Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 96: Yesu Wachizga Akutama

Nkhani 96: Yesu Wachizga Akutama

YESU po wayendanga m’charu wachizganga ŵanthu akutama. Vakuziziswa vo iyu wachitanga vinguvwika m’mizi ndi m’misumba yosi. Sonu ŵanthu alutanga kwaku Yesu ndi ŵanthu akupunduka, achibulumutiya, ambuwu ndipuso wo atamanga matenda ngakupambanapambana. Ndipu Yesu wanguŵachizga wosi.

Sonu pangupita vyaka vakujumpha vitatu kutuliya po Yohane wangubatiziya Yesu. Ndipu Yesu wangukambiya akutumika ŵaki kuti iyu wenga pafupi kuluta ku Yerusalemu, kweniko wamubayikiya ndipu pavuli paki wamuyuka. Kweni wechendaluti, iyu wangulutirizga kuchizga ŵanthu wo atamanga.

Yesu wachizga munthukazi wakutama

Zuŵa linyaki Yesu wasambizanga pazuŵa la Sabata. Pazuŵa ili Ayuda apumuwanga. Munthukazi yo utimuwona yapa watamanga ukongwa. Iyu wangugongonala msana kwa vyaka 18 ndipu wanyolokanga cha. Sonu Yesu wati wamuko, iyu wangwamba kunyoloka ndipu wanguchira.

Ivi vingukwiyiska alongozi a visopa. Yumoza waku yiwu wangukambiya wumba wa ŵanthu kuti: ‘Pe mazuŵa 6 ngo titenere kugwira nchitu, mazuŵa ngenanga ndingu muzengi kuzichizgika, kweni pazuŵa la Sabata cha.’

Kweni Yesu wangumuka kuti: ‘Mwa ŵanthu aheni imwi. Mosi yapa mukhoza kumasuwa hachi yinu ndi kuchiyimwiska maji pazuŵa la Sabata. Sonu kumbi nkhunanga kuchizga munthukazi mukavu uyu yo watama vyaka 18 pazuŵa la Sabata?’ Vo Yesu wangumuka vinguchitiska soni ŵanthu aheni yaŵa.

Pavuli paki, Yesu ndi akutumika ŵaki alutanga ku Yerusalemu. Sonu ŵati atuwa mu msumba wa Yeriko, ŵanthu ŵaŵi achibulumutiya wo ayanjanga kupempha anguvwa kuti kujumpha Yesu. Sonu yiwu angudanirizga kuti: ‘Tiwovyeni a Yesu!’

Sonu Yesu wangudana ŵanthu achibulumutiya wo ndi kuŵafumba kuti: ‘Mukhumba kuti ndikuchitiyeninji?’ Yiwu angumuka kuti: ‘Ambuya, tijuleni masu ngidu.’ Yesu wanguko masu ngawu ndipu nyengu yeniyo angwamba kuwona. Kumbi uziŵa chifukwa cho Yesu wachitiyanga vakuziziswa vosi ivi? Chenga chifukwa chakuti iyu wayanjanga ŵanthu ndipu wakhumbanga kuti amugomezgengi. Sonu isi nasi titenere kugomezga kuti panyengu yo Yesu wazamuwusiya nge Fumu pazamuŵavi wakutama.

Mateyu 15:30, 31; Luka 13:10-17; Mateyu 20:29-34.



Mafumbu

  • Kumbi Yesu wachitanganji wachiyenda m’charu?
  • Kumbi Yesu wanguŵakambiyanji akutumika ŵaki pati papita vyaka vitatu kutuliya po wangubatizikiya?
  • Kumbi ŵanthu wo ŵe pachithuthuzi po mbayani, nanga Yesu wangumuchitiyanji munthukazi yo?
  • Nchifukwa wuli alongozi a visopa anguchita soni ndi vo Yesu wangumuka?
  • Panyengu yo Yesu ndi akutumika ŵaki ŵenga pafupi ndi Yeriko, kumbi Yesu wanguŵachitiyanji ŵanthu achibulumutiya ŵaŵi wo apempheskanga?
  • Nchifukwa wuli Yesu wachitanga vakuziziswa?

Mafumbu ngakusazgiyapu

  • Ŵerenga Mateyu 15:30, 31.

    Kumbi nthazi zaku Yehova zingulongoleka wuli mwaku Yesu ndipu venivi vititiwovya wuli kuvwisa vo Yehova walayizga kuzichita m’charu chifya? (Sumu 37:29; Yesa. 33:24)

  • Ŵerenga Luka 13:10-17.

    Kumbi fundu yakuti Yesu wachitanga vakuziziswa vaki vinyaki vakukhumbika ukongwa pazuŵa la Sabata, yilongo kupumuwa kwa mtundu wuli ko wazisengi ku mtundu wa ŵanthu mu Muwusu waki wa Vyaka 1,000? (Luka 13:10-13; Sumu 46:9; Mate. 12:8; Ŵako. 2:16, 17; Chivu. 21:1-4)

  • Ŵerenga Mateyu 20:29-34.

    Kumbi nkhani iyi yititilongo wuli kuti Yesu wavukanga cha kovya ŵanthu, nanga isi tingasambiranjipu? (Mara. 15:7; Yako. 2:15, 16; 1 Yoha. 3:17)