Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 89: Yesu Watowesa Nyumba Yakusopiyamu

Nkhani 89: Yesu Watowesa Nyumba Yakusopiyamu

YESU wawoneka kuti wakwiya ukongwa. Kumbi wachiziŵa chifukwa cho wakwiyiya viyo? Nchifukwa chakuti ŵanthu yaŵa ŵe panyumba yakusopiyamu yaku Chiuta ku Yerusalemu, aryiya ŵanthu masuku pamutu. Yiwu atiŵaryiya ndalama zinandi ŵanthu wo ŵaza kuzisopa Chiuta.

Yesu wangugubuduza mathebulu nga ndalama

Kumbi waziwona ng’ombi, mbereri ndi nkhunda zo? Ŵanthu yaŵa aguliskiya nyama izi panyumba yakusopiyamu. Kumbi wachiziŵa chifukwa chaki? Chenga chifukwa chakuti Ayisraele akhumbanga nyama ndi nkhunda kuti apereki sembi kwaku Chiuta.

Dangu laku Chiuta lakambanga kuti asani m’Yisraele wabuda, waperekengi sembi kwaku Chiuta. Kweniso penga nyengu zinyaki zo Ayisraele akhumbikanga kupereka sembi. Sonu kumbi m’Yisraele watingi wazitongi pani nkhunda ndi nyama zakuti wapereki sembi kwaku Chiuta?

Ayisraele anyaki aŵetanga nkhunda ndi nyama. Ndipu ndizu aperekanga sembi. Kweni Ayisraele anandi ŵengavi nkhunda pamwenga nyama yeyosi. Ndipuso anyaki ajanga kutali ukongwa ndi ku Yerusalemu, mwakuti atingi afiskengi cha kwenda ndi viŵetu vawu kuluta ku nyumba yakusopiyamu. Sonu ŵanthu azanga kuzigula nyama pamwenga nkhunda zo akhumbanga panyumba yakusopiyamu. Kweni akuguliska malonda yaŵa, aduliskanga ukongwa nyama zawu. Yiwu abiyanga ŵanthu. Kweniso akhumbikanga cha kuguliskiya malonda ngawu panyumba yakusopiyamu yaku Chiuta.

Ichi ndichu chifukwa chaki Yesu wangukwiyiya ukongwa. Sonu iyu wangugudubuwa mathebulu ngawu nga ndalama, ndi kumbininiska ndalama zosi. Kweniso wangupanga likhwechu la vingwi ndipu wangukhweme nyama zosi kubwalu kwa nyumba yakusopiyamu. Yesu wangulamula ŵanthu wo aguliskanga nkhunda kuti: ‘Tuzganimu ivi munu! Muleke limu kusambuska nyumba ya Ada kuŵa yakusaniliyamu ndalama zinandi.’

Panyengu iyi akusambira anyaki aku Yesu ŵenga nayu limoza panyumba yakusopiyamu, ku Yerusalemu. Yiwu anguzizwa kuwona vo Yesu wachitanga. Pavuli paki yiwu angukumbuka mazu ngo nge m’Bayibolo ngakukwaskana ndi Mwana waku Chiuta ngakuti: ‘Chanju cha panyumba yaku Chiuta chazamukole nge ndi motu mukati mwaki.’

Yesu we ku Yerusalemu, wanguchita nawu Phaska, ndipuso wanguchita vakuziziswa vinandi. Pavuli paki, wangutuwaku ku Yuda ndipu wangwamba ulendu wakuwere ku Galile. Kweni we munthowa, wangupitiya ku Samaria. Tiyi tiwoni vo vinguchitika kwenuku.

Yohane 2:13-25; 4:3, 4.



Mafumbu

  • Nchifukwa wuli ŵanthu aguliskanga viŵetu panyumba yakusopiyamu?
  • Nchifukwa wuli Yesu wangukwiya?
  • Nge mo uwone pachithuthuzi, kumbi Yesu wachitanji, nanga wanguŵalamulanji ŵanthu wo aguliskanga nkhunda?
  • Kumbi akulondo ŵaku Yesu angukumbukanji ŵati awona vo iyu wachitanga?
  • Kumbi Yesu wangupitiya nunkhu wachiwere ku Galile?

Fumbu lakusazgiyapu

  • Ŵerenga Yohane 2:13-25.

    Pakuwona mo Yesu wangukwiyiya ŵanthu akusintha ndalama panyumba yakusopiyamu, kumbi isi titenele kuyiwona wuli nkhani ya kuchita malonda pa Nyumba Yaufumu? (Yoha. 2:15, 16; 1 Ŵako. 10:24, 31-33)