Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 71: Chiuta Walayizga Paradayisu

Nkhani 71: Chiuta Walayizga Paradayisu

PARADAYISU wang’anamuwa “munda wakutowa.” Kumbi ivi vitikukumbuska chithuthuzi chinyaki cho tikuchiwonapu m’buku ili? Ichu chiwoneka kuti chiyanana ukongwa ndi munda wakutowa wo Yehova Chiuta wangupangiya Adamu ndi Eva, kumbi chiwoneka nadi viyo? Kweni kumbi charu chosi chazamuja paradayisu?

Ŵanthu mparadayisu

Chiuta wanguŵika Adamu ndi Eva mu paradayisu. Kweni chifukwa chakuti angumuvwiya cha Chiuta, yiwu angutaya muzi wawu wakutowa mwaviyo angwamba kukota ndipu pavuli paki angufwa. Kweni Chiuta walayizga kuti wazamupaska ŵanthu wo atimuyanja vinthu vosi vo Adamu ndi Eva akutaya

Chithuthuzi ichi ncha paradayisu nge yo Chiuta watenere kuti wangulongo mchimi waki Yesaya. Yesaya wanguwaku pati pajumpha nyengu yimanavi Yona wati wafwa.

Yehova wangukambiya mchimi waki Yesaya kuti walembi vakukwaskana ndi paradayisu mufya wa ŵanthu ŵaku Chiuta. Ndipu wanguti: ‘Akambwi ndi mbereri azamuja pamoza m’chimangu. Mwana wa ng’ombi ŵazamukurya pamoza ndi mwana wa nkharamu ndipu mwanamana wazakuviphwere. Chinanga ndi mwanamana kuti wazamulumika cha wachiseŵe pafupi ndi njoka yikali.’

Ŵanthu anandi angakamba kuti: ‘Ivi vingachitika cha chifukwa chakuti masuzgu ngakwamba kali pacharu chapasi ndipu ngazamumala cha.’ Kweni utenele kujifumba kuti: ‘Kumbi malu ngo Chiuta wangupaska Adamu ndi Eva ngenga nga mtundu wuli?

M’charu chifya mwazamuŵavi chakupweteka chechosi ndipuso nyifwa. Kwazamuja chimangu. Ŵanthu wosi azamutama cha ndipu azamuja akukondwa. Vinthu vazamuja nge po Chiuta wakhumbiyanga pakwamba. Sonu kunthazi uku tisambirengi mo Chiuta wazamuchitiya vinthu ivi.

Yesaya 11:6-9; Chivumbuzi 21:3, 4.



Mafumbu

  • Kumbi mazu ngakuti “paradayisu” ngang’anamuwanji ndipu ngatikukumbuskanji?
  • Kumbi nchifukwa wuli Adamu ndi Eva angutaya muzi wawu wakutowa?
  • Kumbi Yesaya wenga yani, ndipu wangujaku panyengu niyi, nanga Yehova wangumulongonji?
  • Kumbi Yehova wangumukambiya Yesaya kuti walembenji vakukwaskana ndi Paradayisu mufya?
  • Kumbi nchinthu wuli cho Yehova walayizga wo atimuyanja?

Mafumbu ngakusazgiyapu

  • Ŵerenga Yesaya 11:6-9.

    Kumbi Mazu ngaku Chiuta, ngalongo wuli kuti ŵanthu ndi nyama azamuja pachimangu m’charu chifya? (Sumu 148:10, 13; Yesa. 65:25; Ezek. 34:25)

    Kumbi mazu ngaku Yesaya, ngafiskika wuli mwauzimu pakati pa ŵanthu aku Yehova mazuŵa nganu? (Ŵaro. 12:2; Ŵaefe. 4:23, 24)

    Kumbi ndiyani yo watenele kutumbikika chifukwa chakusintha kwa mijalidu ya ŵanthu mazuŵa nganu kweniso m’charu chifya. (Yesa. 48:17, 18; Ŵaga. 5:22, 23; Ŵafi. 4:7)

  • Ŵerenga Chivumbuzi 21:3, 4.

    Kumbi fundu ya M’malemba yakuti Chiuta wazamuja pamoza ndi ŵanthu, yilongo wuli kuti ying’anamuwa kuja limoza ndi ŵanthu chayiku cha? (Ŵale. 26:11, 12; 2 Miko. 6:18; Yesa. 66:1; Chivu. 21:2, 3, 22-24)

    Kumbi ndi masozi ndi urwirwi wuli wo wazamumala? (Luka 8:49-52; Ŵaro. 8:21, 22; Chivu. 21:4)