Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 84: Mungelu Waza Kwaku Mariya

Nkhani 84: Mungelu Waza Kwaku Mariya

MUNTHUKAZI wakutowa uyu ndi Mariya. Iyu wenga wa Chiyisraele, ndipu wajanga mu tawuni ya Nazerete. Chiuta waziŵanga kuti Mariya wenga wankharu yamampha. Ndichu chifukwa chaki wangutuma mungelu waki Gabriele kuchikamba nayu. Kumbi waviziŵa vo Gabriele wanguza kuzikambiya Mariya? Tiyi tiwoni.

Gabriele wangumukambiya kuti: ‘Chimangu chiŵi nawi, wakutumbikika ukongwa iwi. Yehova we nawi.’ Mariya wenga wechendamuwonepu munthu uyu. Iyu wangusuzgika maŵanaŵanu chifukwa waziŵanga cha cho munthu yo wang’anamuwanga. Sonu nyengu yeniyo, Gabriele wangumuwovya kuti waleki kuchita mantha.

Mariya

Iyu wanguti: ‘Ungawopanga cha Mariya, Yehova wakondwa nawi ukongwa. Ndichu chifukwa chaki wakuchitiyengi chinthu chakuziziswa. Pambula kuswera yapa ubalengi mwana. Ndipu uzimudani zina lakuti Yesu.’

Gabriele wangukamba so kuti: ‘Iyu wazamuja mula ndipu wazamudanika kuti Mwana waku Chiuta Wamachanya. Yehova wazakumuŵika kuja fumu nge po wenge Davidi. Kweni Yesu wazamuja fumu ya muyaya ndipu ufumu waki wazamumala cha.’

Mariya wangufumba kuti: ‘Kumbi ivi vazamuchitika wuli, pakuti ini ndechendayirwi. Ndipuso ndechendajepu ndi munthurumi, sonu ndingabala wuli mwana?’

Gabriele wangumuka kuti: ‘Nthazi yaku Chiuta yizengi paku iwi. Ndipu mwana yo wazamudanika kuti Mwana waku Chiuta.’ Ndipu wangukamba so kuti: ‘Kumbuka mubali waku Elizabeti. Ŵanthu akambanga kuti wenga wakukota ukongwa mwakuti wangabala ŵana cha. Kweni pambula kuswera yapa iyu wabalengi mwana munthurumi. Sonu ungawona kuti palivi chinthu cho Chiuta wangatondeka kuchita.’

Nyengu yeniyo Mariya wangukamba kuti: ‘Ndini kapolu waku Yehova. Venivo mwakamba vichitiki kwaku ini.’ Ndipu pavuli paki mungelu wangutuwapu.

Mariya wangusoka kuluta kwaku Elizabeti. Ndipu Elizabeti wati wavwa mazu ngaku Mariya, mwana yo wenga m’moyu mwaku Elizabeti wanguzantha ndi likondwa. Elizabeti wanguzazika ndi mzimu waku Chiuta ndipu wangukambiya Mariya kuti: ‘Ndiwi wakutumbikika pa anthukazi wosi.’ Sonu Mariya wanguja ndi Elizabeti kwa myezi pafupifupi yitatu ndipu pavuli paki wanguwere ku Nazerete.

Sonu Mariya wenga pafupi kutorana ndi Yosefe. Kweni Yosefe wati wavwa kuti Mariya waŵengi ndi mwana, iyu wangukhumba cha kumuto. Ndipu mungelu waku Chiuta wangumukambiya kuti: ‘Ungawopanga cha kuto Mariya kuti waŵi muwoli waku, chifukwa Chiuta ndiyu wachitiskengi kuti iyu waŵi ndi mwana munthurumi.’ Sonu Mariya ndi Yosefe angutorana ndipu angulindizga kuti Yesu waweku.

Luka 1:26-56; Mateyu 1:18-25.



Mafumbu

  • Kumbi munthukazi yo we pachithuthuzi ndi yani?
  • Kumbi Gabriele wangumukambiyanji Mariya?
  • Kumbi Gabriele wangumukonkhoske wuli Mariya kuti wazamuja ndi mwana, chinanga wuli wenga wechendayirwi?
  • Nchinthu wuli chinguchitika Mariya wati waluta kwachicheza kwa mubali waki Elizabeti?
  • Kumbi Yosefe wanguŵanaŵana kuchitanji wati wavwa kuti Mariya waŵengi ndi mwana, nanga nchifukwa wuli wangusintha maŵanaŵanu ngaki?

Mafumbu ngakusazgiyapu

  • Ŵerenga Luka 1:26-56.

    Kumbi nchifukwa wuli Yesu wanguleka kutole ubudi, Yehova wati wasamusiya umoyu waki m’moyu mwaku Mariya? (Haga. 2:11-13; Luka 1:35; Yoha. 6:69; Ŵahe. 7:26; 10:5)

    Kumbi Yesu wangulonde wuli ulemu chinanga mphanyengu yo wenga wechendawi? (Luka 1:41-43)

    Kumbi Mariya wakupereka chakuwoniyapu chamampha wuli kwa Akhristu wo alonde mwaŵi wapade wa uteŵeti mazuŵa nganu? (Luka 1:38, 46-49; 17:10; Ntha. 11:2)

  • Ŵerenga Mateyu 1:18-25.

    Chinanga wuli Yesu wangupaskika cha zina laki lakuti Immanuele, kumbi vo wanguchita nge munthu vilongo wuli kuti wangufiska vo zina lo lang’anamuwanga? (Mate. 1:22, 23; Yoha. 14:8-10; Ŵahe. 1:1-3)

Ziŵani Vinandi

YEZGANI CHIVWANU CHAWU

Mariya—‘Nde Muŵanda Waku Yehova’

Kumbi vo Mariya wangumuka mungelu Gabriele vingulongo kuti wenga ndi chivwanu wuli? Kumbi ndi mijalidu yinyaki yamampha niyi yo wangulongo?