Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 77: Angukana Kugwada

Nkhani 77: Angukana Kugwada

KUMBI ukumbuka kuti ukusambirapu za anyamata ŵatatu yaŵa? Yiwu mbanyaki aku Danyele ŵa angukana kurya vakurya vo venga vamampha cha kwaku yiwu. Ŵanthu a ku Babiloni anguŵapaska mazina ngakuti: Shadreke, Mesheke ndi Abedenego. Kweni aŵawoni sonu. Kumbi nchifukwa wuli yiwu aleka kugwadiya chikozgu chikulu ichi, cho ŵanthu anyaki wosi agwadiya? Tiyi tiwoni.

Kumbi utingakumbuka Malangu 10 ngo Yehova wangulemba? Dangu lakwamba lenga lakuti: ‘Ungasopanga achiuta anyaki cha kupatuwaku ini.’ Anyamata yaŵa anguvwiya dangu lenili, chinanga wuli kwenga kwakusuzga kulivwiya panyengu iyi.

Fumu ya ku Babiloni Nebukadanezara yingudana ŵanthu anandi akuzirwa kuti azigwadiyi chikozgu cho yingumika. Sonu yapa ndipu yamaliza kukambiya ŵanthu kuti: ‘Asani mwavwa kuliya kwa mbata, zeze ndi vipangizu vinyaki vakumbiya sumu, mugwadi ndi kusopa chikozgu chagolidi ichi. Weyosi yo walekengi kugwada ndi kusopa chikozgu ichi, nyengu yeniyo, waponyekengi mu ng’anju yamotu yakotcha ukongwa.’

Nebukadanezara wangukwiya ukongwa wati wavwa kuti Shadreke, Mesheke ndi Abedenego angukana kugwadiya chikozgu. Iyu wanguŵadaniska ndipu wanguŵakambiya so kuti agwadi. Kweni anyamata yaŵa angugomezga Yehova ndipu angukambiya Nebukadanezara kuti: ‘Chiuta widu mweniyo titimuteŵete, watipozomoskengi. Kweni chinanga waleki kutipozomoska, tigwadiyengi mbwenu cha chikozgu chinu chagolidi ichi.’

Shadreke, Mesheke ndi Abedenego

Nebukadanezara wati wavwa ivi, wangukwiya ukongwa kuphara pakwamba. Pafupi ndi po ŵenga penga ng’anju, sonu iyu wangulamula ŵanthu kuti: ‘Sonkhani ng’anju kwakukwana 7 kuphara po munguyisonkhe pakwamba.’ Ndipu wangutuma asilikali ŵaki anthazi kuti amangi Shadreke, Mesheke ndi Abedenego ndi kuŵaponya mu ng’anju ya motu. Ng’anju iyi yinguwotcha ukongwa mwakuti asilikali ŵaki angufwa ndi mulipu wa motu. Kumbi nchinthu wuli chinguchitikiya anyamata ŵatatu wo anguŵaponyamu?

Fumu yati yalingizga mu ng’anju, yinguchita mantha ukongwa. Ndipu yingufumba kuti: ‘Ndatingi tingumanga ndi kuponya anyamata ŵatatu mu ng’anju ya motu?’

Anchitu ŵaki angumuka kuti: ‘Hinya ndivu tinguchita.’

Sonu Fumu yinguti: ‘Kweni ndiwona anyamata ŵanayi atenda mu ng’anju ya motu. Yiwu mbakumangika cha ndipu motu utiŵawotcha cha. Ndipu wachinayi wawoneka nge m’ngelu.’ Fumu yinguluta pafupi ndi khomu la ng’anju ndipu yingudanirizga kuti: Shadreke! Mesheke! Abedenego! Tuliyani kunu, mwa ŵateŵeti ŵaku Chiuta Wamachanya!’

Ndipu yiwu ŵati atuwa, ŵanthu wosi anguŵawona kuti angufya cha. Sonu fumu yinguti: ‘Watumbikiki Chiuta waku Shadreke, Mesheke ndi Abedenego. Iyu watuma m’ngelu waki kuti waŵapozomoski, chifukwa yiwu angugwadiya ndi kusopa chiuta munyaki cha kweni Chiuta wawu pe.’

Kumbi ichi nchakuwoniyapu chamampha cha chakuja akugomezgeka kwaku Yehova cho titenere kuchilondo?

Chituwa 20:3; Danyele 3:1-30.



Mafumbu

  • Kumbi Nebukadanezara fumu ya ku Babiloni, wangupereka dangu wuli ku ŵanthu?
  • Nchifukwa wuli anyaki ŵatatu aku Danyele anguleka kugwadiya chikozgu cha golide?
  • Nebukadanezara wati waŵakambiya so anyamata Achihebere ŵatatu kuti agwadi, kumbi yiwu angulongo wuli kuti agomezganga Yehova?
  • Kumbi Nebukadanezara wangutuma anchitu ŵaki kuti achitenji ndi Shadreke, Mesheke kweniso Abedenego?
  • Kumbi Nebukadanezara wanguwonanji wati walereska mu ng’anju ya motu?
  • Kumbi nchifukwa wuli fumu yingutumbika Chiuta waku Shadreke, Mesheke ndi Abedenego, nanga vo anguchita vititisambizanji?

Mafumbu ngakusazgiyapu

  • Ŵerenga Danyele 3:1-30.

    Kumbi ndi mijalidu wuli yo anyamata ŵatatu a Chihebere angulongo yo ateŵeti wosi aku Chiuta mazuŵa nganu atenele kulondo asani akumana ndi masuzgu ngakwesa chigomezgu chawu? (Dan. 3:17, 18; Mate. 10:28; Ŵaro. 14:7, 8)

    Kumbi ndi sambiru lakukhumbika nili lo Yehova Chiuta wangusambiza Nebukadanezara? (Dan. 3:28, 29; 4:34, 35)