Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 97: Yesu Wanguza nge Fumu

Nkhani 97: Yesu Wanguza nge Fumu

PATI pajumpha waka nyengu yimanavi kutuliya po Yesu wanguchizgiya ŵanthu achibulumutiya, iyu wanguluta m’muzi umana wo wenga pafupi ndi Yerusalemu. Yesu wangukambiya akusambira ŵaki ŵaŵi kuti: ‘Lutani ku muzi wuwa ndipu mwamusaniya mwana wa bulu. Mukamufwatuwi ndi kuza nayu kwaku ini.’

Sonu mwana wa bulu wati waza, Yesu wangukwerapu ndipu wanguluta ku Yerusalemu. Iyu we pafupi kufika mu msumba, wumba wa ŵanthu unguza kuzikumana nayu. Ŵanthu anandi anguzuwa mikhanju yawu ndi kuyitandika munthowa. Anyaki angutema mphanda za kanchindi ndi kuziŵika munthowa ndipu adanirizanga kuti: ‘Chiuta watumbiki fumu yo yituza mu zina laku Yehova!’

Ŵanthu alonde Yesu

Kali mu Yisraele, fumu yifya yakwerenga pa mwana wa bulu ndi kuluta ku Yerusalemu kuchijilongo ku ŵanthu. Sonu ivi ndivu Yesu wanguchita. Ndipu ŵanthu yaŵa angulongo kuti apenjanga kuti Yesu waje fumu yawu. Kweni ŵanthu anyaki amukhumbanga cha. Tikhoza kuziŵa ivi asani tingawona vo vinguchitika Yesu wati waluta ku nyumba yakusopiyamu.

Yesu wati wafika kunyumba yakusopiyamu wanguchizga ŵanthu achibulumutiya ndi akupunduka. Ŵana ŵati awona ivi, angwamba kutumbika Yesu. Kweni ivi vingukwiyiska asembi, ndipu angufumba Yesu kuti: ‘Kumbi utuvwa vo ŵana yaŵa akamba?’

Yesu wanguŵamuka kuti: ‘Hinya ndituvwa, kumbi mwechendaŵerengi m’Bayibolo po pakamba kuti: “M’mulomu mwa ŵana, Chiuta wazamuŵikamu vitumbiku?”’ Sonu ŵana angulutirizga kutumbika fumu yaku Chiuta.

Isi nasi tikhumba kuja ngati ŵana yaŵa, asi viyo? Ŵanthu anyaki angayesa kutikaniza kukamba za ufumu waku Chiuta. Kweni tilutirizgengi mbwenu kukambiya ŵanthu vinthu vamampha vo Yesu wazamuchitiya ŵanthu.

Yesu wakhumbikanga cha kuwusa nge fumu panyengu yo wenga pacharu chapasi. Kumbi nanga nyengu yaki yazamukwana zukwanji? Akusambira aku Yesu akhumbanga kuziŵa. Tisambirengi ivi mu nkhani ya panthazi.

Mateyu 21:1-17; Yohane 12:12-16.



Mafumbu

  • Panyengu yo Yesu wangufikiya m’muzi umana wo wenga pafupi ndi Yerusalemu, kumbi wangukambiya akusambira ŵaki kuti achitenji?
  • Nge mo uwone pachithuthuzi, kumbi nchinthu wuli chinguchitika Yesu we pafupi kufika ku msumba wa Yerusalemu?
  • Kumbi ŵana anguchitanji ŵati awona kuti Yesu wachizganga ŵanthu achibulumutiya ndi akupunduka?
  • Kumbi Yesu wanguŵakambiyanji asembi wo angukwiya?
  • Kumbi isi tingaja wuli nge ŵana wo atumbikanga Yesu?
  • Kumbi akusambira akhumbanga kuziŵanji?

Mafumbu ngakusazgiyapu

  • Ŵerenga Mateyu 21:1-17.

    Kumbi pe kupambana wuli pakati pa mo Yesu wanguserere mu Yerusalemu nge Fumu ndi mo achitiyanga asilikali a m’nyengu ya Aroma asani apunda nkhondu? (Mate. 21:4, 5; Zeka. 9:9; Ŵafi. 2:5-8; Ŵako. 2:15)

    Kumbi ŵana angasambiranji kwa anyamata a Chiyisraele wo angukamba mazu nga pa lemba la Sumu 118, panyengu yo Yesu waserenga m’nyumba yakusopiyamu? (Mate. 21:9, 15; Sumu 118:25, 26; 2 Timo. 3:15; 2 Pet. 3:18)

  • Ŵerenga Yohane 12:12-16.

    Kumbi kugwiriskiya nchitu mphanda za kanchindi ko ŵanthu anguchita pakutumbika Yesu kwamiyanganji? (Yoha. 12:13; Ŵafi. 2:10; Chivu. 7:9, 10)