Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 85: Yesu Wanguwiya M’khola

Nkhani 85: Yesu Wanguwiya M’khola

KUMBI wamuziŵa bonda yo? Bonda yo ndi Yesu. Yapa ndipu wawaku waka. Iyu wawiya m’khola, sonu Mariya wakhumba kumugoneka mwakuryiya mahachi ndi viŵetu vinyaki. Kweni nanga nchifukwa wuli Mariya ndi Yosefe ŵenga kwenuku ndi nyama zawu? Kumbi yanga ngenga malu ngakuti mwana wangawiyaku?

Awa. Yiwu ŵe kwenuku chifukwa chakuti, yo wawusanga charu cha Roma, Kaisare Augusto ndiyu wangupereka dangu lakuti weyosi wawere ku msumba weniwo wakuwiya kuti wakalembeski zina laki mu buku. Yosefe nayu wanguwiya ku Betelehemu kwenuku. Kweni iyu ndi Mariya ŵati afika angusaniya kuti malu ngamala. Sonu ndichu chifukwa chaki anguza m’khola ndi nyama zawu. Ndipu zuŵa lenilo, Mariya wangubala Yesu. Mwana yo wengavi suzgu lelosi nge po utimuwone yapa.

Yosefe, Mariya ndi Yesu

Kumbi waŵawona aliska wo atuza kuziwona Yesu? Yiwu aliskanga mbereri zawu kudondu ndi usiku ndipu ukweru wakuŵala ukongwa unguŵaliya penipo ŵenga. Yo wanguŵala wenga mungelu. Ndipu aliska anguchita mantha ukongwa. Sonu mngelu yo wanguŵakambiya kuti: ‘Mungawopanga cha. Ndaza kuzikukambiyani uthenga wamampha. Msanawale, ku Betelehemu kwawa Khristu Ambuya. Iyu wazamutaska ŵanthu. Mwakumusaniya amukulunga mu salu ndipu amugoneka mwakuryiya viŵetu.’ Mwamabuchibuchi angelu anandi anguza ndipu angwamba kutumbika Chiuta. Ndipu nyengu yeniyo aliska anguluta kuchipenja Yesu ndipu angumusaniya.

Kumbi utichiziŵa chifukwa cho Yesu waliri wapade? Kumbi utimuziŵa kuti iyu ndiyani weniukongwa? Kumbi ukumbuka kuti mu nkhani yakwamba ya m’buku linu tikusambirapu za Mwana wakwamba waku Chiuta? Mwana uyu wagwiranga nchitu limoza ndi Yehova pakulenga kuchanya ndi charu, kweniso vinthu vosi. Iyu ndiyu Yesu.

Yehova wanguto umoyu wa Mwana waki kuwutuzga kuchanya ndi kuwuŵika m’moyu mwaku Mariya. Nyengu yeniyo, mwana yo wangwamba kukuwa m’moyu mwaku Mariya nge po ŵana wosi akuliya m’moyu mwa anyinawu. Kweni iyu wenga Mwana waku Chiuta. Pakumaliya paki, Yesu wanguwiya m’khola, ku Betelehemu. Kumbi sonu wachiziŵa chifukwa cho angelu angukondwe ukongwa ndi kukambiya ŵanthu kuti Yesu wawaku?

Luka 2:1-20.



Mafumbu

  • Kumbi mwana yo we pachithuthuzi po ndiyani, nanga Mariya wakhumba kumugoneka pani?
  • Nchifukwa wuli Yesu wanguwiya m’khola la viŵetu?
  • Nge mo uwone pachithuthuzi, kumbi anthurumi wo asere m’khola mbayani, nanga mungelu wanguŵakambiyanji?
  • Kumbi nchifukwa wuli Yesu ngwapade?
  • Nchifukwa wuli Yesu wadanika kuti Mwana waku Chiuta?

Mafumbu ngakusazgiyapu

  • Ŵerenga Luka 2:1-20.

    Kumbi Kaisare Augusto, wanguchitanji kuti uchimi wakukwaskana ndi kuwa kwaku Yesu ufiskiki? (Luka 2:1-4; Mika 5:2)

    Kumbi munthu weyosi pakuyija wangaja wuli mu gulu lo likambika kuti ‘ŵanthu wo Chiuta wakondwa nawu’? (Luka 2:14; Mate. 16:24; Yoha. 17:3; Machi. 3:19; Ŵahe. 11:6)

    Aliska akujiyuyuwa a ku Yudeya ŵenga ndi chifukwa chamampha chakukondwe chifukwa cha kuwaku kwa Mtaski, nanga ateŵeti aku Chiuta mazuŵa nganu ŵe ndi chifukwa chikulu nichi chakukondwe? (Luka 2:10, 11; Ŵaefe. 3:8, 9; Chivu. 11:15; 14:6)