Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 101: Yesu Wabayika

Nkhani 101: Yesu Wabayika

AWONA vinthu vakupaska chitima vo vichitika yapa. Yesu wabayika. Ŵanthu amupayika pachimiti. Ndipu amukhoma mizumali m’manja ndi m’malundi. Kumbi nchifukwa wuli ŵanthu amuchitiya ivi Yesu?

Yesu watufwa

Chenga chifukwa chakuti ŵanthu anyaki atinkhanga Yesu. Kumbi waŵaziŵa kuti ŵenga ayani? Yumoza waku yiwu wenga Satana Diabolo. Iyu ndiyu wanguchitiska Adamu ndi Eva kuti aleki kuvwiya Yehova. Ndipu Satana ndiyu wanguchitiska so kuti arwani aku Yesu achiti vinthu vakofya ivi.

Yesu wechendakhomeki pachimiti, arwani ŵaki angumuchitiya vinthu vankhaza. Kumbi ukumbuka po anguziya m’munda wa Gesemane kuti akamuko Yesu? Kumbi arwani wo ŵenga ayani? Yiwu ŵenga alongozgi a visopa. Tiyi tiwoni vo vinguchitika pavuli paki.

Sonu alongozi a visopa ŵati amuko Yesu, akutumika ŵaki anguthaŵa. Yiwu angumusiya yija Yesu ndi arwani ŵaki, chifukwa ŵenga ndi mantha ukongwa. Kweni akutumika ŵaŵi, Petro ndi Yohane anguthaŵiya kutali cha. Yiwu anguŵalondo kuti awonengi vo vimuchitikiyengi Yesu.

Asembi anguluta ndi Yesu kwaku Anase, yo kali wenga mula wa asembi. Kweni wumba wa ŵanthu ungujariskaku cha. Pavuli paki, anguluta ndi Yesu kwaku Kayafa yo wenga mula wa asembi panyengu yo. Ndipu alongozgi a visopa anandi anguwungana panyumba yaki.

Sonu panyumba yaku Kayafa yapa penga mayeseru. Ŵanthu aŵadaniyanga m’nyumba kuti akakambengi vinthu vaboza vakukwaskana ndi Yesu. Alongozi a visopa wosi angukamba kuti: ‘Yesu watenere kubayika.’ Ndipu angumupuma ndi kumufunyiya mata kumasu.

Vinthu vosi ivi vichichitika, Petro wenga pabwalu pa nyumba yaku Kayafa. Pazuŵa lo, kunguzizira ukongwa usiku ndipu ŵanthu angupemba motu. Yiwu achiwotha motu, msungwana wanchitu wati wawona Petro wanguti: ‘Munthu uyu nayu wenga limoza ndi Yesu.’

Petro wangumuka kuti: ‘Awa ndenga nayu limoza cha!’

Ŵanthu angumukambiya Petro katatu kuti iyu wenga ndi Yesu. Kweni katatu kosi iyu wangukana. Sonu Petro wati wakana kachitatu, Yesu wangung’anamuka ndi kumulereska. Petro wanguchita chitima ukongwa chifukwa cha boza lo wangukamba ndipu wangutuwapu, kuluta kuchiliya.

Sonu pa Chinkhondi lumwi lati latuwa, asembi angutole Yesu mu Mphara yikulu ya milandu. Yiwu akambiskananga vo akhumbanga kuchita ndi Yesu. Pavuli paki anguluta nayu kunyumba kwaku Pontio Pilato, yo wawusanga mu chigaŵa cha Yuda.

Asembi angukambiya Pilato kuti: ‘Uyu ndi munthu muheni, ndipu watenere kubayika.’ Pilato wati wafumba Yesu wanguti: ‘Palivi chinthu chiheni chechosi cho munthu uyu wachita.’ Sonu Pilato wangutumiza Yesu kwaku Herode Antipasi. Herode ndiyu wawusanga m’charu cha Galile, kweni wajanga ku Yerusalemu. Iyu nayu wanguwonapu chiheni chechosi cha cho Yesu wanguchita, sonu wangumutumiza so kwaku Pilato.

Pilato wakhumbanga kufwatuwa Yesu. Kweni arwani ŵaki akhumbanga kuti munthu yo wenga m’jeri ndiyu wafwatuliki. Munthu uyu wenga munkhungu ndipu zina laki lenga Baraba. Sonu nyengu ye pafupi kukwana 12 koloku musana, Pilato wangutuzgiya Yesu pabwalu. Ndipu iyu wangukambiya ŵanthu kuti: ‘Awonani fumu yinu!’ Kweni asembi ŵala angudanirizga kuti: ‘Mutoni! Kamubayeni! Kamubayeni!’ Sonu Pilato wangufwatuwa Baraba ndipu ŵanthu anguto Yesu kuti akamubayi.

