Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 99: M’chipinda Chapachanya

Nkhani 99: M’chipinda Chapachanya

PANGUJUMPHA mazuŵa ngaŵi kutuliya po ŵenga kuphiri, sonu yapa mpha Chinayi ndi usiku. Yesu ndi akutumika ŵaki 12, anguza m’chipinda chapachanya kuzirya chakurya chamazulu cha Phaska. Ndipu munthu yo utimuwona watuwa pakhomu po ndi Yuda mKeriote. Iyu waluta kuchikambiya asembi mo angakole Yesu.

Chakurya chamazulu cha Ambuya

Kwati kwaja zuŵa limoza kuti ŵaryi Phaska, Yuda wanguluta kwa asembi ndi kuchiŵafumba kuti: ‘Kumbi mundipaskengenji asani ndingakuwovyani kuko Yesu?’ Yiwu angumuka kuti: ‘Ndalama 30 za siliva.’ Sonu yapa Yuda waluta kuchikumana ndi ŵanthu yaŵa kuti wakaŵalongozgi ko kwe Yesu. Kumbi ichi nchinthu chakofya cha?

Sonu ŵati amala kurya Phaska. Yesu wangwambiska chakurya chinyaki chapade. Iyu wangupaska akutumika ŵaki chiŵandi cha mkati ndipu wanguti: ‘Ryani, chifukwa chiŵandi ichi, chimiya liŵavu langu lo liperekekengi chifukwa chaku imwi.’ Pavuli paki wanguŵapaska kapu ya vinyu ndipu wanguti: ‘Mwani, chifukwa vinyu uyu, wamiya ndopa zangu zo zidikengi chifukwa chaku imwi.’ Bayibolo lidana chakurya ichi kuti: ‘Chakurya cha mazulu cha Ambuya.’ Pamwenga kuti: ‘Chakurya chakugone cha Ambuya.’

Chakurya cha Phaska cho Ayisraele aryanga, chaŵakumbuskanga nyengu yeniyo m’ngelu waku Chiuta ‘wangujumphiya’ panyumba zawu ku Egipiti ndi kuchibaya ŵana wosi akwamba m’nyumba za Aegipiti. Kweni yapa Yesu wakhumbanga kuti akusambira ŵaki amukumbukengi kweniso akumbukengi mwenimo wangupereke umoyu waki chifukwa chaku yiwu. Ndichu chifukwa chaki wanguŵakambiya kuti achitengi phwandu la chakurya chapade ichi chaka chechosi.

Ŵati amala kurya Chakurya chamazulu cha Ambuya, Yesu wangukambiya akutumika ŵaki kuti atenere kuja ndi chigomezgu chakukho kweniso ambula mantha. Pakumaliya paki, angumbiya sumu Chiuta ndipu angutuwamu. Panyengu iyi ndipu kwafipa ukongwa ndipu panyaki 12 koloku ya usiku ndipu yajumpha. Tiyi tiwoni ko anguluta.

Mateyu 26:14-30; Luka 22:1-39; Yohane chaputala 13 mpaka 17; 1 Ŵakorinte 11:20.



Mafumbu

  • Nge mo pawoneke pachithuthuzi, nchifukwa wuli Yesu ndi akutumika ŵaki 12, ŵe m’chipinda chikulu chapachanya?
  • Kumbi ndiyani yo watuwa pakhomu po nanga wamuchitanji?
  • Kumbi ŵati amala kurya Phaska, Yesu wangwambiska chakurya chapade nichi?
  • Kumbi Phaska waŵakumbuskanga chakuchitika wuli Ayisraele, nanga chakurya chapade chenichi chaŵakumbuskanganji akulondo aku Yesu?
  • Kumbi Yesu wanguŵakambiyanji akutumika ŵaki pavuli pa Chakurya Chamazulu cha Ambuya, nanga yiwu anguchitanji?

Mafumbu ngakusazgiyapu

  • Ŵerenga Mateyu 26:14-30.

    Kumbi lemba la Mateyu 26:15 lilongo wuli kuti Yuda wangumupereke dala Yesu?

    Kumbi ndopa zo Yesu wangudira zigwira nchitu ziŵi nizi? (Mate. 26:27, 28; Yere. 31:31-33; Ŵaefe. 1:7; Ŵahe. 9:19, 20)

  • Ŵerenga Luka 22:1-39.

    Kumbi Satana wangusere mumtima waku Yuda m’nthowa wuli? (Luka 22:3; Yoha. 13:2; Machi. 1:24, 25)

  • Ŵerenga Yohane 13:1-20.

    Mwakuloliyana ndi nkhani yo ye pa Yohane 13:2, kumbi Yuda wangambika mulandu chifukwa cha vo wanguchita, nanga ateŵeti aku Chiuta asambiranjipu pa nkhani iyi? (Chiya. 4:7; 2 Ŵako. 2:11; Ŵaga. 6:1; Yako. 1:13, 14)

    Kumbi ndi sambiru lakukhumbika nili lo Yesu wangupereka? (Yoha. 13:15; Mate. 23:11; 1 Pet. 2:21)

  • Ŵerenga Yohane 17:1-26.

    Nchifukwa wuli Yesu warombiyanga akulondo ŵaki kuti aje “ŵamoza”? (Yoha. 17:11, 21-23; Ŵaro. 13:8; 14:19; Ŵako. 3:14)