Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 103: M’chipinda Chakujara

Nkhani 103: M’chipinda Chakujara

PETRO ndi Yohane ŵati aweku ku muunda ko Yesu wanguŵikika, Mariya wangujariya yija. Iyu wangwamba kuliya. Ndipu wangulingizga mukati mu muunda nge mo tinguwone pachithuthuzi cha m’nkhani yo tajumphapu. Iyu wanguwonamu angelu ŵaŵi. Ndipu angumufumba kuti: ‘Nchifukwa wuli uliya?’

Mariya wangumuka kuti: ‘Anditole Ambuya ndipu ndiziŵa cha ko aŵaŵika.’ Mariya wati wang’anamuka wanguwona munthu munyaki. Munthu uyu wangumufumba kuti: ‘Kumbi upenja yani?’

Mariya waŵanaŵananga kuti munthu uyu wenga wakuphwere munda ndipu watingi kuti panyaki iyu ndiyu wanguto liŵavu laku Yesu. Sonu wangukamba kuti: ‘Asani mwamuto, ndikambiyeni ko mwamuŵika.’ Kweni munthu uyu wenga Yesu. Iyu wenga ndi liŵavu lenilo Mariya wanguleka kuliŵanika. Kweni Yesu wati wamudana zina laki, Mariya wanguziŵa kuti ndi Yesu. Iyu wangutchimbiya ndi kuchikambiya akusambira kuti: ‘Ndaŵawona Ambuya.’

Pazuŵa lenilo ndi musana, akusambira ŵaku Yesu ŵaŵi achiluta ku muzi wa Emause, munthu munyaki wangulongozgana nawu. Akusambira yaŵa ŵenga ndi chitima ukongwa chifukwa Yesu wangubayika. Kweni yiwu achiyenda, munthu yo angulongozgana nayu wakonkhoskanga vinthu vinandi va m’Bayibolo vo vinguŵakondweska. Pakumaliya paki ŵati ama kuti aryi chakurya, yiwu anguziŵa kuti munthu uyu wenga Yesu. Pavuli paki, Yesu wanguwoneka cha ko wanguluta ndipu akusambira ŵaŵi yaŵa anguwere ku Yerusalemu liŵiliŵi kuchikambiya akutumika zaku Yesu.

Panyengu yo ivi vachitikanga, Yesu wanguwoneke so kwaku Petro. Anyaki angukondwa ŵati avwa ivi. Sonu akusambira ŵaŵi ŵa, anguluta ku Yerusalemu ndipu anguchisaniya akutumika. Yiwu anguŵakambiya mo Yesu wanguŵawoneke panthowa. Panyengu yo yiwu akonkhoskanga ivi, kumbi wachiziŵa chakuziziswa cho chinguchitika?

Awona chithuthuzi ichi. Yesu wangusere m’chipinda, chinanga kuti chisasa chenga chakujara. Akusambira angukondwa ukongwa. Kumbi ili lenga zuŵa lakukondweska cha? Kumbi ungaŵerengese nyengu zo Yesu wanguwoneke kwa akumulondo ŵaki? Kumbi wasaniya kuti kenga kankhondi?

Yesu wawoneke ku akusambira ŵaki

Panyengu yo Yesu wanguwoneke, wakutumika Tomase pengavi. Sonu akusambira angumukambiya kuti: ‘Taŵawona Ambuya.’ Kweni Tomase wangukamba kuti iyu wavwanengi asani wamuwona Yesu. Sonu pati pajumpha mazuŵa 8, akusambira angukumana so m’chipinda chakujara ndipu nyengu iyi Tomase nayu wengapu. Mwamabuchibuchi, Yesu wanguŵawoneke so m’chipinda. Sonu yapa ndipu Tomase wanguvwaniya.

Yohane 20:11-29; Luka 24:13-43.



Mafumbu

  • Kumbi Mariya wangumukambiyanji munthurumi yo iyu waŵanaŵananga kuti wenga wakuphwere munda, kweni nchinthu wuli cho chingumuwovya kuziŵa kuti wenga Yesu nadi?
  • Nchinthu wuli chinguchitikiya akusambira ŵaŵi wo alutanga ku muzi wa Emause?
  • Kumbi nchakuziziswa wuli cho chinguchitika akusambira ŵaŵi ŵati akambiya akutumika kuti awona Yesu?
  • Kumbi Yesu wanguwoneke kalinga kwa akumulondo ŵaki?
  • Kumbi Tomase wangukambanji wati wavwa kuti akusambira awona Ambuya, kweni nchinthu wuli chinguzichitika pati papita mazuŵa 8?

Mafumbu ngakusazgiyapu

  • Ŵerenga Yohane 20:11-29.

    Kumbi mazu ngo Yesu wangukamba pa lemba la Yohane 20:23, ngang’anamuwa kuti ŵanthu ŵe ndi nthazi yakugowoke ubudi? Konkhoska. (Sumu 49:2, 7; Yesa. 55:7; 1 Timo. 2:5, 6; 1 Yoha. 2:1, 2)

  • Ŵerenga Luka 24:13-43.

    Kumbi tinganozekereska wuli mtima widu kuti ulonde uneneska wa m’Bayibolo? (Luka 24:32, 33; Ezra 7:10; Mate. 5:3; Machi. 16:14; Ŵahe. 5:11-14)