Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 63: Solomoni Wenga Fumu Yazeru

Nkhani 63: Solomoni Wenga Fumu Yazeru

SOLOMONI wanguja fumu weche mnyamata. Iyu wayanjanga Yehova ndipu wavwiyanga malangu ngamampha ngo awiski a Davidi amupaskanga. Yehova wangukondwa nayu Solomoni ndipu zuŵa linyaki usiku wangulongoro nayu kuporote mumalotu, iyu wanguti: ‘Solomoni, ukhumba kuti ndikupaskenji?’

Solomoni wangumuka kuti: ‘Yehova Chiuta wangu, nde mwanamana ukongwa ndipu ndiziŵa cha mo ndingawusiya. Sonu ndipaskeni zeru kuti ndiwusi ŵanthu ŵinu mwakwenere.’

Yehova wangukondwa ndi vo Solomoni wangupempha. Ndipu wangumukambiya kuti: ‘Chifukwa chakuti wapempha zeru m’malu mwakupempha umoyu utali pamwenga chuma, ndikupaskengi zeru zinandi kuluska munthu weyosi pacharu. Kweni ndikupaskengi so vinthu vo waleka kupempha nge, chuma kweniso ulemu.’

Pati pajumpha nyengu yimanavi, anthukazi ŵaŵi anguza kwaku Solomoni ndi nkhani yakusuzga. Sonu munthukazi yumoza wangukamba kuti: ‘Ini ndi munyangu uyu tija m’nyumba yimoza. Ini ndingubala mwana munthurumi ndipu zuŵa lachitatu, munyangu nayu wangubala so mwana munthurumi. Sonu usiku mwana waki wangufwa. Kweni ndati ndagona iyu wanguto mwana waki wakufwa ndi kumugoneka po ndingugoneka mwana wangu, ndipu wanguto mwana wangu. Ndati ndayuka ndingumulereseska mwana wakufwa ndipu ndinguwona kuti wenga wangu cha.’

Iyu wati wamala kukonkhoska, munthukazi munyaki yuwa wangumuka kuti: ‘Awa, mwana wamoyu ngwangu kweni wakufwa yo ngwaki.’ Ndipu munthukazi wakwamba yuwa wangumuka kuti: ‘Awa, mwana wakufwa ngwaku ndipu wamoyu ngwangu.’ Anthukazi yaŵa asuskananga waka viyo. Kumbi Solomoni wanguchita wuli?

Iyu wangutuma munthu kuti wakato lipanga, ndipu wati waza nalu wangukamba kuti: ‘Cheketa mwana wamoyu vigaŵa viŵi ndipu weyosi umupaski chigaŵa chimoza.’

Kweni yo wenga mweneku wa mwana wanguliya ndipu wanguti: ‘Awa! Chondi kubaya cha mwana yo. Mupaskeni munyangu!’ Kweni munyaki yuwa wanguti: ‘Kutipaska cha mwana yo, mucheketeni pakati.’

Fumu Solomoni wamalisa nkhani yikuru

Pakumaliya paki, Solomoni wangukamba kuti: ‘Kumubaya cha mwana yo. Mupaskeni munthukazi wakwamba yo. Iyu ndiyu mweneku wa mwana.’ Solomoni wanguziŵa ivi chifukwa chakuti mweneku wa mwana wangumuyanja ukongwa mwana waki ndipu wanguzomerezga kuti amupaski munthukazi munyaki kuluska kuti amubayi. Sonu ŵanthu ŵati avwa mo Solomoni wangumaliskiya nkhani iyi, angukondwa ukongwa kuti fumu yawu yenga yazeru.

Panyengu yo Solomoni wawusanga, Chiuta wangutumbika ŵanthu. Iyu wanguchitiska kuti m’charu cho mumengi vakurya vinandi nge, tirigu, barile, mphereska, nkhuyu kweniso vakurya vinyaki. Ŵanthu avwalanga vakuvwala vamampha ndipu ajanga m’nyumba zamampha. Munthu weyosi wenga ndi vinthu vinandi vamampha ukongwa.

1 Ŵakaronga 3:3-28; 4:29-34.



Mafumbu

  • Kumbi Yehova wangufumba Solomoni kuti wamupaskenji, nanga iyu wangumuka kuti wuli?
  • Chifukwa chakuti Yehova wangukondwa ndi pemphu laku Solomoni, Kumbi Yehova wangumulayizga kuti wamupaskengenji?
  • Kumbi ndi nkhani yakusuzga niyi yo anthukazi ŵaŵi anguza nayu kwaku Solomoni?
  • Nge mo uwone pachithuthuzi, kumbi Solomoni wanguyeruzga wuli nkhani yo?
  • Kumbi muwusu waku Solomoni wenga wuli, ndipu chenga chifukwa wuli?

Mafumbu ngakusazgiyapu

  • Ŵerenga 1 Ŵakaronga 3:3-28.

    Kumbi anthurumi wo apaskika maudindu mu gulu laku Chiuta mazuŵa nganu, asambiranji pa mazu ngakutuwa pasi pa mtima ngaku Solomoni ngo nge pa 1 Ŵakaronga 3:7? (Sumu 119:105; Ntha. 3:5, 6)

    Kumbi vo Solomoni wangupempha, nchakuwoniyapu chamampha wuli cha vinthu vakwenele vo tingapempha mu marombu ngidu? (1 Ŵaka. 3:9, 11; Ntha. 30:8, 9; 1 Yoha. 5:14)

    Kumbi vo Solomoni wanguchita pakumaliska mphindanu ya anthukazi ŵaŵi, vititipaska chigomezgu wuli cha muwusu wakunthazi waku Solomoni Mura yo ndi Yesu Khristu? (1 Ŵaka. 3:28; Yesa. 9:6, 7; 11:2-4)

  • Ŵerenga 1 Ŵakaronga 4:29-34.

    Kumbi Yehova wangumumuka wuli Solomoni wati wapempha mtima wakuvwiya? (1 Ŵaka. 4:29)

    Pakuwona kukhumbisiska ko ŵanthu ŵenga naku kuti akavwiyi zeru zaku Solomoni, kumbi isi titenele kuŵa ndi mtima wuli asani tisambira Mazu ngaku Chiuta? (1 Ŵaka. 4:29, 34; Yoha. 17:3; 2 Timo. 3:16)