Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 74: Munthu Wambula Mantha

Nkhani 74: Munthu Wambula Mantha

AWONA ŵanthu wo aseka mnyamata yo. Kumbi wamuziŵa mnyamata mweniyo? Iyu ndi Yeremiya. Iyu wenga mchimi wakupharazga uthenga wamampha.

Ŵanthu aseka Yeremiya

Fumu Josiya yati yayamba kuswa angoza wo ŵenga m’charu, Yehova wangukambiya Yeremiya kuti waje mchimi. Kweni Yeremiya waŵanaŵananga kuti wangaja mchimi cha chifukwa wenga weche mwanamwana. Sonu Yehova wangukamba kuti wamuwovyengi.

Yeremiya wangukambiya Ayisraele kuti aleki kuchita vinthu viheni. Iyu wanguti: ‘Achiuta wo ŵanthu a mitundu asopa mbaboza.’ Kweni Ayisraele anandi angwanja kusopa angoza m’malu mwakusopa Chiuta wawuneneska, Yehova. Ŵanthu amusekanga Yeremiya wachiŵakambiya kuti Chiuta waŵalangengi chifukwa cha uheni wawu.

Pati pajumpha vyaka vinandi, Josiya wangufwa kweni pati papita myezi yitatu, mwana waki Yehoyakimu wanguja fumu. Yeremiya wangulutirizga kukambiya ŵanthu kuti: ‘Yerusalemu wabwangandulikengi asani mulekengi kusintha nthowa zinu ziheni.’ Sonu asembi angumuko Yeremiya ndipu angumukalipiya kuti: ‘Utenere kubayika chifukwa cha vo ukamba.’ Pavuli paki angukambiya mafumu nga Yisraele kuti: ‘Yeremiya watenere kubayika chifukwa chakuti wakamba vinthu viheni vakukwaskana ndi msumba widu.’

Sonu kumbi Yeremiya wanguchita wuli? Iyu wanguchita mantha cha. Wanguŵakambiya wosi kuti: ‘Yehova wakundituma kuti ndikukambiyeni vinthu ivi. Asani mulekengi kusintha nthowa zinu ziheni, Yehova wabwanganduwengi Yerusalemu. Kweni ziŵani ichi kuti: Asani mundibayengi, mubayengi munthu wambula kunanga.’

Sonu mafumu nganguleka kumubaya Yeremiya, kweni Ayisraele anguleka cha kuchita vinthu viheni. Pavuli paki Nebukadanezara fumu ya ku Babiloni, yinguza kuzirwa nkhondu mu Yerusalemu. Ndipu pakumaliya paki, Nebukadanezara wangusambuska Ayisraele kuja akapolu ŵaki. Iyu wanguto Ayisraele anandi kuluta nawu ku Babiloni. Kumbi iwi ungavwa wuli asani ŵanthu ambula kuŵaziŵa angakuko kutuwa m’charu chaku kuluta nawi ku charu chachilendu?

Yeremiya 1:1-8; 10:1-5; 26:1-16; 2 Ŵakaronga 24:1-17.



Mafumbu

  • Kumbi mnyamata yo we pachithuthuzi ndiyani?
  • Kumbi Yeremiya waŵanaŵananganji pa nkhani yakuja mchimi, nanga Yehova wangumukambiyanji?
  • Kumbi ndi uthenga wuli wo Yeremiya wakambiyanga ŵanthu?
  • Kumbi asembi angwesa wuli kumulekeska Yeremiya kukambiya ŵanthu uthenga, nanga iyu wangulongo wuli kuti wenga wambula mantha?
  • Kumbi nchinthu wuli chinguchitika Ayisraele ŵati atondeka kusintha nthowa zawu ziheni?

Mafumbu ngakusazgiyapu

  • Ŵerenga Yeremiya 1:1-8.

    Nge mo chakuwoniyapu chaku Yeremiya chilongole, kumbi nchinthu wuli cho chichitiska munthu kuti waŵi wakwenele kuteŵete Yehova? (2 Ŵako. 3:5, 6)

    Kumbi chakuwoniyapu chaku Yeremiya chitiŵachiska wuli Akhristu achinyamata mazuŵa nganu? (Waku. 12:1; 1 Timo. 4:12)

  • Ŵerenga Yeremiya 10:1-5.

    Kumbi Yeremiya wangugwiriskiya nchitu chakuyeruzgiyapu chanthazi nichi pakukhumba kulongo kuti nkhwambula kwenele kugomezga angoza? (Yere. 10:5; Yesa. 46:7; Haba. 2:19)

  • Ŵerenga Yeremiya 26:1-16.

    Pakupharazga uthenga wa chenjezu mazuŵa nganu, kumbi akupakika akujaliya, alondo wuli dangu laku Chiuta lo wangukambiya Yeremiya kuti ‘ungasiyangaku chinanga ndi mazu ngamoza cha’? (Yere. 26:2; Mara. 4:2; Machi. 20:27)

    Kumbi nchakuwoniyapu chamampha wuli cho Yeremiya wapereka kwa Akaboni aku Yehova mazuŵa nganu, pankhani ya kupharazga chenjezu laku Yehova ku mitundu yosi? (Yere. 26:8, 12, 14, 15; 2 Timo. 4:1-5)

  • Ŵerenga 2 Ŵakaronga 24:1-17.

    Kumbi ndi vakuchitika wuli vakupaska chitima vo mtundu wa Yuda ungukumana navu chifukwa chakuleka kugomezgeka kwaku Yehova? (2 Ŵaka. 24:2-4, 14)