Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 80: Ŵanthu Ŵaku Chiuta Atuwaku ku Babiloni

Nkhani 80: Ŵanthu Ŵaku Chiuta Atuwaku ku Babiloni

PANGUJUMPHA pafupifupi vyaka viŵi kutuliya po Amede ndi Aperese angulonde Babiloni. Awona vo vichitika sonu. Ayisraele atuwaku ku Babiloni. Kumbi vinguchitika wuli kuti yiwu atuweku? Nanga ndiyani yo wanguŵatuzgaku?

Wenga Sirusi fumu ya ku Perese. Sirusi wechendaweku, Yehova wangutuma mchimi waki Yesaya kuti walembi vakukwaskana ndi iyu kuti: ‘Wazamuchita vosi vo ndikhumba kuti uzichiti. Ndipu makhomu ngakuserere mu msumba ngazamuja ngambula kujara, kuti iwi uzilondi msumba wo.’ Ndipu Sirusi ndiyu wangulongozga ŵanthu pakuchilonda Babiloni. Amede ndi Aperese anguza mu msumba wo usiku ndipu anguserere pa makhomu ngo ngenga ngambula kujara.

Sonu Yesaya mchimi waku Yehova, wangukamba so kuti Sirusi wazamulamula kuti msumba wa Yerusalemu ndi nyumba yakusopiyamu vikazengeki so. Kumbi Sirusi wangukamba nadi venivi? Hinya, wangukamba. Iyu wangukambiya Ayisraele kuti: ‘Sonu lutani ku Yerusalemu ndipu mukazengi nyumba yakusopiyamu yaku Yehova Chiuta winu.’ Ndipu ivi ndivu nadi Ayisraele aluta kuchichita.

Ayisraele atuwa ku babiloni

Kweni Ayisraele anyaki angutondeka kwenda ulendu utali wakutuwa ku Babiloni kuwere ku Yerusalemu. Ulendu uwu wenga wa makilomita 800 ndipu Ayisraele anandi ŵenga akukota kweniso atamanga, mwakuti atingi afiskengi cha kwenda ulendu utali nge uwu. Kweni pengaso vifukwa vinyaki vo Ayisraele anyaki angutondeke kulutiya. Sonu Sirusi wangukambiya wosi wo angutondeka kuluta kuti: ‘Paskani ŵanthu wo aluta kuchizenga Yerusalemu ndi nyumba yakusopiyamu, siliva, golidi ndi vinthu vinyaki.’

Sonu Ayisraele wo alutanga ku Yerusalemu angupaskika vawanangwa vinandi. Sirusi nayu wanguŵapaska mbali zabakuli ndi makapu ngo Fumu Nebukadanezara yinguto m’nyumba yakusopiyamu yaku Yehova, panyengu yo yingubwanganduliya Yerusalemu. Ayisraele angupinga vinthu vinandi vo anguwere navu kwawu.

Ŵati ayenda ulendu kwa myezi pafupifupi yinayi, Ayisraele angufika ku Yerusalemu panyengu yaki. Panyengu yo angufikiya ndipu vingukwaniya vyaka 70 kutuliya panyengu yo Yerusalemu wangubwangandulikiya ndipu charu chinguja chambula ŵanthu kwa vyaka vosi ivi. Kweni chinanga wuli Ayisraele angufika kwawu sonu, angukumana mbwenu ndi masuzgu nganandi. Tisambirengi ivi kunthazi uku.

Yesaya 44:28; 45:1-4; Ezra 1:1-11.



Mafumbu

  • Nge po chithuthuzi chilongole, kumbi Ayisraele achitanji?
  • Kumbi Sirusi wangufiska wuli uchimi waku Yehova wo ungukambika kuporote mwaku Yesaya?
  • Kumbi Sirusi wanguŵakambiyanji Ayisraele wo angutondeka kuwere ku Yerusalemu?
  • Kumbi ndi vinthu wuli vo Sirusi wangupaska ŵanthu kuti apingi achiwere ku Yesulemu?
  • Kumbi pangujumpha myezi yilinga kuti Ayisraele akafiki ku Yerusalemu?
  • Kumbi pangujumpha vyaka vilinga kutuliya panyengu yo charu chingujaliya chambula ŵanthu?

Mafumbu ngakusazgiyapu

  • Ŵerenga Yesaya 44:28 ndi 45:1-4.

    Kumbi Yehova wangusimikizga wuli kuti uchimi wakukwaskana ndi Sirusi wazamufiskika? (Yesa. 55:10, 11; Ŵaro. 4:17)

    Kumbi uchimi waku Yesaya wakukwaskana ndi Sirusi ulongo wuli nthazi zaku Yehova Chiuta zakukambiya limu vamunthazi? (Yesa. 42:9; 45:21; 46:10, 11; 2 Pet. 1:20)

  • Ŵerenga Ezra 1:1-11.

    Mwakulondo chakuwoniyapu cha ŵanthu wo angutondeka kuwere ku Yerusalemu, kumbi isi mazuŵa nganu ‘tingaŵawovya’ wuli ŵanthu wo angakwaniska kuchita uteŵeti wa nyengu zosi? (Ezra 1:4, 6; Ŵaro. 12:13; Ŵako. 4:12)