Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 95: Nthowa yo Yesu Wangusambiziya

Nkhani 95: Nthowa yo Yesu Wangusambiziya

ZUŴA linyaki Yesu wangukambiya munthu munyaki kuti watenere kwanja munasi waki. Ndipu munthu uyu wangufumba Yesu kuti: ‘Kumbi munasi wangu ndi yani?’ Yesu waziŵanga vo munthu uyu waŵanaŵananga. Iyu waŵanaŵananga kuti anasi ŵaki mbanthu a mtundu waki pamwenga wo we nawu chisopa chimoza pe. Sonu tiyi tiwoni vo Yesu wangumukambiya.

Nyengu zinyaki Yesu wasambizanga ŵanthu mwakuŵakambiya nkhani. Ivi ndivu wanguchita ndi munthu uyu. Yesu wangukamba nkhani yakukwaskana ndi m’Yuda kweniso m’Samaria. Kumbuka kuti tikusambirapu kuti Ayuda anandi atinkhanga Asamaria. Sonu Yesu wangukamba kuti:

Zuŵa linyaki, m’Yuda munyaki wangupitiya nthowa ya mapiri kuluta ku Yeriko. Kweni ankhungu angumuko. Yiwu anguto ndalama zaki zosi ndi kumupuma mpaka wenga pafupi kufwa.

Pavuli paki wasembi wa Chiyuda wadumuwanga munthowa. Iyu wangumuwona munthu yo wangupumika. Kumbi uŵanaŵana kuti wanguchita wuli? Iyu wangumuŵambala waka ndi kulutirizga ulendu waki. Ndipu kunguza so munthu munyaki wakwanja kusopa. Iyu wenga m’Levi. Kumbi iyu wanguma? Awa, nayuso wanguma cha kuti wawovyi munthu yo wangupumika. Kumbi wamuwona wa sembi ndi m’Levi wo ŵe munthowa aluta kunthazi ko?

Kweni awona yo we ndi munthu wakupumika. Iyu ndi m’Samaria, ndipu wawovya m’Yuda. Watimuŵika munkhwala mu vilonda. Pavuli paki, wanguto m’Yuda uyu ndi kuluta nayu kumalu ngamampha kuti wakapumuwi kweniso kuti wakachiri.

Msamaria walisungu

Yesu wati wamalizga kukonkhoska nkhani iyi, wangukambiya munthu yuwa wangumufumba kuti: ‘Pa ŵanthu ŵatatu yaŵa, kumbi uŵanaŵana kuti ndi yani yo wenga munasi wa munthu yo wangupumika? Kumbi wenga wasembi, m’Levi pamwenga m’Samaria?’

Munthu yuwa wangumuka kuti: ‘Wenga m’Samaria. Iyu wangumuchitiya lisungu munthu yo wangupumika.’

Yesu wangukamba kuti: ‘Wamuka umampha. Sonu luta ndipu nawi ukachitiyengi ŵanthu nge po iyu wanguchitiya.’

Kumbi iwi wayiyanja cha nthowa yo Yesu wangusambiziya? Tingasambira vinthu vinandi vakukhumbika asani tingavwiya vo Yesu wakukamba m’Bayibolo, asi viyo?

Luka 10:25-37.



Mafumbu

  • Kumbi munthu munyaki wangumufumbanji Yesu ndipu chenga chifukwa wuli?
  • Kumbi nyengu zinyaki Yesu wagwiriskiyanga nchitu vinthu wuli pakusambiza ndipu kumbi ndi vinthu nivi vo tasambirapu kali vakukwaskana ndi Ayuda kweniso Asamariya?
  • M’nkhani yeniyo Yesu wangukamba, nchinthu wuli cho chinguchitikiya m’Yuda yo walutanga ku Yeriko?
  • Kumbi nchinthu wuli cho wasembi wa Chiyuda ndi m’Levi anguchita achijumpha panthowa?
  • Pachithuthuzi po, kumbi ndiyani yo wawovya m’Yuda yo wangupumika?
  • Yesu wati wamaliza kukonkhoska nkhani, kumbi wangumufumbanji munthu uyu, nanga iyu wangumuka kuti wuli?

Mafumbu ngakusazgiyapu

  • Ŵerenga Luka 10:25-37.

    M’malu mwakumukiya limu, kumbi Yesu wangumuwovya wuli munthu yo waziŵanga ukongwa Dangu kuti waŵanaŵaniyepu pankhani yo wangufumba? (Luka 10:26; Mate. 16:13-16)

    Kumbi Yesu wangugwiriskiya nchitu wuli ntharika pakovya ŵanthu wo amuvwisiyanga kuti aleki kusankhana mitundu? (Luka 10:36, 37; 18:9-14; Tito 1:9)