Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 58: Davidi ndi Goliati

Nkhani 58: Davidi ndi Goliati

AFILISTI anguza so kuzirwana nkhondu ndi Ayisraele. Aku ŵaki aku Davidi ŵatatu ŵenga m’gulu lankhondu laku Sauli. Sonu zuŵa linyaki Jese wangukambiya Davidi kuti: ‘Uto tirigu ndi mkati uluti navu kwa aku ŵaku. Ukaŵawoni kuti ŵe wuli.’

Goliati

Davidi wati wafika ku msasa wa gulu lankhondu, wangutchimbiriya ku mzeri wa nkhondu kuchipenja aku ŵaki. Goliati, yo wenga chinkhara cha Afilisti wanguza kuzinyoza Ayisraele. Iyu wachitanga ivi mlenji ndi mazulu kwa mazuŵa 40. Ndipu wadanirizganga kuti: ‘Sankhani munthu yumoza kuti wazipumani ndi ini. Asani wazipunda ndi kundibaya, isi tiŵengi akapolu ŵinu. Kweni asani ini ndazakumupunda ndi kumubaya, imwi muŵengi akapolu ŵidu. Ndikayika kuti mungasaniya munthu wakuti wangazipumana ndi ini.’

Davidi wangufumba asilikali anyaki kuti: ‘Kumbi munthu yo wabayengi m’Filisti uyu ndi kutuzgapu soni pa Yisraele amupaskengenji?’

Asilikali angumuka kuti: ‘Sauli wamupaskengi chuma chinandi kweniso mwana waki munthukazi kuti waje muwoli waki.’

Kweni Ayisraele achitanga mantha ndi Goliati chifukwa wenga wakuzongomala. Iyu wenga mutali pafupifupi mamita ngatatu kweniso wenga ndi msilikali yo wamupingiyanga chakuŵeke nkhondu.

Asilikali anyaki anguchikambiya Fumu Sauli kuti Davidi wakhumba kuchipumana ndi Goliati. Kweni Sauli wangukambiya Davidi kuti: ‘Ungapumana nayu cha m’Filisti uyu. Iwi we mwanamana ndipu iyu waja wachichita nkhondu umoyu waki wosi.’ Davidi wangumuka kuti: ‘Ndingubaya chimbalangondu ndi nkharamu vo vinguko mbereri za ada. Ndipu m’Filisti uyu wayananengi navu. Yehova wandiwovyengi.’ Sonu Sauli wanguti: ‘Luta, Yehova waŵi nawi.’

Davidi wanguluta ku msinji ndipu wanguchito mya yinkhondi yakusililika ndi kuyiŵika m’chikwama chaki. Pavuli paki wanguto fyata ndi kuluta kuchikumana ndi chinkhara. Goliati wati wamuwona wangumudelera ukongwa. Iyu wanguŵanaŵana kuti kwenga kwambula kusuzga kumubaya Davidi.

Davidi waponya mwa

Goliati wangukamba kuti: ‘Zanga, ndiperekengi nyama yaku ku viyuni ndi vinyama kuti vikuryi.’ Kweni Davidi wanguti: ‘Iwi utuza kwaku ini ndi lipanga kweniso mkondu, kweni ini ndizengi kwaku iwi mu zina laku Yehova. Msanawale Yehova wakuperekengi m’janja langu ndipu ndikubayengi.’

Ndipu Davidi wangutchimbiya kulazga kwaku Goliati. Iyu wanguto mwa m’chikwama ndi kuwuyika ku fyata ndipu wanguwuponya ndi nthazi zaki zosi. Sonu mwa unguŵandika pachisku chaku Goliati ndipu wanguwa pasi ndi kufwiya penipo. Afilisti ŵati awona kuti ngwazi yawu yawa, wosi anguwerere ndi kuthaŵa. Ayisraele anguŵadikiska ndipu angupunda nkhondu.

1 Samuele 17:1-54.



Mafumbu

  • Kumbi Goliati waŵanyozanga wuli asilikali a Chiyisraele?
  • Kumbi Goliati wawonekanga wuli, nanga ndi mphotu wuli yo Fumu Sauli yingulayizga kwaku weyosi yo watingi wabayengi Goliati?
  • Kumbi Davidi wangukambanji Sauli wati wamunene kuti wangapumana nayu cha Goliati chifukwa Davidi wenga mwana?
  • Kumbi mazu ngo Davidi wangumuka Goliati, ngangulongo wuli kuti wagomezganga Yehova?
  • Nge mo uwone pachithuthuzi, kumbi Davidi wangugwiriskiya nchitu chinthu wuli kuti wabayi Goliati, ndipu pavuli paki nchinthu wuli cho chinguchitikiya Afilisti?

Mafumbu ngakusazgiyapu

  • Ŵerenga 1 Samuele 17:1-54.

    Kumbi nchinthu wuli cho chingumuwovya Davidi kuŵavi mantha, nanga isi tingalondo wuli chiganga cho wenga nachu? (1 Samu. 17:37, 45; Ŵaefe. 6:10, 11)

    Kumbi asani Akhristu achita masaza pamwenga vakusangaluska, nchifukwa wuli atenele kutcheŵa ndi mzimu wa maphala nge wo wenga nawu Goliati? (1 Samu. 17:8; Ŵaga. 5:26; 1 Timo. 4:8)

    Kumbi mazu ngaku Davidi ngalongo wuli kuti wenga ndi chigomezgu chakuti Chiuta wamuwovyengi? (1 Samu. 17:45-47; 2 Miko. 20:15)

    Mumalu mwakuwona waka mphindanu ya magulu ngaŵi nga nkhondu, kumbi nkhani iyi yilongo wuli kuti nkhondu yenechu yenga pakati pa achiuta aboza ndi Chiuta wawuneneska, Yehova? (1 Samu. 17:43, 46, 47)

    Kumbi ŵakupakika akujaliya, ŵalondo wuli chakuwoniyapu chaku Davidi pakugomezga Yehova? (1 Samu. 17:37; Yere. 1:17-19; Chivu. 12:17)

Ziŵani Vinandi

SAMBIZANI ŴANA ŴINU

Davidi Wengavi Mantha

Ŵerengani nkhani yakunozga ya m’Bayibolo iyi kuti muziŵi cho chinguchitiska kuti Davidi waje ndi chiganga.