Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 67: Yehosafati Wangugomezga Yehova

Nkhani 67: Yehosafati Wangugomezga Yehova

KUMBI waŵaziŵa ŵanthu yaŵa kweniso vo achita? Yiwu aluta ku nkhondu ndipu wo ŵe panthazi atumba sumu. Kweni panyaki ungafumba kuti: ‘Nanga nchifukwa wuli wo atumba sumu alivi malipanga ndi mikondu yakuchirwiya nkhondu?’ Tiyi tiwoni.

Ayisraele aluta ku nkhondu

Yehosafati wenga fumu ya ufumu wa mafuku ngaŵi nga Yisraele. Panyengu yo iyu wawusanga, Fumu Ahabu ndi Yezebelu awusanga ufumu wakumpotu wa mafuku 10. Kweni Yehosafati wenga fumu yamampha ndipuso awiski a Asa nawu ŵenga fumu yamampha. Mwaviyo kwa vyaka vinandi ŵanthu a mu ufumu wakumwela wa mafuku ngaŵi, ajanga umoyu walikondwa.

Kweni sonu panguchitika chinthu chinyaki cho chinguwofya ŵanthu. Ŵanthu anyaki anguzikambiya Yehosafati kuti: ‘Wumba wa nkhondu wakutuliya ku Moabu, Amoni ndi ku Phiri la Seiri utuza kuzirwana nawi.’ Sonu Ayisraele anandi anguwungana ku Yerusalemu kuchipempha Yehova kuti waŵawovyi. Yiwu anguluta kunyumba yakusopiyamu ndipu Yehosafati wanguromba kuti: ‘Yehova Chiuta widu, tiziŵa cha cho tingachita. Tilivi yo wangatiwovya kurwana ndi wumba wankhondu uwu. Tilereska kwaku imwi kuti mutiwovyi.’

Yehova wanguvwa rombu lawu ndipu wangutuma muteŵeti waki yumoza kuti wakambiyi ŵanthu kuti: ‘Nkhondu njinu cha kweni njaku Chiuta. Imwi mwamurwana nawu cha. Lindizgani waka muwoni po Yehova wakupozomoskiyeningi.’

Kwati kwacha, Yehosafati wangukambiya ŵanthu kuti: ‘Gomezgani Yehova.’ Iyu wanguŵika ŵanthu wo ambanga sumu panthazi pa asilikali ŵaki ndipu achiyenda ambanga sumu zakutumbika Yehova. Kumbi waviziŵa vo vinguchitika yiwu ŵe pafupi kufika ku malu nga nkhondu? Yehova wanguchitiska kuti arwani ŵawu abayani yiwuyiwu pe. Sonu Ayisraele ŵati afika, angusaniya kuti arwani ŵawu wosi ŵafwa.

Yehosafati wanguchita chinthu chazeru kugomezga Yehova. Asi viyo? Asani isi nasi tigomezgengi Yehova, tilongongi kuti te ndi zeru.

1 Ŵakaronga 22:41-53; 2 Mikoka 20:1-30.


Mafumbu

  • Kumbi Yehosafati wenga yani, nanga iyu wawusanga panyengu niyi?
  • Nchifukwa wuli Ayisraele ŵenga ndi mantha, nanga Ayisraele anandi anguchitanji?
  • Kumbi Yehova wangumuka wuli rombu laku Yehosafati?
  • Kumbi Yehova wanguchitiskanji nkhondu yechendachitiki?
  • Kumbi tisambiranji kwaku Yehosafati?

Mafumbu ngakusazgiyapu

  • Ŵerenga 2 Mikoka 20:1-30.

    Kumbi Yehosafati wangulongo wuli mo ateŵeti akugomezgeka aku Chiuta atenele kuchitiya asani akumana ndi mijalidu yakofya? (2 Miko. 20:12; Sumu 25:15; 62:1)

    Kuvuli uku, Yehova wenga ndi nthowa yo wagwiriskiyanga nchitu pakuŵereŵeta ndi ŵanthu ŵaki, kumbi mazuŵa nganu wagwiriskiya nchitu nthowa niyi? (2 Miko. 20:14, 15; Mate. 24:45-47; Yoha. 15:15)

    Panyengu yo Chiuta wazamuyambisa ‘nkhondu ya zuŵa likulu laku Chiuta Wanthazi zosi,’ kumbi vakuchitika pa nyengu yo vazamuyanana wuli ndi va m’nyengu yaku Yehosafati? (2 Miko. 20:15, 17; 32:8; Chivu. 16:14, 16)

    Kumbi apayiniya ndi amishonale atovya wuli nchitu yakupharazga ya pacharu chosi yamazuŵa nganu nge mo achitiyanga Alevi? (2 Miko. 20:19; Ŵaro. 10:13-15; 2 Timo. 4:2)