Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 72: Chiuta Wanguwovya Fumu Hezekiya

Nkhani 72: Chiuta Wanguwovya Fumu Hezekiya

KUMBI wachiziŵa chifukwa cho munthu uyu warombe kwaku Yehova? Nchifukwa wuli iyu waŵika makalata panthazi pa guŵa laku Yehova? Munthu yo ndi Hezekiya. Iyu ndi fumu ya mafuku ngaŵi ngakumwela nga Yisraele. Iyu wakumana ndi suzgu likulu ukongwa. Kumbi nchifukwa wuli?

Fumu Hezekiya waromba

Chenga chifukwa chakuti panyengu iyi ndipu ankhondu a ku Asiriya abwanganduwa kali mafuku 10 ngakumpotu. Yehova wanguzomerezga kuti ivi vichitiki chifukwa chakuti ŵanthu wo, ŵenga aheni ukongwa. Sonu ankhondu a ku Asiriya anguza kuti azirwani nkhondu ndi ufumu wa mafuku ngaŵi.

Yapa ndipu fumu ya ku Asiriya yatumiza makalata kwaku Hezekiya. Makalata ngo Hezekiya wangulonde ndi ngo wangaŵika panthazi po kulongo Chiuta. Makalata yanga ngenga ngakunyoza Yehova ndi kukambiya Hezekiya kuti wajithereski. Sonu ndichu chifukwa chaki Hezekiya wanguromba kuti: ‘Yehova, titaskeni ku fumu ya ku Asiriya. Ndipu mitundu yosi yiziŵengi kuti Chiuta ndimwi pe.’ Kumbi Yehova wanguvwiya Hezekiya?

Hezekiya wenga fumu yamampha. Iyu wenga wakupambana ndi mafumu nga ufumu wa mafuku 10 nga Yisraele kweniso awiski a Ahazi, wo ŵenga Fumu yiheni. Hezekiya wanguyesesa kuvwiya malangu ngosi ngaku Yehova. Sonu Hezekiya wati wamala kuromba, mchimi Yesaya wangumutumiziya uthenga wakutuwa kwaku Yehova wakuti: ‘Fumu ya ku Asiriya yizengi cha ku Yerusalemu. Palivi chinanga ndi msilikali waki yumoza yo wazengi kufupi. Yiwu azamuponya chinanga ndi mkondu umoza cha pa msumba uwu.’

Awona chithuthuzi cho che yapa. Kumbi waŵaziŵa asilikali wosi wo afwiya po? Yiwu mbasilikali a ku Asiriya. Yehova wangutuma m’ngelu waki, ndipu usiku umoza pe wangubaya asilikali a ku Asiriya akukwana 185,000. Sonu fumu ya ku Asiriya yingujithereska ndipu yinguwere kwawu.

Asirikali aku Asiriya ŵafwa

Sonu ufumu wa mafuku ngaŵi ungupozomoka ndipu ŵanthu angujaku pachimangu kwa kanyengu kamanavi. Kweni Hezekiya wati wafwa, mwana waki Manase wanguzija fumu. Manase wenga fumu yiheni ndipuso mwana waki Amoni yo wanguzija fumu iyu wati wafwa nayuso wenga muheni. Sonu m’charu chosi ŵanthu anguleka so kuvwiya malangu ndipuso abayananga. Sonu Fumu Amoni yati yabayika ndi anchitu ŵaki, mwana waki Josiya ndiyu wanguja fumu ya ufumu wa mafuku ngaŵi.

2 Ŵakaronga 18:1-36; 19:1-37; 21:1-25.



Mafumbu

  • Kumbi munthurumi yo we pachithuthuzi po ndiyani, ndipu nchifukwa wuli we m’suzgu likulu ukongwa?
  • Kumbi ndi makalata wuli ngo Hezekiya walongo Chiuta, ndipu Hezekiya wangurombanji?
  • Kumbi Hezekiya wenga fumu ya mtundu wuli, nanga ndi uthenga wuli wo Yehova wangumutumiziya kuporote mwa mchimi Yesaya?
  • Kumbi mungelu waku Yehova wanguchitanji nawu Asiriya, nge mo pawoneke pachithuthuzi?
  • Chinanga wuli ufumu wa mafuku ngaŵi wenga pachimangu kwa kanyengu kamanavi, kumbi nchinthu wuli cho chinguchitika Hezekiya wati wafwa?

Mafumbu ngakusazgiyapu

  • Ŵerenga 2 Ŵakaronga 18:1-36.

    Kumbi Rabishake yo wenga mulomu wa Asiriya wanguchita wuli kuti walopwesi chigomezgu cha Ayisraele? (2 Ŵaka. 18:19, 21; Chitu. 5:2; Sumu 64:3)

    Kumbi Akaboni aku Yehova alondo wuli chakuwoniyapu chaku Hezekiya asani akumana ndi ŵanthu akususka? (2 Ŵaka. 18:36; Sumu 39:1; Ntha. 26:4; 2 Timo. 2:24)

  • Ŵerenga 2 Ŵakaronga 19:1-37.

    Kumbi ŵanthu aku Yehova mazuŵa nganu alondo wuli Hezekiya asani akumana ndi masuzgu? (2 Ŵaka. 19:1, 2; Ntha. 3:5, 6; Ŵahe. 10:24, 25; Yako. 5:14, 15)

    Kumbi ndi vinthu vitatu nivi vo vinguchitika kuti Fumu Senakaribu yitheri, nanga mu uchimi wenuwu, iyu wamiya yani? ( 2 Ŵaka. 19:32, 35, 37; Chivu. 20:2, 3)

  • Ŵerenga 2 Ŵakaronga 21:1-6, 16.

    Kumbi nchifukwa wuli tingakamba kuti Manase wenga fumu yiheni ukongwa pa mafumu ngosi ngo nganguwusa mu Yerusalemu? (2 Miko. 33:4-6, 9)