Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 82: Mordikayi ndi Estere

Nkhani 82: Mordikayi ndi Estere

TIYI tiwere dankha kuvuli, vyaka vimanavi Ezra wechendaluti ku Yerusalemu. Mordikayi ndi Estere ndiwu ŵenga Ayisraele akuzwira mu ufumu wa Perese. Estere wenga fumukazi ndipu mzichi waki Mordikayi wenga wachiŵi kwa fumu. Tiyi tiwoni mo vinguchitikiya.

Apapi ŵaku Estere angufwa iyu weche mwanamana ukongwa ndipu Mordikayi ndiyu wangumulera. Ahaswerusi fumu ya ku Perese yenga ndi nyumba yachifumu ku Susa, ndipu Mordikayi wenga yumoza wa anchitu ŵaki. Sonu zuŵa linyaki Vashite muwoli wa fumu wanguchitiya mtafu arumu ŵaki, sonu fumu yingusankha munthukazi munyaki kuja fumukazi. Kumbi utimuziŵa munthukazi yo fumu yingusankha? Wenga msungwana wakutowa Estere.

Hamani wakwiyiya Mordikayi

Kumbi wamuwona munthu wakujikuzga yo ŵanthu atimusindamiya yapa? Iyu ndi Hamani. Ndipu wenga munthu wakuzirwa ukongwa m’charu cha Perese. Hamani wakhumbanga kuti Mordikayi yo waja pasi po wachitengi vo anyaki achitanga. Kweni Mordikayi wangukana. Iyu waziŵanga kuti nkhunanga kugwadiya munthu muheni uyu. Ivi vingumukwiyiska ukongwa Hamani. Sonu iyu wanguchita chinthu chinyaki.

Hamani wangukambiya fumu vinthu vaboza vakukwaskana ndi Ayisraele. Iyu wanguti: ‘Yiwu mbanthu aheni, avwiya cha malangu nginu. Ndipu atenere kubayika.’ Ahaswerusi waziŵanga cha kuti muwoli waki Estere wenga wa Chiyisraele. Sonu iyu wanguvwiya Hamani ndipu wangupanga dangu kuti zuŵa linyaki Ayisraele wosi abayiki.

Sonu Mordikayi wati wavwa za dangu lo, wangudandawula ukongwa. Ndipu wangutumiza uthenga kwaku Estere wakuti: ‘Uyikambiyi ndi kuyipempha fumu kuti yititaski.’ Malangu nga charu cha Perese ngazomerezganga cha munthu kuwonana ndi fumu kwambula kudanika. Kweni Estere wanguluta kwambula kudanika. Sonu fumu yingumulongo ndi nthonga yaki yagolidi, kung’anamuwa kuti wabayikengi cha. Estere wangukambiya fumu ndi Hamani kuti ŵazi ku chakurya cho iyu wanguŵanozge. Ndipu panyengu yo aryanga chakurya, fumu yingufumba Estere cho wakhumbanga. Estere wangumuka kuti wazakuyimuka asani fumu ndi Hamani ŵaza kuzirya chakurya cho wazakuŵanozge mawa laki.

Panyengu yo aryanga chakurya ichi, Estere wangukambiya fumu kuti: ‘Ini ndi ŵanthu a mtundu wangu tibayikengi.’ Fumu yingukwiya ukongwa. Ndipu yingufumba kuti: ‘Ndiyani yo wakhumba kuchita chinthu ichi?’

Estere wangukamba kuti: ‘Munthu waki ndi uyu Hamani, murwani ndipuso muheni.’

Fmukazi Estere watumba mlandu Hamani

Sonu fumu yingukwiya ukongwa. Ndipu yingulamula kuti Hamani wabayiki. Pavuli paki fumu yinguŵika Mordikayi kuti waje wachiŵi waki. Sonu Mordikayi, wanguwoneseska kuti paje dangu lifya lakuzomerezga Ayisraele kuti ajivikiliyengi asani ŵanthu akhumba kuŵabaya. Chifukwa chakuti sonu Mordikayi wenga munthu wakuzirwa, ŵanthu anandi aŵawovyanga Ayisraele ndipuso ataskikanga ku arwani ŵawu.

Buku la m’Bayibolo la Estere.



Mafumbu

  • Kumbi Mordikayi ndi Estere ŵenga ayani?
  • Nchifukwa wuli Fumu Ahaswerusi yapenjanga so munthukazi munyaki, nanga yingusankha yani?
  • Kumbi Hamani wenga yani ndipu nchinthu wuli cho chingumukwiyiska?
  • Kumbi ndi dangu wuli lo lingupangika, nanga Estere wanguchitanji wati walonde uthenga kutuwa kwaku Mordikayi?
  • Kumbi nchinthu wuli chinguchitikiya Hamani kweniso Mordikayi?
  • Kumbi Ayisraele angutaskika wuli ku arwani ŵawu?

Mafumbu ngakusazgiyapu

  • Ŵerenga Estere 2:12-18.

    Kumbi Estere wangulongo wuli kukhumbika kwa kuja ndi ‘mzimu wakuzika ndi wakufwasa’? (Este. 2:15; 1 Pet. 3:1-5)

  • Ŵerenga Estere 4:1-17.

    Nge mo Estere wangupaskikiya mwaŵi wakovya kusopa kwauneneska, kumbi isi tapaskika mwaŵi wuli mazuŵa nganu kuti tilongo kujipereka ndi kugomezgeka kwaku Yehova? (Este. 4:13, 14; Mate. 5:14-16; 24:14)

  • Ŵerenga Estere 7:1-6.

    Kumbi ŵanthu anandi aku Chiuta mazuŵa nganu aŵika wuli umoyu wawu pangozi nge mo Estere wanguchitiya? (Este. 7:4; Mate. 10:16-22; 1 Pet. 2:12)