Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 69: Msungwana Wanguwovya Mula Wankhondu

Nkhani 69: Msungwana Wanguwovya Mula Wankhondu

KUMBI waviziŵa vo msungwana yo wakamba? Iyu wakambiya munthukazi yo vakukwaskana ndi mchimi waku Yehova Elisha kweniso vakuziziswa vo Yehova wangumuwovya kuchita. Munthukazi yo watimuziŵa cha Yehova, chifukwa iyu ngwa Chiyisraele cha. Tiyi tiwoni chifukwa cho msungwana uyu wajaliyanga ku nyumba kwa munthukazi yo.

Munthukazi uyu ngwa ku Siriya. Murumu waki ndi Namani, mula wa asilikali a nkhondu a ku Siriya. Asilikali a ku Siriya anguko msungwana wa Chiyisraele uyu ndi kuza nayu kwa muwoli waku Namani kuti waje wanchitu waki.

Muwolu waku Namani ndi msungwana wa nchitu

Namani wenga ndi nthenda yiheni ukongwa ya makhati. Nthenda iyi yiturya minofu muliŵavu la munthu. Sonu msungwana yo wangukambiya muwoli waku Namani kuti: ‘Ndiŵanaŵana kuti mphanyi abwana ŵangu anguluta ku Yisraele ko kwe mchimi waku Yehova. Iyu wakhoza kuchiŵachizga makhati.’ Pavuli paki, munthukazi yo wangukambiya murumu waki vo msungwana yo wangukamba.

Namani wakhumbisiskanga kuti mphanyi wanguchira, sonu iyu wanguluta ku Yisraele. Wati wafika wanguluta kunyumba kwaku Elisha. Ndipu Elisha wangutuma wanchitu waki kuti wakambiyi Namani kuti wakasambi mu Msinji wa Yordane kwakukwana 7. Ivi vingumukwiyiska ukongwa Namani ndipu wanguti: ‘Kwidu kwe misinji yamampha ukongwa kuphara misinji yosi ya kunu ku Yisraele.’ Ndipu Namani wati wakamba ivi, wangupunthuka.

Kweni wanchitu waki yumoza wangumukambiya kuti: ‘Abwana, asani Elisha wangukukambiyani kuti muchiti chinthu chinyaki chakusuzga ukongwa mwatingi muchitengi. Sonu nchifukwa wuli mwaleka kuchisamba nge mo iyu wakukambiyani?’ Namani wangumuvwiya wanchitu waki ndipu wanguchisamba mu Msinji wa Yordane kwakukwana 7. Ndipu wati wasamba wanguchira ndipu liŵavu laki linguweriyamu.`

Namani wangukondwa ukongwa. Iyu wanguluta so kwaku Elisha ndi kumukambiya kuti: ‘Sonu ndaziŵa nadi kuti Chiuta wa Yisraele pe ndiyu wawuneneska pacharu chosi chapasi. Sonu chondi londiyani chawanangwa ichi.’ Kweni Elisha wangumuka kuti: ‘Awa, ndilondiyengi cha chawanangwa cho.’ Elisha wanguziŵa kuti nkhunanga kuti wato chawanangwa cho, chifukwa Yehova ndiyu wanguchizga Namani. Kweni Gehazi, wanchitu waku Elisha wachikhumbanga chawanangwa.

Sonu kumbi waviziŵa vo Gehazi wanguchita? Namani wati wasoka, Gehazi wangumutchimbiriya ndipu wati wamusaniya, wangumukambiya kuti: ‘Elisha wandituma kuti ndikukambiyeni kuti watichikhumba chawanangwa kuti wakapaski alendu wo ŵaza pambula kuswera yapa kuzimuwona.’ Kweni ili lenga boza. Kweni Namani wanguziŵa cha kuti Gehazi wapusikanga, sonu iyu wangumupaskaku vinthu vinyaki.

Gehazi wati wafika kunyumba, Elisha wanguziŵa vo iyu wanguchita. Yehova ndiyu wangumukambiya. Sonu Elisha wangukamba kuti: ‘Chifukwa chakuti wachita chinthu chiheni ichi, makhati ngaku Namani ngazengi paku iwi.’ Ndipu nyengu yeniyo iyu wanguchita makhati.

Kumbi tisambiranji pankhani iyi? Chakwamba, tisambira kuti titenere kukambiya ŵanthu zaku Yehova, nge mo wanguchitiya msungwana uyu. Kuchita ivi nkhwakovya ukongwa. Chachiŵi, tingajikuzganga cha nge po wenge Namani pakwamba, kweni titenere kuvwiya ateŵeti aku Chiuta. Ndipu chachitatu, tingakambanga boza cha nge po wanguchitiya Gehazi. Kumbi tingasambira vinandi cha asani tiŵerenga Bayibolo?

2 Ŵakaronga 5:1-27.



Mafumbu

  • Kumbi msungwana yo watimukambiyanji munthukazi pachithuthuzi po?
  • Kumbi munthukazi yo we pachithuthuzi ndiyani, nanga msungwana wachitanji ku nyumba ya munthukazi mwenuyu?
  • Kumbi Elisha wangutuma wanchitu waki kuti wakamukambiyenji Namani, nanga nchifukwa wuli Namani wangukwiya?
  • Kumbi nchinthu wuli cho chinguchitika Namani wati wavwiya wanchitu waki?
  • Nchifukwa wuli Elisha wangukana chawanangwa chakutuliya kwaku Namani, nanga Gehazi wanguchita wuli?
  • Nchifukwa wuli Elisha wangukana chawanangwa chakutuliya kwaku Namani, nanga Gehazi wanguchita wuli?

Mafumbu ngakusazgiyapu

  • Ŵerenga 2 Ŵakaronga 5:1-27.

    Kumbi vo wanguchita msungwana wa Chiyisraele vingaŵawovya wuli achinyamata mazuŵa nganu? (2 Ŵaka. 5:3; Sumu 8:2; 148:12, 13)

    Kumbi nchifukwa wuli titenele kukumbuka vo Namani wanguchita asani tilonde ulongozgi wa M’malemba? (2 Ŵaka. 5:15; Ŵahe. 12:5, 6; Yako. 4:6)

    Kumbi kupambana kwa vo Elisha ndi Gehazi anguchita, kutitisambizanji? (2 Ŵaka. 5:9, 10, 14-16, 20; Mate. 10:8; Machi. 5:1-5; 2 Ŵako. 2:17)