Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 78: Janja Lilemba Pachimati

Nkhani 78: Janja Lilemba Pachimati
Janja lilemba pa chimati

KUMBI nchinthu wuli cho chichitika yapa? Ŵanthu ŵe pa phwandu likulu. Fumu ya ku Babiloni yadana alendu anandi akuzirwa. Yiwu agwiriskiya nchitu makapu nga golidi ndi siliva kweniso mbali za bakuli zo zingutoleka m’nyumba yakusopiyamu yaku Yehova, ku Yerusalemu. Kweni mwamabuchibuchi, janja la munthu linguwoneka ndipu lingwamba kulemba pachimati. Ndipu ŵanthu wosi anguchita mantha.

Beleshazara ndi alendu ŵaki

Panyengu iyi, Beleshazara mzuku waku Nebukadanezara ndiyu wenga fumu. Iyu wangudana ŵanthu ŵaki azeru ndipu wanguŵakambiya kuti: ‘Yo wangaŵerenga malemba yanga ndi kundikambiya vo ngang’anamuwa, wapaskikengi vawanangwa vinandi ndipuso wajengi fumu yachitatu yakuzirwa ukongwa mu ufumu wangu.’ Kweni pengavi yumoza wa ŵanthu azeru yo wanguŵerenga pamwenga kukamba vo malemba ngang’anamuwanga.

Anyinawu ŵa fumu anguvwa chiwawa ndipu angusere m’chipinda chikulu mo ŵanthu wo aryiyanga. Iwu angukambiya fumu kuti: ‘Lekani kuchita mantha, mu ufumu winu mwe munthu mweniyo we ndi mzimu wa achiuta atuŵa. Panyengu yo ambuyamwi a Nebukadanezara ŵenga fumu, angumusankha iyu kuja mula wa ŵanthu azeru wosi. Zina laki ndi Danyele. Tumani munthu wakamudani ndipu wazamukukambiyani vosi vo malemba yanga ngang’anamuwa.’

Nyengu yeniyo anguchimuto Danyele. Wati wakana kulonde chawanangwa chechosi, wangwamba kukamba chifukwa cho kali Yehova wanguŵatuzgiya pa ufumu a Nebukadanezara wo ŵenga ambuyaki aku Beleshazara. Danyele wangukamba kuti: ‘Iwu ŵenga akujikuzga ndipu Yehova wanguŵalanga.’

Danyele wangukambiya Beleshazara kuti: ‘Kweni iwi uziŵa vosi vo vinguŵachitikiya, kweni nawiso utijikuzga nge mo ŵenge a Nebukadanezara. Wato makapu ndi mbali zabakuli m’nyumba yakusopiyamu yaku Yehova ndipu waryiyamu. Utumbika achiuta akupangika ndi vimiti kweniso akupangika ndi mya, m’malu mwakutumbika Mlengi Mula. Ichi ndichu chifukwa chaki Chiuta watuma janja kuti lilembi mazu yanga.

Danyele wangukamba kuti: ‘Mazu ngo ngalembeka ngakuti: ‘MENE, MENE, TEKEL, PARSIN.’

‘MENE, kung’anamuwa kuti Chiuta wawerenga mazuŵa nga ufumu winu ndipu wawumaliza. TEKEL, kung’anamuwa kuti mwapimika pasikelu ndipu mwasanirika kuti mupereŵera. PARSIN, kung’anamuwa kuti ufumu winu waperekeka kwa Amedi ndi Aperese.’

Danyele weche kuŵeleŵeta, Amedi ndi Aperese angwamba kulonda Babiloni. Yiwu angulonda msumba ndi kubaya Beleshazara. Mazu ngo ngangulembeka pachimati ngangufiskika usiku weniwo. Kweni nchinthu wuli cho chinguchitikiya Ayisraele? Tichiziŵengi pambula kuswela yapa, kweni tiyi tiwoni dankha vo vinguchitikiya Danyele.

Danyele 5:1-31.



Mafumbu

  • Kumbi nchinthu wuli cho chinguchitika fumu ya ku Babiloni yati yanozga phwandu ndi kugwiriskiya nchitu makapu ndi mbali zabakuli zo zingutoleka ku nyumba yakusopiyamu yaku Yehova ku Yerusalemu?
  • Kumbi Beleshazara wanguŵakambiyanji ŵanthu ŵaki azeru, kweni yiwu angutondeka kuchitanji?
  • Kumbi anyinawu ŵa fumu, anguyikambiya fumu kuti yichitenji?
  • Mwakukoliyana ndi vo Danyele wangukambiya fumu, nchifukwa wuli Chiuta wangutuma janja kuti lilembi pachimati?
  • Kumbi Danyele wangufwatuliya wuli mazu ngo ngangulembeka pachimati?
  • Kumbi chinthu wuli cho chinguchitika Danyele weche kulongoro?

Mafumbu ngakusazgiyapu

  • Ŵerenga Danyele 5:1-31.

    Konkhoska kupambana pakati pa mantha ngakopa Chiuta ndi mantha ngo Beleshazara wenga nangu wati wawona malembu pachimati. (Dan. 5:6, 7; Sumu 19:9; Ŵaro. 8:35-39)

    Kumbi Danyele wangulongo wuli chiganga po walongoronga ndi Beleshazara kweniso nduna zaki? (Dan. 5:17, 18, 22, 26-28; Machi. 4:29)

    Kumbi ndi nthowa niyi yo Danyele chaputala 5 chilongole kuti Yehova ndiyu wakuwusa chilengedu chosi? (Dan. 4:17, 25; 5:21)