Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 57: Chiuta Wasankha Davidi

Nkhani 57: Chiuta Wasankha Davidi
Davidi walondeska mbereri

KUMBI waviwona vo vachitika yapa? Mnyamata uyu wapozomoska mwana wa mbereri ku chimbalangondu. Ichu chinguko mbereri kuti chikaryi. Kweni mnyamata yo wanguchitchimbiriya ndi kuchilonda mbereri ku mulomu. Sonu chimbalangondu cho chakhumbanga kuti chimulondi so, kweni mnyamata yo wanguchiko ndi kuchibaya. Nyengu yinyaki iyu wangulondeska mbereri ku nkharamu. Mnyamata uyu, ngwambula mantha. Kumbi wamuziŵa kuti ndi yani?

Mnyamata uyu ndi Davidi. Iyu wajanga mu msumba wa Betelehemu ndipu wenga mzuku waku Obede, mwana waku Ruti ndi Boazi. Kumbi utiŵakumbuka? Awiski aku Davidi ŵenga a Jese. Davidi waliskanga mbereri za awiski. Iyu wanguwaku pati pajumpha vyaka 10, kutuliya panyengu yo Yehova wangusankha Sauli kuja fumu.

Nyengu yinyaki Yehova wangukambiya Samuele kuti: ‘To mafuta ngapade ndipu uluti ku Betelehemu, ku nyumba yaku Jese. Ndasankha yumoza wa ŵana ŵaki kuti waje fumu.’ Sonu Samuele wati wawona Eliabu mwana wakwamba waku Jese, wangukamba chamumtima kuti: ‘Uyu ndiyu nadi yo Yehova wamusankha.’ Kweni Yehova wangumukambiya kuti: ‘Ungawonanga utali pamwenga kutowa kwaki cha. Ndasankha iyu cha kuja fumu.’

Sonu Jese wangudana mwana waki Abinadabu ndipu wanguza nayu kwaku Samuele. Kweni Samuele wanguti: ‘Awa, Yehova wasankha uyu cha.’ Ndipu Jese wanguza ndi mwana waki Shama. Kweni Samuele wanguti: ‘Awa, Yehova wasankha uyu cha.’ Jese wanguza ndi ŵana ŵaki 7 kwaku Samuele, kweni pengavi yo Yehova wangusankhapu. Sonu Samuele wangufumba kuti: ‘Kumbi ŵana anthurumi wo wenawu mbenaŵa pe?’

Jese wangumuka kuti: ‘Yo wajaku ngwakumaliya kweni waluta kuchiliska mbereri.’ Sonu Davidi wati waza, Samuele wanguwona kuti wenga mnyamata wakutowa. Ndipu Yehova wanguti: ‘Uyu ndiyu ndasankha. Punguliya mafuta pamutu waki.’ Ivi ndivu Samuele wanguchita nadi. Sonu kunthazi Davidi ndiyu wanguzija fumu ya Yisraele.

1 Samuele 17:34, 35; 16:1-13.



Mafumbu

  • Kumbi zina la mnyamata yo we pachithuthuzi ndiyani, ndipu tiziŵa wuli kuti wenga wachiganga?
  • Kumbi Davidi wajanga pani, nanga awiski ndi ambuyaki ŵenga ayani?
  • Nchifukwa wuli Yehova wangukambiya Samuele kuti waluti ku nyumba yaku Jese ku Betelehemu?
  • Kumbi nchinthu wuli chinguchitika Jese wati waza ndi ŵana ŵaki anthurumi 7 kwaku Samuele?
  • Kumbi Yehova wangumukambiyanji Samuele, Davidi wati waza?

Mafumbu ngakusazgiyapu

  • Ŵerenga 1 Samuele 17:34, 35.

    Kumbi vakuchitika ivi vilongo wuli kuti Davidi wenga wachiganga kweniso wathembanga Yehova? (1 Samu. 17:37)

  • Ŵerenga 1 Samuele 16:1-14.

    Kumbi mazu ngaku Yehova pa lemba la 1 Samuele 16:7, ngatitiwovya wuli kuti tije ambula sankhu, chifukwa chakuwona mo munthu wawoneke? (Machi. 10:34, 35; 1 Timo. 2:4)

    Kumbi vo vinguchitikiya Sauli vilongo wuli kuti asani Yehova watuzgapu mzimu waki utuŵa pa munthu, mzimu uheni ukhoza kusele ndipu ungamuchitiska kuti wachiti chinthu chiheni? (1 Samu. 16:14; Mate. 12:43-45; Ŵaga. 5:16)