Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 61: Davidi Waja Fumu

Nkhani 61: Davidi Waja Fumu

SAULI wakhumbanga so kubaya Davidi. Iyu ndi asilikali ŵaki 3,000 akuziŵa nkhondu anguluta kuchimupenja. Sonu Davidi wati waziŵa ivi, wangutuma ŵanthu kuti akawoni ko Sauli ndi ŵanthu ŵaki anguzenga msasa. Davidi wangufumba asilikali ŵaki ŵaŵi kuti: ‘Ndiyani yo walutengi nani ku msasa waku Sauli?’

Davidi wadana Fumu Sauli

Abishai wangumuka kuti: ‘Ndilutengi namwi.’ Abishai wenga mwana waku Zeruya, mzichi waku Davidi. Sauli ndi ŵanthu ŵaki ŵati agona, Davidi ndi Abishai angwenda kamanakamana kusere mumsasa. Yiwu anguto mkondu waku Sauli ndi kachiŵiya kaki kakumwiya maji vo venga kumutu kwaku Sauli. Pengavi yo wanguŵawona pamwenga kuŵavwa chifukwa wosi angugona tulu takufwa natu.

Awona Davidi ndi Abishai. Yiwu atuwamu umampha mumsasa waku Sauli ndipu sonu afika pachanya pa phiri. Davidi wangukambiya mula wankhondu wa Yisraele kuti: ‘Abnere, nchifukwa wuli watondeka kuvikiliya fumu, wo mba bwana ŵaku? Nanga wepani mkondu wawu ndi kachiŵiya kawu kakumwiya maji?’

Sonu Sauli wanguyuka. Iyu wanguŵanika mazu ngaku Davidi ndipu wangufumba kuti: ‘Kumbi ndiwi Davidi?’

Davidi wangumuka Sauli kuti: ‘Hinya, mbuyangu fumu.’ Ndipu iyu wangufumba kuti: ‘Nchifukwa wuli mukhumba kundibaya? Kumbi ndakunangiyaninji? Mkondu winu ndi uwu, fumu. Tumani mnyamata winu yumoza kuti waziwuto.’ Kumbi iwi wamuwona Sauli ndi Abnere pasi yapa?

Fumu Sauli ndi Abnere

Sauli wanguzomerezga kuti: ‘Ndananga, ndachita chinthu chambula zeru.’ Ndipu Davidi wanguluta ko wajanga ndipu Sauli wanguwere kwawu. Kweni Davidi wangukamba chamumtima kuti: ‘Zuŵa linyaki Sauli wazakundibaya. Nditenere kuthaŵiya kucharu cha Afilisti.’ Ndipu ivi ndivu wanguchita nadi. Davidi wanguŵapusika Afilisti kuti wajengi ku rwandi lawu.

Pati pajumpha nyengu yimanavi, Afilisti anguchirwana nkhondu ndi Ayisraele. Ndipu Sauli ndi Jonafani angubayika. Ivi vingumuchitiska chitima ukongwa Davidi, ndipu wangulemba sumu yeniyo wangumba kuti: ‘Nde ndi chitima chikulu ukongwa chifukwa chaku iwi mubali wangu Jonafani. Wenga wakwanjiwa wangu.’

Vati vachitika ivi, Davidi wanguwere ku Yisraele mu msumba wa Hebroni. Sonu penga nkhondu pakati pa ŵanthu wo angusankha kuti Ishiboshete, mwana waku Sauli waje fumu ndi ŵanthu wo akhumbanga kuti Davidi waje fumu. Ndipu pakumaliya paki ankhondu aku Davidi angupunda. Davidi wanguja fumu we ndi vyaka 30. Iyu wanguwusa mu Hebroni kwa vyaka 7 ndi myezi 6. Ŵana anyaki wo Davidi wangubala we ku Hebroni ŵenga, Amunone, Abisalomu ndi Adoniya.

Sonu Davidi ndi ankhondu ŵaki anguluta kuchilonda msumba wakutowa wa Yerusalemu. Yoabu yo wenga so mwana waku Zeruya, mzichi waku Davidi, ndiyu wenga mulongozgi pa nkhondu iyi. Ndipu Davidi wangumuŵika kuja mula wankhondu. Sonu Davidi wangwamba kuwusa mu msumba wa Yerusalemu.

1 Samuele 26:1-25; 27:1-7; 31:1-6; 2 Samuele 1:26; 3:1-21; 5:1-10; 1 Mikoka 11:1-9.



Mafumbu

  • Kumbi Davidi ndi Abishai anguchitanji Sauli wati wagona mu msasa waki?
  • Kumbi ndi mafumbu wuli ngo Davidi wangufumba Sauli?
  • Kumbi Davidi wanguluta pani wati wamusiya Sauli?
  • Kumbi nchinthu wuli cho chinguchitiska kuti Davidi waŵi ndi chitima chikulu ukongwa mpaka kulemba sumu yamampha?
  • Kumbi Davidi wenga ndi vyaka vilinga panyengu yo wanguŵikika kuja fumu ku Hebroni, nanga ŵana ŵaki anthurumi anyaki ŵenga ayai?
  • Kumbi pavuli paki, Davidi wanguchiwusa nunkhu nge fumu?

Mafumbu ngakusazgiyapu

  • Ŵerenga 1 Samuele 26:1-25.

    Kumbi mazu ngaku Davidi ngo ngakulembeka pa 1 Samuele 26:11, ngalongo kuti titenele kungawona wuli manozgeru ngaku Chiuta? (Sumu 37:7; Ŵaro. 13:2)

    Kumbi mazu ngaku Davidi ngo nge pa 1 Samuele 26:23, ngatitiwovya wuli kulutirizga kuja ndi maŵanaŵanu ngamampha asani tikhumbisiska kuchita vinthu ndi chanju cha wezi chinanga ŵanthu aleki kulumba? (1 Ŵaka. 8:32; Sumu 18:20)

  • Ŵerenga 2 Samuele 1:26.

    Kumbi Akhristu mazuŵa nganu angakuzga wuli pakati pawu “chanju chakufikapu” nge cho Davidi ndi Jonafani ŵenga nachu? (1 Pet. 4:8; Ŵako. 3:14; 1 Yoha. 4:12)

  • Ŵerenga 2 Samuele 5:1-10.

    Kumbi Davidi wanguwusa nge fumu kwa vyaka vilinga, ndipu nyengu iyi yingugaŵika wuli? (2 Samu. 5:4, 5)

    Kumbi ndiyani yo wanguchitiska kuti Davidi wakwezeki, nanga venivi vititikumbuskanji mazuŵa nganu? (2 Samu. 5:10; 1 Samu. 16:13; 1 Ŵako. 1:31; Ŵafi. 4:13)

Ziŵani Vinandi

SAMBIZANI ŴANA ŴINU

Davidi Wengavi Mantha

Ŵerengani nkhani yakunozga ya m’Bayibolo iyi kuti muziŵi cho chinguchitiska kuti Davidi waje ndi chiganga.