Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 86: Ŵanthu Angulongozgeka ndi Nyenyezi

Nkhani 86: Ŵanthu Angulongozgeka ndi Nyenyezi
Akusanda nyenyezi

KUMBI wayiwona nyenyezi yakuŵala ukongwa yo munthu uyu walongo? Ŵanthu yawa atuliya ku Vuma ndipu mbakusanda nyenyezi. Yiwu agomezga kuti nyenyezi yifya iyi yitiŵalongozge ku munthu wakukhumbika ukongwa.

Sonu ŵanthu yaŵa ŵati afika ku Yerusalemu angufumba kuti: ‘Wepani mwana yo wazamuja fumu ya Ayuda?’ Ayisraele adanikanga so kuti “Ayuda.” Ŵanthu yaŵa angukamba kuti: ‘Tinguwona nyenyezi ya mwana uyu panyengu yo tenga ku Vuma, ndipu taza kuzimugwadiya.’

Herode yo wenga fumu mu Yerusalemu wati wavwa za mwana uyu wangukwiya. Iyu wakhumbanga cha kuti fumu yinyaki yizihari ufumu waki. Sonu Herode wangudana asembi ŵala ndipu wanguŵafumba kuti: ‘Kumbi ndi nunkhu ko fumu yakulayizgika yazamuwiya?’ Yiwu angumuka kuti: ‘Bayibolo likamba kuti ku Betelehemu.’

Sonu Herode wangudana ŵanthu wo angutuwa ku Vuma ndipu wanguŵakambiya kuti: ‘Lutani kamupenjeni mwana yo. Asani mwachimusaniya, muzindiziŵiski. Naniso ndikhumba kuti ndiziluti kuchimugwadiya.’ Kweni Herode wapenjenga kuti mwana yo wakamubayi.

Nyenyezi iyi yinguwoneka yiwu ŵati asoka ku Yerusalemu. Pavuli paki, yingulongozga ŵanthu wo ku Betelehemu ndipu yinguma ŵati afika pa malu ngo mwana yo wenga. Ŵanthu wo ŵati asere m’nyumba angusaniya Mariya ndi mwana waki Yesu. Yiwu anguza ndi vawanangwa ndipu angumupaska Yesu. Kweni pavuli paki, Yehova wanguŵatcheŵeska ŵanthu wo kuporote m’malotu kuti angaweriyanga so kwaku Herode cha. Sonu yiwu angupitiya nthowa yinyaki pakuwere kwawu.

Herode wangukwiya ukongwa wati wavwa kuti ŵanthu wo angutuwa ku Vuma aluta kwawu. Sonu iyu wangulamula kuti ŵana wosi anthurumi a mu Betelehemu a vyaka viŵi kusikiya pasi abayiki. Kweni Yehova wangumutcheŵeske limu Yosefe mu malotu ndipu iyu ndi banja laki anguthaŵiya ku Egipiti. Pavuli paki Yosefe wati wavwa kuti Herode wakufwa, iyu wanguto Mariya ndi Yesu kuwere nawu ku Nazarete. Kwenuku ndiku Yesu wangukuliya.

Kumbi uŵanaŵana kuti ndiyani yo wanguchitiska kuti nyenyezi yifya yiŵali? Kumbuka kuti ŵanthu ŵa anguluta ku Yerusalemu ŵati awona nyenyezi. Satana Diabolo, wakhumbanga kubaya Mwana waku Chiuta ndipu wanguziŵa kuti Fumu Herode ya ku Yerusalemu yazamuyesa kumubaya. Sonu Satana watenere kuti ndiyu wanguchitiska nyenyezi yo kuŵala.

Mateyu 2:1-23; Mika 5:2.



Mafumbu

  • Kumbi anthurumi wo ŵe pachithuthuzi po mbayani, nanga nchifukwa wuli yumoza yo walongo nyenyezi yo yaŵala ukongwa?
  • Nchifukwa wuli Fumu Herode yingukwiya, nanga yinguchitanji?
  • Kumbi nyenyezi yakuŵala ukongwa yinguŵalongozge nunkhu ŵanthu, nanga nchifukwa wuli yiwu angupitiya nthowa yinyaki pakuwere kwawu?
  • Kumbi Herode wangulamulanji, nanga chenga chifukwa wuli?
  • Kumbi Yehova wangukambiya Yosefe kuti wachitenji?
  • Kumbi ndiyani wanguchitiska kuti nyenyezi yiŵali, nanga nchifukwa wuli?

Fumbu lakusazgiyapu

  • Ŵerenga Mateyu 2:1-23.

    Panyengu yo akusanda nyenyezi anguza kuziwona Yesu, kumbi iyu wenga ndi vyaka vilinga, nanga wajanga pani? (Mate. 2:1, 11, 16)