Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 93: Yesu Waryisa Ŵanthu Anandi

Nkhani 93: Yesu Waryisa Ŵanthu Anandi

NYENGU yinyaki panguchitika chinthu chakofya ukongwa. Yohane M’batizi wangubayika chifukwa chakuti Herodiya muwoli wa fumu wamutinkhanga Yohane. Ndipu wanguchitiska kuti fumu yimudumuwi mutu.

Yesu wati wavwa ivi, wanguchita chitima ukongwa. Iyu wanguluta kwakuyija. Kweni ŵanthu angumulondo mbwenu. Sonu Yesu wati wawona wumba wa ŵanthu wanguŵavwiya lisungu. Ndipu wanguŵakambiya za ufumu waku Chiuta ndipuso wanguchizga akutama ŵawu.

Sonu chakumazulu akusambira ŵaki anguza kwaku Yesu ndi kumukambiya kuti: ‘Nyengu yamala ndipu kunu kulivi ŵanthu. Akambiyeni ŵanthu aluti akajiguliyi chakurya ku mizi yo ye pafupi.’

Yesu waliska ŵanthu anandi

Yesu wangumuka kuti: ‘Angalutanga cha. Imwi muŵapaski chakurya.’ Ndipu Yesu wangufumba Filipu kuti: ‘Kumbi tingachigula pani chakurya cha ŵanthu wosi yaŵa?’

Filipu wangumuka kuti: ‘Pakhumbikengi ndalama zinandi ukongwa kuti tikaguli chakurya chakukwana kuti weyosi waryeku kamanavi.’ Sonu Andreya wangukamba kuti: ‘Pe kamnyamata ko ke ndi viŵandi vinkhondi ndi somba ziŵi. Kweni vingakwana cha kurya ŵanthu wosi yaŵa.’

Yesu wangukamba kuti: ‘Akambiyeni ŵanthu aje pasi.’ Pavuli paki iyu wanguromba kwaku Chiuta ndipu wangubanthuwa viŵandi ndi kumenya somba. Sonu akusambira ŵaki angugaŵiya ŵanthu wosi viŵandi ndi somba. Penga anthurumi 5,000 ndi anthukazi anandi ukongwa kweniso ŵana. Wosi angurya mpaka kuguta. Ndipu akusambira ŵaki angutondo makombu ngakuzaza masokola 12.

Sonu Yesu ndi akusambira ŵaki angukwera boti kuti ayambuki Nyanja ya Galile. Ndi usiku kunguputa chimphepu chikulu ndipu mayiŵa ngatutuzganga boti. Akusambira ŵaki anguchita mantha ukongwa. Ndipu pakati pausiku, anguwona munthu wachiyenda pa maji kunthazi kwawu. Yiwu angukambula mwa mantha chifukwa chakuti angumuziŵa cha munthu yo awonanga.

Yesu wanguŵakambiya kuti: ‘Ndini, mungawopanga cha!’ Kweni yiwu anguvwana mbwenu cha. Sonu Petro wangukamba kuti: ‘Asani ndimwi Ambuya, ndikambiyeni kuti ndiyendi pamaji pakuza kwaku imwi.’ Yesu wangumuka kuti: ‘Zanga.’ Ndipu Petro wangwamba kwenda pamaji. Pavuli paki, wanguchita mantha ndipu wangwamba kubira, kweni Yesu wangumupozomoska.

Vati vakapu ivi, Yesu wanguryisa so ŵanthu masawuzandi nganandi. Panyengu iyi wangugwiriskiya nchitu viŵandi 7 va mkati ndi tisomba timanavi. Ndipu chakurya ichi chingukwana so ŵanthu wosi. Kumbi vakuziziswa cha kuwona po Yesu waphweriyanga ŵanthu? Panyengu yo iyu wazamuwusiya nge fumu yaku Chiuta, taŵanthu tazamudandawula kekosi cha.

Mateyu 14:1-32; 15:29-38; Yohane 6:1-21.



Mafumbu

  • Kumbi nchinthu wuli chakofya cho chinguchitikiya Yohane M’batizi ndipu ivi vingumukwaska wuli Yesu?
  • Kumbi Yesu wanguryisa wuli wumba wa ŵanthu wo amulondonga ndipu chakurya chingujaku chinandi wuli?
  • Nchifukwa wuli akusambira anguchita mantha ndi usiku ndipu nchinthu wuli chinguchitikiya Petro?
  • Kumbi Yesu wanguchita wuli kuti waryisi ŵanthu masawuzandi nganandi kachiŵi?
  • Nchifukwa wuli kwazamuja kwakukondweska panyengu yo Yesu wazamuwusiya pacharu nge Fumu yaku Chiuta?

Mafumbu ngakusazgiyapu

  • Ŵerenga Mateyu 14:1-32.

    Kumbi nkhani ya pa lemba la Mateyu 14:23-32, yititiwovya kuŵanikanji za umunthu waku Petro?

    Kumbi Malemba ngalongo wuli kuti Petro wangukhwima maŵanaŵanu ndipuso wanguleka kuchita vinthu mwakupupuluma? (Mate. 14:27-30; Yoha. 18:10; 21:7; Machi. 2:14, 37-40; 1 Pet. 5:6, 10)

  • Ŵerenga Mateyu 15:29-38.

    Kumbi Yesu wangulongo wuli kuti walumbanga vinthu vakuliŵavu vo vingutuwa kwa Awiski? (Mate. 15:37; Yoha. 6:12; Ŵako. 3:15)

  • Ŵerenga Yohane 6:1-21.

    Kumbi mazuŵa nganu Akhristu angamulondo wuli Yesu pankhani yakuvwiya boma? (Yoha. 6:15; Mate. 22:21; Ŵaro. 12:2; 13:1-4)