Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 100: Yesu M’munda wa Gesemane

Nkhani 100: Yesu M’munda wa Gesemane

YESU ndi akutumika ŵaki ŵati atuwa m’chipinda chapachanya anguluta ku munda wa Gesemane. Yiwu ayanjanga kuluta ku munda uwu. Sonu Yesu wangukambiya akutumika ŵaki kuti aje masu ndipuso kuti arombengi. Iyu wanguluta pataliku kamanavi ndipu wangusindama kuti warombi.

Pavuli paki, Yesu wanguwere ko kwenga akutumika ŵaki. Kumbi iwi uŵanaŵana kuti yiwu achitanganji? Yiwu agonanga. Yesu wanguŵakambiya katatu kosi kuti aje masu, kweni nyengu yosi yo Yesu waziyanga waŵasaniyanga kuti agona. Yesu wati waza kakumaliya wanguŵafumba kuti: ‘Mungagona wuli imwi panyengu iyi? Ola lakuti ndiperekeki kwa arwani ŵangu lafika.’

Nyengu yeniyo kunguvwika chiwawa cha wumba wa ŵanthu. Ŵanthu anguza ndi malipanga, vibonga kweniso vakumbulikiya. Sonu ŵati afika pafupi, munthu munyaki wangutuwapu pa wumba wa ŵanthu ndi kuluta ko wenga Yesu. Iyu wangufyofyontha Yesu, nge mo uwone pachithuthuzi ichi. Munthu uyu wenga Yuda mKeriote. Kumbi nchifukwa wuli iyu wangufyofyontha Yesu?

Yudasi wapereka Yesu

Yesu wangufumba kuti: ‘Yuda, kumbi utindifyofyontha kuti undipereki?’ Iyu wanguchita ivi kuti ŵanthu wo ŵenga nayu amuziŵi Yesu yo akhumbanga. Sonu arwani aku Yesu anguza kuzimuko. Kweni Petro wanguzomerezga cha kuti ako Yesu kwambula kupumana nawu. Iyu wangusolo lipanga laki kuti wakhati munthu yo wenga nayu pafupi. Sonu m’malu mwakuti lipanga lo likhati mutu wa munthu yo, lingumudumuwa waka gutu la kumaryi. Kweni Yesu wanguwezgiyapu gutu la munthu yo ndipu wanguchira.

Yesu wangukambiya Petro kuti: ‘Weze lipanga laku m’malu mwaki. Kumbi uziŵa cha kuti ini ndikhoza kupempha Ada kuti atumi angelu masawuzandi nganandi kuti azinditaski?’ Hinya, Chiuta watingi watumengi nadi angelu. Kweni Yesu wangumupempha cha Chiuta kuti watumi angelu, chifukwa waziŵanga kuti nyengu yakuti arwani ŵaki amuko yingukwana. Sonu wanguŵazomerezga kuti amuko. Tiyi tiwoni vo vingumuchitikiya Yesu sonu.

Mateyu 26:36-56; Luka 22:39-53; Yohane 18:1-12.



Mafumbu

  • Kumbi Yesu ndi akutumika ŵaki anguluta pani ŵati atuwa m’chipinda chapachanya, ndipu iyu wanguŵakambiya kuti achitenji?
  • Kumbi Yesu wangusaniyanji wati wawere ko kwenga akutumika ŵaki, ndipu ivi vinguchitika kalinga?
  • Kumbi mbayani wo asere m’munda, nanga Yuda m’Keriote wanguchitanji nge mo uwone pachithuthuzi?
  • Nchifukwa wuli Yuda wangufyofyontha Yesu, nanga Petro wanguchitanji?
  • Kumbi Yesu wangumukambiyanji Petro, nanga nchifukwa wuli Yesu wanguleka kupempha Chiuta kuti wamutumiyi angelu?

Mafumbu ngakusazgiyapu

  • Ŵerenga Mateyu 26:36-56.

    Kumbi nthowa yeniyo Yesu wanguchenye akusambira ŵaki nchakuwoniyapu chamampha wuli ku ŵara a Chikhristu mazuŵa nganu? (Mate. 20:25-28; 26:40, 41; Ŵaga. 5:17; Ŵaefe. 4:29, 31, 32)

    Kumbi Yesu wawonanga wuli kugwiriskiya nchitu vidya va nkhondu asani ŵanthu ayambana? (Mate. 26:52; Luka 6:27, 28; Yoha. 18:36)

  • Ŵerenga Luka 22:39-53.

    Mungelu wati waza kuzikhwimiska Yesu m’munda wa Gesemane, kumbi valongonga kuti Yesu wenga ndi chigomezgu chimana? Konkhoska. (Luka 22:41-43; Yesa. 49:8; Mate. 4:10, 11; Ŵahe. 5:7)

  • Ŵerenga Yohane 18:1-12.

    Kumbi Yesu wanguŵavikiliya wuli akusambira ŵaki ku ŵanthu akususka, nanga isi tisambiranjipu? (Yoha. 10:11, 12; 18:1, 6-9; Ŵahe. 13:6; Yako. 2:25)