Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 91: Yesu Wasambiza Paphiri

Nkhani 91: Yesu Wasambiza Paphiri

AWONA Yesu yo waja po. Iyu we paphiri ku Galile ndipu wasambiza ŵanthu. Wo aja nayu kufupi mbakusambira ŵaki. Iyu wasankha ŵanthu 12 kuja akutumika ŵaki. Akutumika yaŵa mbakusambira apade aku Yesu. Kumbi utingaziŵa mazina ngawu?

Yesu wasambiza

Penga Simoni Petro ndi mvurwa waki Andreya. Yakobe ndi mvurwa waki Yohane. Wakutumika munyaki wadanikanga so kuti Yakobe, munyaki wadanikanga so kuti Simone. Akutumika ŵaŵi adanikanga kuti Yuda. Munyaki wenga Yuda mKeriote ndipu munyaki wenga Yuda yo wadanikanga so kuti Tadeyu. Ndipu penga Filipu ndi Natanele (yo wadanikanga so kuti Bartolomeya), kweniso Mateyu ndi Tomase.

Ŵati atuwa ku Samaria, Yesu wangwamba kupharazga kwa nyengu yakwamba kuti: ‘Ufumu wakuchanya we pafupi.’ Kumbi utiwuziŵa ufumu wo Yesu wakambanga? Ndi boma chayilu laku Chiuta. Yesu ndiyu fumu ya ufumu uwu. Iyu wazamuwusa we kuchanya ndipu wazamuzisa chimangu pacharu chapasi. Ufumu waku Chiuta wazamusambuska charu chosi kuja paradayisu wakutowa.

Yapa Yesu wasambizanga ŵanthu za ufumu. Iyu wanguti: ‘Imwi murombengi viyo: Awusefwi mwakuchanya, zina linu litumbikiki. Ufumu winu uzi. Khumbu linu lichitiki panu pasi nge kuchanya.’ Rombu ili, ŵanthu anandi atilidana kuti: ‘Rombu la Ambuya.’ Ndipu anyaki atilidana kuti Rombu la ‘Awusefwi.’ Kumbi iwi ungalikamba rombu losi?

Yesu wangusambiza so ŵanthu mo angajaliya ndi anyawu. Iyu wanguti: ‘Chitiyani anyinu vo mukhumba kuti yiwu akuchitiyeni.’ Kumbi iwi ukondwa cha asani ŵanthu akuchitiya chinthu chamampha? Sonu Yesu wang’anamuwanga kuti titenere kuchitiya anyidu vinthu vamampha. Kumbi vazamuja vakukondweska cha mu paradayisu po munthu weyosi wazamuchitanga vinthu vamampha?

Mateyu chaputala 5 mpaka 7; 10:1-4.



Mafumbu

  • Nge mo uwone pachithuthuzi, kumbi Yesu wasambiziya pani, ndipu mbayani wo waja nawu pafupi?
  • Zumbuwa mazina nga akutumika 12.
  • Kumbi Ufumu wo Yesu wapharazganga ndi nuwu?
  • Kumbi Yesu wangusambiza ŵanthu kuti arombengi za vinthu wuli?
  • Kumbi Yesu wangukambiya ŵanthu kuti ajengi wuli ndi anyawu?

Mafumbu ngakusazgiyapu

  • Ŵerenga Mateyu 5:1-12.

    Kumbi tingalongo wuli kuti tiziŵa vakusoŵa vidu vauzimu? (Mate. 5:3; Ŵaro. 10:13-15; 1 Timo. 4:13, 15, 16)

  • Ŵerenga Mateyu 5:21-26.

    Kumbi lemba la Mateyu 5:23, 24, lilongo wuli kuti kwanjana ndi abali ŵidu kukwaska ubwezi widu ndi Yehova? (Mate. 6:14, 15; Sumu 133:1; Ŵako. 3:13; 1 Yoha. 4:20)

  • Ŵerenga Mateyu 6:1-8.

    Kumbi ndi vakuchitika nivi vakulongo kujirunjikiska vo Akhristu atenele kutcheŵa navu? (Luka 18:11, 12; 1 Ŵako. 4:6, 7; 2 Ŵako. 9:7)

  • Ŵerenga Mateyu 6:25-34.

    Kumbi Yesu wangusambizanji pankhani ya kukhumbika kwa kugomezga Yehova kuti ndiyu wangatiphwere mwakuliŵavu? (Chitu. 16:4; Sumu 37:25; Ŵafi. 4:6)

  • Ŵerenga Mateyu 7:1-11.

    Kumbi ntharika yo yikukonkhoskeka umampha pa lemba la Mateyu 7:5, yititisambizanji? (Ntha. 26:12; Ŵaro. 2:1; 14:10; Yako. 4:11, 12)