Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 70: Yona ndi Chisomba

Nkhani 70: Yona ndi Chisomba

AWONA munthu yo wabira m’maji. Iyu wawoneka kuti we ndi mantha ukongwa. Chisomba cho che pafupi kumumeza. Kumbi utimuziŵa munthu mweniyo? Zina laki ndi Yona. Tiyi tiwoni cho chinguchitiska kuti iyu wakumani ndi suzgu ili.

Yona wenga mchimi waku Yehova. Pati pajumpha waka nyengu yimanavi kutuliya po mchimi Elisha wangufwiya, Yehova wangukambiya Yona kuti: ‘Luta ku msumba ukulu wa Nineve. Ŵanthu achita vinthu viheni ukongwa, sonu ndikhumba kuti ukaŵakambiyi za uheni wo achita.’

Yona ndi chisomba chikuru

Kweni Yona wakhumbanga cha kuluta. Sonu iyu wangukwera boti lo lakanga kunyaki kuleka lo lakanga ku Nineve. Yehova wangukondwa cha chifukwa chakuti Yona wanguthaŵa. Sonu Iyu wanguputiska chimphepu chikulu ukongwa ndipu boti linguja kamanavi kubira. Wo ayendeskanga boti anguchita mantha ukongwa ndipu anguliliya achiuta ŵawu kuti aŵawovyi.

Pakumaliya paki, Yona wanguŵakambiya kuti: ‘Ini ndisopa Yehova, Chiuta yo wakulenga kuchanya ndi charu chapasi. Ndipu ndithaŵa chifukwa ndakhumba cha kuchita vo Yehova wandituma.’ Sonu akwendeska boti angumufumba kuti: ‘Sonu tichitenji nawi kuti chimphepu chileki?’

Yona wanguŵakambiya kuti: ‘Ndiponyeni m’nyanja ndipu nyanja yigowokengi.’ Wo ayendeskanga boti akhumbanga cha kumuponya m’nyanja, kweni chimphepu chati chalutizga yiwu angumuponya. Nyengu yeniyo, chimphepu chinguleka ndipu nyanja yingugowoka.

Sonu Yona wati wabira, chisomba chingumumeza, kweni wangufwa cha. Iyu wanguja m’moyu mwa chisomba kwa mazuŵa ngatatu. Yona wanguchita chitima ukongwa chifukwa chakuti wangutondeka kuvwiya Yehova kuti waluti ku Nineve. Sonu kumbi uziŵa vo iyu wanguchita?

Yona wanguromba kwaku Yehova kuti wamuwovyi. Sonu Yehova wanguchitiska kuti chisomba chikamuwukuliyi Yona kumtunda. Pavuli paki, Yona wanguluta ku Nineve. Nkhani iyi, yititisambiza kuti nchinthu chazeru kuchita vosi vo Yehova watitikambiya.

Buku la m’Bayibolo la Yona.



Mafumbu

  • Kumbi Yona wenga yani, nanga Yehova wangumukambiya kuti wachitenji?
  • Chifukwa chakuti Yona wakhumbanga cha kuluta ko Yehova wangumutuma, kumbi iyu wanguchitanji?
  • Kumbi Yona wangukambiya akwendeska boti kuti achitenji, kuti chimphepu chileki?
  • Nge mo uwone pachithuthuzi, kumbi nchinthu wuli chinguchitika Yona wati waponyeka m’nyanja?
  • Kumbi Yona wanguja mazuŵa ngalinga m’moyu mwachisomba ndipu iyu wachitanganji mwenimo?
  • Kumbi Yona wati watuwa m’moyu mwa chisomba wanguluta pani, nanga venivi vititisambizanji?

Mafumbu ngakusazgiyapu

  • Ŵerenga Yona 1:1-17.

    Kumbi Yona wanguyiwona wuli nchitu yaki ya kuchipharazga ku ŵanthu a ku Nineve? (Yona 1:2, 3; Ntha. 3:7; Waku. 8:12)

  • Ŵerenga Yona 2:1, 2, 10.

    Kumbi vo Yona wanguchita vititipaska wuli chigomezgu chakuti Yehova wamukengi marombu ngidu? (Sumu 22:24; 34:6; 1 Yoha. 5:14)

  • Ŵerenga Yona 3:1-10.

    Kumbi nchilimbikisu wuli cho tisaniya pakuziŵa kuti Yehova wangulutirizga kumugwiriskiya nchitu Yona, chinanga wuli pakwamba wangutondeka kufiska nchitu yaki? (Sumu 103:14; 1 Pet. 5:10)

    Kumbi vo vinguchitika Yona wati wapharazga ku ŵanthu a ku Nineve, vititisambizanji pankhani yakweruzgiya limu ŵanthu a m’chigaŵa chidu? (Yona 3:6-9; Waku. 11:6; Machi. 13:48)