Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 79: Danyele M’zenji la Nkharamu

Nkhani 79: Danyele M’zenji la Nkharamu

DANYELE wawoneka nge kuti we m’masuzgu ngakulu ukongwa. Kweni nkharamu zitimuluma cha. Kumbi wachiziŵa chifukwa chaki? Kumbi ndiyani wanguŵika Danyele m’zenji la nkharamu zosi izi. Tiyi tiwoni.

Panyengu iyi, Dariusi ndiyu wenga fumu ya Babiloni. Iyu wamuyanjanga ukongwa Danyele chifukwa chakuti wenga munthu wa mtima wamampha kweniso wazeru. Dariusi wangusankha Danyele kuja mula wa ufumu waki. Ivi vinguchitiska kuti ŵanthu anyaki a mu ufumu waki amuchitiyi sanji Danyele, sonu yiwu anguchita chinthu chinyaki.

Dariusi

Yiwu anguluta kwaku Dariusi ndi kumukambiya kuti: ‘Takoliyanaku kuti imwi fumu, muyiki dangu lakuti kwa mazuŵa 30, paŵevi munthu yo warombengi kwaku chiuta weyosi pamwenga munthu munyaki pade paku imwi fumu. Yosi yo walekengi kuvwiya, watenere kuponyeka m’zenji la nkharamu.’ Dariusi wanguchiziŵa cha chifukwa cho ŵanthu yaŵa akhumbiyanga kuti paje dangu ili. Kweni iyu wagomezganga kuti iyi yenga zeru yamampha ndipu wangulilemba. Dangu ili latingi lisinthikengi so cha.

Danyele wati wavwa za dangu lo, iyu wanguluta kunyumba ndipu wanguromba, nge mo wachitiyanga nyengu zosi. Arwani ŵaki anguziŵa kuti Danyele wangaleka cha kuromba kwaku Yehova. Sonu yiwu angukondwa chifukwa anguziŵa kuti zeru yo angupangana yakuti abayi Danyele yigwirengi nchitu.

Fumu Dariusi yati yaziŵa chifukwa cho ŵanthu yaŵa akhumbiyanga dangu ili, yinguchita chitima ukongwa. Kweni yatingi yisinthengi cha dangu ili, ndipu yingulamula kuti Danyele waponyeki m’zenji la nkharamu. Sonu fumu yingukambiya Danyele kuti: ‘Nde ndi chigomezgu kuti Chiuta waku yo utimuteŵete wakutaskengi.’

Dariusi wangudandawula ukongwa mwakuti wangugona tulu cha usiku. Kwati kwacha, wangutchimbiriya ku zenji la nkharamu. Kumbi wamuwona pachanya po? Iyu wangudanirizga kuti: ‘Danyele muteŵeti waku Chiuta wamoyu! Kumbi Chiuta yo utimuteŵete wakupozomoska ku nkharamu?’

Danyele mzenji la nkharamu

Danyele wangumuka kuti: ‘Chiuta wangutuma angelu ŵaki ndipu angujara milomu ya nkharamu ndipu zandiluma cha.’

Fumu yingukondwa ukongwa ndipu yingulamula kuti Danyele watuzgiki m’zenji la nkharamu. Ndipu yingukamba kuti ŵanthu aheni wo akhumbanga kuti Danyele wabayiki aponyeki m’zenji la nkharamu. Yiwu ŵechendafiki pasi pa zenji, nkharamu zinguŵaŵankha ndi kuŵarya.

Sonu Fumu Dariusi yingulembe ŵanthu wosi mu ufumu waki, kuti: ‘Ndilamula kuti munthu weyosi watumbikengi Chiuta waku Danyele. Iyu wachita vakuziziswa vikulu. Wataska Danyele kuti nkharamu zileki kumurya.’

Danyele 6:1-28.



Mafumbu

  • Kumbi Dariusi wenga yani, nanga iyu wamuwonanga wuli Danyele?
  • Kumbi ŵanthu anyaki asanji anguchitiska kuti Dariusi wachitenji?
  • Kumbi Danyele wanguchitanji wati wavwa za dangu lifya?
  • Nchifukwa wuli Dariusi wangudandawula ukongwa mpaka kutondeka kugona, nanga mlenji waki wanguchitanji?
  • Kumbi Danyele wangumumuka wuli Dariusi?
  • Kumbi nchinthu wuli cho chinguchitikiya ŵanthu aheni wo akhumbanga kubaya Danyele, nanga Dariusi wanguŵalembiyanji ŵanthu wosi a mu ufumu waki?

Mafumbu ngakusazgiyapu

  • Ŵerenga Danyele 6:1-28.

    Kumbi chiŵembu cho angunozge Danyele chititikumbuskanji za vo ŵanthu akususka achita kuti atondekeski nchitu ya Akaboni aku Yehova mazuŵa nganu? (Dan. 6:7; Sumu 94:20; Yesa. 10:1; Ŵaro. 8:31)

    Kumbi ateŵeti aku Chiuta mazuŵa nganu angamuyezga wuli Danyele pa nkhani yakujithereska ku “mitufu yira”? (Dan. 6:5, 10; Ŵaro. 13:1; Machi. 5:29)

    Kumbi tingayezga wuli Danyele pa kuteŵete Yehova ‘nyengu zosi’? (Dan. 6:16, 20; Ŵafi. 3:16; Chivu. 7:15)