1-11.

    Kumbi nchitu yakupharazga yingufika wuli mu vigaŵa vakupambanapambana nge mo yingukambikiya limu pa lemba la Machitidu 1:8? (Machi. 6:7; 9:31; 11:19-21; Ŵako. 1:23)