Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 98: Pa Phiri la Olivete

Nkhani 98: Pa Phiri la Olivete

YESU sonu we pa Phiri la Olivete. Ŵanthu anayi wo wenawu mbakutumika ŵaki. Petro wendi mvurwa waki Andreya ndipu Yakobe wendi mvurwa waki Yohane. Yo utiyiwona panena po ndi nyumba yakusopiyamu yaku Chiuta ku Yerusalemu.

Sonu pangupita mazuŵa ngaŵi kutuliya po Yesu wangulutiya ku Yerusalemu wakwera pa mwana wa bulu. Sonu pa Chiŵi ndi mlenji, Yesu wenga panyumba yakusopiyamu. Ndipu asembi akhumbanga kumuko Yesu kuti amubayi. Kweni yiwu anguwopa chifukwa chakuti ŵanthu amuyanjanga Yesu.

Yesu ndi akutumika ŵaki

Sonu Yesu wangukambiya alongozgi avisopa kuti: ‘Njoka imwi, ŵana a njoka!’ Ndipu Yesu wangukamba kuti Chiuta wazakuŵalanga chifukwa cha viheni vosi vo achitanga. Pavuli paki Yesu wanguluta pa Phiri la Olivete ndipu akutumika ŵaki anayi angwamba kumufumba. Kumbi waviziŵa vo yiwu afumbanga Yesu?

Akutumika yaŵa afumbanga vinthu vamunthazi. Yiwu aziŵanga kuti Yesu wazamutuzgapu vinthu viheni vosi pacharu. Kweni yiwu akhumbanga kuziŵa nyengu yo vazamuchitikiya. Kweniso akhumbanga kuziŵa kuti Yesu wazamukuza so zukwanji kuziwusa nge Fumu?

Yesu waziŵanga kuti panyengu yo wazamuziya so, akusambira ŵaki wo ŵe pacharu chapasi azakumuwona cha. Ichi nchifukwa chakuti iyu wazamuja kuchanya ndipu yiwu azakumuwona cha. Sonu Yesu wangukambiya akutumika ŵaki vinthu vo vazamuchitika pacharu, panyengu yo iyu wazamuwusa nge Fumu kuchanya. Kumbi vinyaki mwa vinthu ivi ndi nivi?

Yesu wangukamba kuti kwazamuja vinthu nge: Nkhondu zikuluzikulu, matenda, nja, kubayana ndipuso vidililisi vikuluvikulu. Yesu wangukamba so kuti uthenga wamampha wa ufumu waku Chiuta, wazamupharazgika pacharu chosi chapasi. Kumbi vinthu ivi tikuviwonapu vichichitika m’nyengu yidu yinu? Hinya. Ndipu tikhoza kusimikizga kuti sonu Yesu wawusa kuchanya. Pambula kuswera yapa, iyu wazamutuzgapu uheni wosi pacharu.

Mateyu 21:46; 23:1-39; 24:1-14; Marko 13:3-10.



Mafumbu

  • Kumbi Yesu ndi nuyu pachithuthuzi po, nanga wo wenawu mbayani?
  • Kumbi asembi akhumbanga kuchitanji nayu Yesu m’nyumba yakusopiyamu, ndipu iyu wanguŵakambiyanji?
  • Kumbi akutumika angumufumbanji Yesu?
  • Nchifukwa wuli Yesu wangukambiya akutumika ŵaki vinthu vinyaki vo vazamuchitika panyengu yo iyu wazamuwusiya nge Fumu kuchanya?
  • Kumbi Yesu wangukamba kuti nchinthu wuli cho chichitikengi wechendatuzgepu uheni wosi pacharu?

Mafumbu ngakusazgiyapu

  • Ŵerenga Mateyu 23:1-39.

    Chinanga wuli Malemba ngakamba kuti kugwiriskiya nchitu mazina ngaulemu kungaŵa kwakwenele, kumbi mazu ngaku Yesu nga pa Mateyu 23:8-11 ngalongonji pankhani yakugwiriskiya nchitu mazina ngaulemu mu mpingu wachikhristu? (Machi. 26:25; Ŵaro. 13:7; 1 Pet. 2:13, 14)

    Kumbi Afarisi agwiriskiyanga nchitu chinthu wuli kuti atondekeski ŵanthu kuja Akhristu, nanga alongozgi avisopa achita wuli venivi mazuŵa nganu? (Mate. 23:13; Luka 11:52; Yoha. 9:22; 12:42; 1 Ŵatesa. 2:16)

  • Ŵerenga Mateyu 24:1-14.

    Kumbi lemba la Mateyu 24:13, lilongo wuli kukhumbika kwa kukunthiyapu?

    Kumbi mazu ngakuti “umari” ngo nge pa lemba la Mateyu 24:13, ngang’anamuwanji? (Mate. 16:27; Ŵaro. 14:10-12; 2 Ŵako. 5:10)

  • Ŵerenga Marko 13:3-10.

    Kumbi mazu ngo nge pa Marko 13:10, ngalongo wuli kukhumbika kwa kupharazga uthenga wamampha mwaliŵiliŵi, nanga mazu ngaku Yesu yanga ngatenele kutikwaska wuli? (Ŵaro. 13:11, 12; 1 Ŵako. 7:29-31; 2 Timo. 4:2)

Ziŵani Vinandi

CHIGONGWI CHA ALINDA

Kumbi Charu Chepafupi Kumala?

Wonani vinthu vinayi vo Bayibolo likamba vo vititisimikizgiya kuti umaliru wepafupi.