Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 90: Yesu Wangukumana ndi Munthukazi Pachisimi

Nkhani 90: Yesu Wangukumana ndi Munthukazi Pachisimi

YESU wapumuwa dankha pachisimi cha ku Samaria. Akusambira ŵaki aluta kumsika kuchigula vakurya. Munthukazi yo Yesu waŵeleŵeta nayu waza kuzineŵa maji. Ndipu Yesu watimukambiya kuti: ‘Ndipaskeniku maji ngakumwa.’

Yesu wakambiskana ndi munthukazi wachisamaria

Ivi vingumuziziswa ukongwa munthukazi uyu. Kumbi wachiziŵa chifukwa chaki? Nchifukwa chakuti Yesu ndi m’Yuda ndipu munthukazi yo ndi m’Samaria. Ayuda anandi atinkhanga Asamaria ndipu akhumbanga cha kuŵeleŵeta nawu. Kweni Yesu wayanjanga ŵanthu a mitundu yosi. Sonu iyu wanguti: ‘Asani mungumuziŵa munthu yo watikupemphani maji ngakumwa, mphanyi mwamupempha iyu ndipu watingi wakupaskeningi maji ngakupaska umoyu.’

Munthukazi yo wangukamba kuti: ‘Ada, chisimi ichi nchitali ndipu imwi mulivi ngolowondu. Sonu maji ngakupaska umoyu mungatongi pani?’

Yesu wanguti: ‘Asani mungamwa maji nga pachisimi ichi muvwengi so nyota. Kweni maji ngo ndiperekengi ngakhoza kupaska munthu umoyu wambula kumala.’

Munthukazi yo wangukamba kuti: ‘Ada, ndipaskeni maji ngo mukamba, kuti ndingazivwanga so nyota cha. Kweniso kuti ndingazizanga so kunu cha kuzineŵa maji.’

Munthukazi uyu wagomezganga kuti Yesu wakamba maji chayingu. Kweni Yesu wakambanga za uneneska waku Chiuta ndi ufumu waki. Uneneska uwu we nge maji ngakupaska umoyu ndipu ukhoza kupaska munthu umoyu wamuyaya.

Sonu Yesu wangukambiya munthukazi uyu kuti: ‘Lutani mukadani arumu ŵinu ndipu mukazi so.’

Munthukazi yo wangumuka kuti: ‘Ndilivi munthurumi.’

Yesu wangukamba kuti: ‘Mwamuka umampha. Kweni mukuyirwapu ndi anthurumi ŵankhondi, ndipu munthurumi yo mwenayu sonu ndi murumu winu cha.’

Munthukazi uyu wanguzizwa chifukwa vosi ivi venga vawuneneska. Kumbi Yesu wanguviziŵa wuli vosi ivi? Chenga chifukwa chakuti Yesu wenga Wakulayizgika yo wangutumika ndi Chiuta ndipu Chiuta ndiyu wamukambiyanga vosi ivi. Sonu akusambira aku Yesu anguwe ko anguluta ndipu yiwu anguzizwa kuwona kuti Yesu waŵeleŵeta ndi munthukazi wa ku Samaria.

Kumbi tisambiranji mu nkhani iyi? Tisambira kuti Yesu watanja ŵanthu a mitundu yosi. Ndipu nasi titenere kuja nge iyu. Tingaŵanaŵananga cha kuti ŵanthu anyaki mbaheni chifukwa chakuti mbamtundu unyaki. Yesu wakhumba kuti ŵanthu a mitundu yosi aziŵi uneneska wo ulongozge ku umoyu wambula kumala. Ndipu isi nasi titenere kuwovya ŵanthu kusambira uneneska.

Yohane 4:5-43; 17:3.



Mafumbu

  • Kumbi nchifukwa wuli Yesu wanguma pachisimi ku Samaria ndipu wamukambiyanganji munthukazi yo wenga pachisimi?
  • Nchifukwa wuli munthukazi uyu wanguzizwa, nanga Yesu wangumukambiyanji, ndipu nchifukwa wuli wangumukambiya viyo?
  • Kumbi munthukazi uyu waŵanaŵananga kuti Yesu wakambanga maji nga mtundu wuli, kweni ndi maji wuli ngo Yesu wakambanga?
  • Nchifukwa wuli munthukazi uyu wanguzizwa kuti Yesu waziŵanga vakukwaskana ndi iyu, nanga kumbi iyu wanguviziŵa wuli?
  • Kumbi tingasambiranji pankhani yeniyi?

Mafumbu ngakusazgiyapu

  • Ŵerenga Yohane 4:5-43.

    Mwakulondo vo Yesu wanguchita, kumbi titenele kuŵawona wuli ŵanthu amitundu yinyaki pamwenga banja lo akuliyamu? (Yoha. 4:9; 1 Ŵako. 9:22; 1 Timo. 2:3, 4; Tito 2:11)

    Kumbi ndi vyandulu vauzimu nivi vo munthu wasaniya chifukwa cha kuja wakusambira waku Yesu? (Yoha. 4:14; Yesa. 58:11; 2 Ŵako. 4:16)

    Kumbi tingalongo wuli kulumba nge mo wanguchitiya munthukazi wa Chisamaria yo wenga wakukhumbisiska kukambiya anyaki vo wangusambira? (Yoha. 4:7, 28; Mate. 6:33; Luka 10:40-42)