Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 66: Yezebelu Wenga Fumukazi Yiheni

Nkhani 66: Yezebelu Wenga Fumukazi Yiheni

FUMU Yeroboamu wati wafwa, mafumu ngosi ngo nganguwusa ufumu wakumpotu wa Yisraele wa mafuku 10, ngenga ngaheni. Pa mafumu ngosi yanga, Fumu Ahabu ndiyu yenga yiheni ukongwa. Kumbi utichiziŵa chifukwa chaki? Chifukwa chikulu chenga chakuti muwoli waki Fumukazi Yezebelu, wenga muheni.

Yezebelu wenga munthukazi wa Chiyisraele cha. Iyu wenga mwana wa fumu ya ku Sidoni. Yezebelu wasopanga chiuta waboza Bala, ndipu wanguchitiska so kuti Ahabu ndi Ayisraele anandi asopengi Bala. Iyu watinkhanga Yehova kweniso wabayanga achimi ŵaki anandi. Anyaki abisamanga ku mphanji kuwopa kuti wangaŵabaya. Asani Yezebelu wakhumba chinthu, wabayanga munthu kuti wato chinthu cho wapenjanga.

Zuŵa linyaki Fumu Ahabu yingukwiya ukongwa. Sonu Yezebelu wangufumba kuti: ‘Nchifukwa wuli mwaleka kukondwa msanawale?’

Ahabu wangumuka kuti: ‘Chifukwa cha vo Naboti wandimuka. Ini ndakhumbanga kugula munda waki wa mphereska. Kweni wandikambiya kuti wandiguliskengi cha.’

Sonu Yezebelu wangukamba kuti: ‘Kudandawula cha, ini ndakumulonda munda ndipu ndikupaskeningi.’

Ndipu Yezebelu wangulembe makalata mafumu nga mu msumba wo Naboti wajanga. Iyu wangulemba kuti: ‘Musankhi ŵanthu kuti akambi boza lakuti Naboti watuka Chiuta ndi fumu. Ndipu pavuli paki muto Naboti muluti nayu kubwalu kwa msumba mukamuponyi mya kuti wafwi.’

Yezebelu wati wavwa kuti Naboti wafwa, wangukambiya Ahabu kuti: ‘Lutani sonu mukato munda waki wa mphereska.’ Kumbi iwi uzomerezga kuti Yezebelu wenga wakwenere kulangika chifukwa cha vinthu viheni vo wanguchita?

Fumukazi Yezebelu

Nyengu yati yakwana, Yehova wangutuma Yehu kuti wakalangi Yezebelu. Ndipu Yezebelu wati wavwa kuti Yehu watuza, iyu wangujinozga kuti wawoneki wakutowa ukongwa. Sonu Yehu wati wafika ndi kuwona kuti Yezebelu we pawindu, wangudana ŵanthu wo ŵenga m’nyumba yachifumu ndipu wanguŵakambiya kuti: ‘Muponyeni pasi!’ Ŵanthu wo anguvwiya nadi nge po uwone pachithuthuzi ichi. Yiwu angumuponya pasi ndipu wangufwiya penipo. Fumukazi yiheni Yezebelu, yingumaliya penipo.

1 Ŵakaronga 16:29-33;18:1-4; 21:1-16; 2 Ŵakaronga 9:30-37.



Mafumbu

  • Kumbi Yezebelu wenga yani?
  • Kumbi nchifukwa wuli zuŵa linyaki Fumu Ahabu yingukwiya?
  • Kumbi Yezebelu wanguchitanji kuti walondi munda wa mphereska waku Naboti, ndi kupaska murumu waki Ahabu?
  • Kumbi ndiyani yo Yehova wangutuma kuti wakalangi Yezebelu?
  • Nge mo uwone pachithuthuzi, nchinthu wuli chinguchitika Yehu wati wafika panyumba yachifumu yaku Yezebelu?

Mafumbu ngakusazgiyapu

  • Ŵerenga 1 Ŵakaronga 16:29-33 ndi 18:3, 4.

    Kumbi vinthu vingunangika wuli mu Yisraele panyengu yo Fumu Ahabu yawusanga? (1 Ŵaka. 14:9)

  • Ŵerenga 1 Ŵakaronga 21:1-16.

    Kumbi Naboti wangulongo wuli chiganga ndi kugomezgeka kwaku Yehova? (1 Ŵaka. 21:1-3; Ŵale. 25:23-28)

    Pa vo Ahabu wanguchita, kumbi tisambira kuti nchinthu wuli cho chingatiwovya asani taguŵiskika? (1 Ŵaka. 21:4; Ŵaro. 5:3-5)

  • Ŵerenga 2 Ŵakaronga 9:30-37.

    Kumbi tisambiranji pa phamphu lo Yehu wenga nalu pakuchita khumbu laku Yehova? (2 Ŵaka. 9:4-10; 2 Ŵako. 9:1, 2; 2 Timo. 4:2)