Sonu kwechendafipi pa Chinkhondi, Yesu wangukhomeka pachimiti. Iyu wangupayikika pamoza ndi ankhungu. Munyaki wenga kumaryi ndipu munyaki wenga kumazge, chinanga wuli pachithuthuzi ichi ungaŵawona cha. Yesu we pafupi kufwa, munkhungu yumoza wangukambiya Yesu kuti: ‘Muzindikumbuki mu ufumu winu.’ Ndipu Yesu wangumuka kuti: ‘Nditikulayizga kuti, wazamuja ndi ini mu Paradayisu.’

Kumbi ili lenga layizgu lamampha cha? Kumbi wamuziŵa paradayisu yo Yesu wakambanga? Kumbi paradayisu yo Chiuta wangupanga pakwamba, wenga pani? Wenga pacharu chapasi. Panyengu yo Yesu wazamuwusiya nge fumu kuchanya, wazakumuyuska munthu uyu kuti wazikondwi ndi umoyu mu Paradayisu mufya pacharu chapasi. Kumbi ivi vititikondweska cha?

Mateyu 26:57-75; 27:1-50; Luka 22:54-71; 23:1-49; Yohane 18:12-40; 19:1-30.



Mafumbu

  • Kumbi munthu wakwamba yo wanguchitiska kuti Yesu wabayiki wenga yani?
  • Kumbi Yesu wati wakoleka ndi alongozgi avisopa, akutumika ŵaki anguchitanji?
  • Kumbi nchinthu wuli cho chinguchitika kunyumba yaku Kayafa yo wenga mula wa asembi?
  • Nchifukwa wuli Petro wangutuwapu ndi kuluta kuchiliya?
  • Yesu wati wawezgeke kwaku Pilato, kumbi asembi ŵara angudanirizga kuti wuli?
  • Nchinthu wuli cho chinguchitikiya Yesu pazuŵa la Chinkhondi ndi msana, nanga iyu wangumulayizganji munthu muheni yo wangupayikika so pachimiti?
  • Kumbi Paradayisu yo Yesu wangukamba wazamukuŵa pani?

Mafumbu ngakusazgiyapu

  • Ŵerenga Mateyu 26:57-75.

    Kumbi akuyeruzga milandu ŵa kukhoti likulu la Ayuda angulongo wuli kuti mitima yawu yenga yiheni? (Mate. 26:59, 67, 68)

  • Ŵerenga Mateyu 27:1-50.

    Kumbi nchifukwa wuli tingakamba kuti Yuda wangujivwiya lisungu laboza? (Mate. 27:3, 4; Marko 3:29; 14:21; 2 Ŵako. 7:10, 11)

  • Ŵerenga Luka 22:54-71.

    Kumbi ndi sambiru wuli lo tisambira pa mo Petro wangukaniya Yesu pausiku wo iyu wanguperekeke ndi kumangika? (Luka 22:60-62; Mate. 26:31-35; 1 Ŵako. 10:12)

  • Ŵerenga Luka 23:1-49.

    Kumbi Yesu wanguchita wuli ndi vinthu vambula urunji vo vingumuchitikiya, nanga isi tisambiranjipu pankhani yeniyi? (Luka 23:33, 34; Ŵaro. 12:17-19; 1 Pet. 2:23)

  • Ŵerenga Yohane 18:12-40.

    Chinanga kuti nyengu yinyaki Petro wenga ndi mantha chifukwa cha kopa ŵanthu, pavuli paki wanguzisintha ndi kuja wakutumika wamampha ukongwa, kumbi fundu yeniyi yititilongonji? (Yoha. 18:25-27; 1 Ŵako. 4:2; 1 Pet. 3:14, 15; 5:8, 9)

  • Ŵerenga Yohane 19:1-30.

    Kumbi Yesu waviwonanga wuli vinthu vakuliŵavu? (Yoha. 2:1, 2, 9, 10; 19:23, 24; Mate. 6:31, 32; 8:20)

    Kumbi mazu ngo Yesu wangukamba wachifwa, ngangulongo wuli kuti iyu wangupunda pa kukweza muwusu waku Yehova? (Yoha. 16:33; 19:30; 2 Pet. 3:14; 1 Yoha. 5:4)