KUTULIYA po Fumu Nebukadanezara yinguto Ayisraele wosi akusambira ukongwa kuluta nawu ku Babiloni, panguto vyaka vakujumpha 10. Sonu awona vo vichitika. Msumba wa Yerusalemu awuwotcha. Ndipu Ayisraele wo aleka kubayika, atoleke ku ukapolu ku Babiloni.

Kumbuka kuti ivi ndivu achimi aku Yehova angutcheŵeska ŵanthu, kuti vazamuchitika asani alekengi kusintha mijalidu yawu yiheni. Kweni Ayisraele anguvwiya cha. Yiŵu angulutirizga kusopa achiuta aboza m’malu mwakusopa Yehova. Yiwu ŵenga akwenere nadi kulangika. Tiziŵa ivi chifukwa mchimi waku Chiuta, Ezekiele ndiyu watitikambiya za vinthu viheni vo Ayisraele achitanga.

Kumbi utimuziŵa Ezekiele? Iyu wenga yumoza wa anyamata wo Fumu Nebukadanezara yinguŵatore ku Babiloni, vyaka vakujumpha 10 vati vakapu Yerusalemu wechendabwanganduliki. Danyele ndi anyaki ŵatatu, Shadreke, Meshake ndi Abedenego angutoleke pamoza ndi Ezekiele kuluta ku Babiloni.

Panyengu yo Ezekiele wenga weche ku Babiloni, Yehova wangumulongo vinthu viheni vo vachitikanga panyumba yakusopiyamu, ku Yerusalemu. Yehova wangumulongo m’nthowa yakuziziswa. Iyu wangulongo Ezekiele vinthu vosi vo vachitikanga panyumba yakusopiyamu, chinanga wuli Ezekiele wenga weche ku Babiloni. Ndipu vinthu vo Ezekiele wanguwona venga vakofya.

Yehova wangukambiya Ezekiele kuti: ‘Awona vinthu vawukazuzi vo ŵanthu achita panu panyumba yakusopiyamu. Awona vithuthuzi va vinjoka ndi nyama zinyaki vo ajambula pavimati. Ndipu wona Ayisraele ativisopa.’ Ezekiele wanguviwona vinthu ivi ndipu wangulemba vosi vo vachitikanga.

Ayisraele atuwa mu Yerusalemu

Yehova wangufumba Ezekiele kuti: ‘Kumbi utiviwona vo alongozgi a Yisraele achita kuwubendi? Ezekiele wanguviwona. Iyu wanguwona anthurumi 70, achisopa achiuta aboza. Ndipu akambanga kuti: ‘Yehova watitiwona cha. Iyu wachileka charu ichi.’

Sonu Yehova wangulongo Ezekiele anthukazi anyaki wo ŵenga kumpotu kwa khomu lakuserere m’nyumba yakusopiyamu. Yiwu asopanga chiuta waboza Tamuzi. Ndipu wangumulongo so anthurumi akukwana 25 wo ŵenga pakhomu la nyumba yakusopiyamu yaku Yehova. Yiwu agwadanga kulazga kuvuma ndipu asopanga lumwi.

Yehova wangukamba kuti: ‘Ŵanthu yaŵa atinditumbika cha ini. Yiwu achitiya vinthu viheni ivi panyumba yangu chayipu.’ Sonu Yehova wangulayizga kuti: ‘Yiwu ayiziŵengi nthazi ya ukari wangu. Ndipu ndiŵachitiyengi lisungu cha asani abayika.’

Pati pajumpha waka vyaka vitatu kutuliya po Yehova wangulongole Ezekiele vinthu ivi, Ayisraele angugarukiya Fumu Nebukadanezara. Sonu iyu wanguchirwana nawu nkhondu. Ndipu pati pajumpha chaka ndi myezi 6, ŵanthu aku Babiloni anguswa mpanda wa Yerusalemu ndipu angusere ndi kuwotcha msumba wosi. Ŵanthu anandi angubayika ndipu anyaki angukoleka kuluta ku ukapolu ku Babiloni.

Kumbi nchifukwa wuli Yehova wanguzomerezga kuti Ayisraele akumani ndi vinthu vakofya viyo ivi? Chenga chifukwa chakuti yiwu anguleka kuvwiya Yehova ndi kuleka kulondo malangu ngaki. Ivi vilongo kuti nyengu zosi nkhwamampha kuchita vo Chiuta wakamba.

Pakwamba ŵanthu amanavi ndiwu anguzomerezgeka kuja m’charu cha Yisraele. Sonu Fumu Nebukadanezara wanguŵika munthu wa Chiyuda zina laki Gedaliya kuti ndiyu waŵawoneriyengi ŵanthu yaŵa. Kweni Ayisraele anyaki angumubaya Gedaliya. Sonu ŵanthu angwamba kuchita mantha kuti ŵanthu aku Babiloni azakuŵabaya wosi chifukwa cha chinthu chiheni cho chinguchitika. Sonu ŵanthu wo anguchichizga Yeremiya kuti athaŵi ndipu anguthaŵiya ku Egipiti.

Ivi vinguchitiska kuti charu cha Yisraele chije chambula ŵanthu. Ndipu chinguja vyaka 70 kwambula kujamu ŵanthu. Kweni Yehova wangulayizga kuti wawezgiyengi ŵanthu ŵaki m’charu cho asani pajumpha vyaka 70. Kumbi panyengu iyi, nchinthu wuli cho chinguchitikiya ŵanthu aku Chiuta m’charu cha Babiloni ko angutoleke? Tiyi tiwoni.

2 Ŵakaronga 25:1-26; Yeremiya 29:10; Ezekiele 1:1-3; 8:1-18.



Mafumbu

  • Kumbi nchinthu wuli cho chinguchitikiya Yerusalemu kweniso Ayisraele wo ŵe pachithuthuzi?
  • Kumbi Ezekiele wenga yani, nanga ndi vinthu wuli vakofya vo Yehova wangumulongo?
  • Chifukwa chakuti Ayisraele angumutumbika cha Yehova, kumbi nchinthu wuli cho wanguŵatcheŵeska?
  • Kumbi Fumu Nebukadanezara yinguchitanji Ayisraele ŵati ayigarukiya?
  • Nchifukwa wuli Yehova wanguzomerezga kuti Ayisraele akumani ndi vinthu vakofya ivi?
  • Kumbi nchinthu wuli cho chinguchitiska kuti charu cha Yisraele chije chambula ŵanthu, nanga chinguja chambula ŵanthu kwa utali wuli?

Mafumbu ngakusazgiyapu

  • Ŵerenga 2 Ŵakaronga 25:1-26.

    Kumbi Zedekiya wenga yani, nanga nchinthu wuli cho chingumuchitikiya, ndipu venivi vingufiska wuli uchimi wa m’Bayibolo? (2 Ŵaka. 25:5-7; Ezek. 12:13-15)

    Kumbi Yehova wangumba mulandu yani chifukwa chakuleka kugomezgeka kosi ko Ayisraele achitanga? (2 Ŵaka. 25:9, 11, 12, 18, 19; 2 Miko. 36:14, 17)

  • Ŵerenga Ezekiele 8:1-18.

    Kumbi Matchalitchi nga Chikhristu nga mazuŵa nganu ngalondo wuli Ayisraele akugarukiya wo asopanga lumwi? (Ezek. 8:16; Yesa. 5:20, 21; Yoha. 3:19-21; 2 Timo. 4:3)