Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 94: Yesu Wayanjanga Tiŵana

Nkhani 94: Yesu Wayanjanga Tiŵana

AWONA mo Yesu wakakole kamwana ko. Ukhoza kuwona kuti Yesu waŵayanjanga nadi ŵana. Ŵanthu wo atimulereska mbakutumika ŵaki. Kumbi Yesu watiŵakambiyanji? Tiyi tiwoni.

Yapa ndipu Yesu ndi akutumika ŵaki afika waka kutuwa kutali ko anguluta. Yiwu angwenda ulendu utali. Panyengu yo ŵenga munthowa, akutumika ŵaki asuskananga. Sonu ŵati afika, Yesu wanguŵafumba kuti: ‘Kumbi mwasuskananganji munthowa?’ Kweni Yesu waziŵanga vo yiwu asuskananga. Sonu wanguŵafumbiya dala kuti wawoni asani amukambiyengi.

Yesu ndi mwana

Akutumika ŵaki angumumuka cha chifukwa chakuti asuskananga zakuti mula ndi yani pakati pawu. Akutumika anyaki akhumbanga kuja akuzirwa kuluska anyawu. Kumbi Yesu wanguŵakambiya wuli kuti nkhunanga kukhumba kuja mula kuphara ŵanthu anyaki?

Yesu wangudana kamwana ndipu wangukamika panthazi pawu. Ndipu iyu wangukambiya akusambira ŵaki kuti: ‘Ndikhumba muziŵi kuti, asani mulekengi kusintha ndi kuja ngati ŵana, mwazamusere cha mu ufumu waku Chiuta. Munthu yo wajengi nge mwana uyu ndiyu mula mu ufumu.’ Kumbi uziŵa chifukwa cho Yesu wangukambiya viyo?

Ŵana aŵanaŵanaku cha kuti mula pamwenga wakuzirwa ndiyani pakati pawu. Sonu akutumika aku Yesu akhumbikanga kusambira kuti atenere kuja ngati ŵana wo aleka kususkana zakuti mula pamwenga wakuzirwa ndiyani.

Penga so nyengu yinyaki po Yesu wangulongo kuti wayanjanga ukongwa ŵana. Myezi yimanavi yati yakapu, ŵanthu anyaki anguza ndi ŵana wawu kwaku Yesu. Akutumika ŵaki anguŵakalipiya ŵana wo. Kweni Yesu wanguŵakambiya kuti: ‘Alekeni ŵana wo azi kwaku ini, mungaŵakanizanga cha chifukwa ufumu waku Chiuta ngwa ŵanthu wo ŵe ngati yiwu.’ Pavuli paki Yesu wangunyamuwa tiŵana ndi kutitumbika. Kumbi nkhwakukondweska cha kuziŵa kuti Yesu watanja ŵana?

Mateyu 18:1-4; 19:13-15; Marko 9:33-37; 10:13-16.



Mafumbu

  • Kumbi akutumika asuskananganji munthowa ŵe pa ulendu utali?
  • Nchifukwa wuli Yesu wangumika kamwana panthazi pa akutumika?
  • Kumbi akutumika atingi asambirengi wuli kuja ngati kamwana?
  • Pati papita myezi yimanavi, kumbi Yesu wangulongo wuli kuti wayanjanga ŵana?

Mafumbu ngakusazgiyapu

  • Ŵerenga Mateyu 18:1-4.

    Nchifukwa wuli Yesu wagwiriskiyanga nchitu ntharika pakusambiza? (Mate. 13:34, 36; Marko 4:33, 34)

  • Ŵerenga Mateyu 19:13-15.

    Kumbi ŵana ŵe ndi mijalidu wuli yo tingayilondo asani tikhumba kulonde vitumbiku va Ufumu? (Sumu 25:9; 138:6; 1 Ŵako. 14:20)

  • Ŵerenga Marko 9:33-37.

    Kumbi Yesu wanguŵasambizanji akusambira ŵaki pankhani yakukhumba kuja mura? (Marko 9:35; Mate. 20:25, 26; Ŵaga. 6:3; Ŵafi. 2:5-8)

  • Ŵerenga Marko 10:13-16.

    Kumbi Yesu wenga wakufikirika wuli, nanga ŵara Achikhristu angasambiranji kwaku iyu? (Marko 6:30-34;Ŵafi. 2:1-4; 1 Timo. 4:12)