Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 87: Yesu we M’nyumba Yakusopiyamu

Nkhani 87: Yesu we M’nyumba Yakusopiyamu

AMUWONI mwana yo waŵeleŵeta ndi ŵanthu wo. Yiwu mbasambizi a m’nyumba yakusopiyamu yaku Chiuta, ku Yerusalemu. Ndipu mnyamata yo ndi Yesu. Panyengu iyi, iyu wakuwaku kamanavi ndipu we ndi vyaka 12.

Asambizi yaŵa azizwa ukongwa kuti Yesu waziŵa vinandi vakukwaskana ndi Chiuta kweniso vinthu vo vikulembeka m’Bayibolo. Kweni nchifukwa wuli Yosefe ndi Mariya palivi yapa? Kumbi yiwu ŵepani? Tiyi tiwoni.

Yesu wakambiskana ndi asambizi

Chaka chechosi Yosefe walutanga ku Yerusalemu ndi banja laki ku phwandu lapade la Phaska. Ulendu wakutuwa ku Nazerete kuchifika ku Yerusalemu wenga utali ukongwa. Panyengu iyi pengavi yo wenga ndi galimotu kweniso kwengavi sitima za pamtunda. Ŵanthu anandi ayendanga pasi ndipu ulendu uwu waŵatoliyanga mazuŵa ngatatu kuti akafiki ku Yerusalemu.

Panyengu iyi Yosefe wenga ndi banja likulu. Ndipu Yesu wenga ndi avurwa ŵaki kweniso azichi ŵaki wo apapi ŵaki akhumbikanga kuŵaphwere. Chaka ichi, Yosefe ndi Mariya ndi ŵana ŵawu wosi angwenda ulendu utali kuwere so ku Nazarete. Yiwu aŵanaŵananga kuti Yesu wenga ndi ŵanthu anyaki wo ŵenga nawu limoza pa ulendu uwu. Kweni mazulu ŵati apumuwa panthowa, angusaniya kuti Yesu palivi. Yiwu angumupenja kwa abali ŵawu ndipuso kwa anyawu kweni angumusaniya cha. Sonu anguwere so ku Yerusalemu kuchimupenja.

Pakumaliya paki angumusaniya Yesu we ndi asambizi. Iyu wavwisiyanga vo akambanga ndipu waŵafumbanga mafumbu. Ndipu ŵanthu wosi anguzizwa ndi zeru zo Yesu wenga nazu. Kweni Mariya wangukamba kuti: ‘Wamwana, nchifukwa wuli watisuzga viyo? Ini ndi awusu tasuzgika maŵanaŵanu kukupenja.’

Sonu Yesu wangumuka kuti: ‘Nchifukwa wuli mwandipenjanga? Kumbi mwaziŵanga cha kuti nditenere kusanirika m’nyumba ya Ada?’

Yesu wayanjanga kusanirika ku malu ngo wangasambiraku zaku Chiuta. Kumbi isi nasi titenere cha kuchita viyo? Yesu we ku Nazarete, sabata yeyosi wayanjanga kuluta ku mawunganu kuchisopa. Chifukwa chakuti nyengu zosi iyu wavwisiyanga, waziŵanga vinthu vinandi va m’Bayibolo. Tiyi tije ngati Yesu ndipu tilondongi vo iyu wachitanga.

Luka 2:41-52; Mateyu 13:53-56.



Mafumbu

  • Kumbi pachithuthuzi yapa ndipu Yesu we ndi vyaka vilinga, nanga wenga pani?
  • Kumbi Yosefe wachitanganji ndi banja laki chaka chechosi?
  • Kumbi pati pajumpha zuŵa limoza ŵe paulendu wakuwere kwawu, nchifukwa wuli Yosefe ndi Mariya anguwere ku Yerusalemu?
  • Kumbi Yosefe ndi Mariya anguchimusaniya pani Yesu, nanga nchifukwa wuli ŵanthu azizwanga nayu?
  • Kumbi Yesu wanguŵamukanji anyina a Mariya?
  • Kumbi tingaja wuli ngati Yesu pankhani ya kusambira zaku Chiuta?

Mafumbu ngakusazgiyapu

  • Ŵerenga Luka 2:41-52.

    Chinanga wuli Dangu lazomerezganga anthurumi pe kuti ndiwu alutengi ku phwandu lapachaka, kumbi Yosefe ndi Mariya nchakuwoniyapu chamampha wuli kwa apapi mazuŵa nganu? (Luka 2:41; Mara. 16:16; 31:12; Ntha. 22:6)

    Kumbi Yesu wangulongo wuli chakuwoniyapu chamampha kwa achinyamata mazuŵa nganu pankhani yakuvwiya apapi ŵawu? (Luka 2:51; Mara. 5:16; Ntha. 23:22; Ŵako. 3:20)

  • Ŵerenga Mateyu 13:53-56.

    Zumbuwa mazina nga abali ŵaki aku Yesu ŵanayi wo azumbulika m’Bayibolo, ndipu ŵaŵi mwa abali ŵaki yaŵa angugwiriskikiya nchitu wuli mu mpingu wachikhristu? (Mate. 13:55; Machi. 12:17; 15:6, 13; 21:18; Ŵaga. 1:19; Yako. 1:1; Yuda 1)