Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 56: Sauli Wenga Fumu Yakwamba ya Yisraele

Nkhani 56: Sauli Wenga Fumu Yakwamba ya Yisraele
Samuele waŵika Sauli kuja fumu

AWONA Samuele yo wapunguliya mafuta pamutu pa munthu yo. Ivi ndivu achitanga kali kulongo kuti munthu wasankhika kuja fumu. Yehova wangukambiya Samuele kuti wapunguliyi mafuta pamutu waku Sauli. Mafuta yanga ngenga ngapade ndipuso ngakununkhira umampha ukongwa.

Sauli waŵanaŵananga cha kuti iyu wenga wakwenere kuja fumu. Iyu wangukambiya Samuele kuti: ‘Ini nde wa fuku laku Benjamini, lakumaliya mu Yisraele. Sonu nchifukwa wuli ukamba kuti ini ndijengi fumu?’ Yehova wangumuyanja Sauli chifukwa chakuti wajiwonanga nge kuti ndi mula pamwenga wakuzirwa cha. Ichi ndichu chifukwa chaki Yehova wangumusankha kuja fumu.

Sauli wenga mukavu cha ndipuso wenga mwanamana cha. Iyu watuliyanga m’banja lakukhupuka ndipu wenga wakutowa kweniso mutali. Iyu wenga mutali kuphara weyosi mu Yisraele. Sauli watchimbiyanga ukongwa kuluska weyosi, kweniso wenga wanthazi. Ŵanthu angukondwa kuti Yehova wangusankha Sauli kuja fumu. Ndipu wosi angwamba kudanirizga kuti: ‘Fumu yiŵi ndi umoyu utali!’

Arwani ŵa Ayisraele ŵenga ŵeche anthazi ukongwa. Yiwu angulutirizga mbwenu kusuzga Ayisraele. Pati pajumpha nyengu yimanavi kutuliya po Sauli wanguja fumu, ŵanthu a mtundu wa Amoni anguza kuzirwana nkhondu ndi Ayisraele. Sonu Sauli wanguwunganiska gulu likulu la nkhondu ndipu wangupunda a Amoni. Ivi vinguchitiska ŵanthu kukondwa kuti Sauli wenga fumu.

Kwa vyaka vinandi, Sauli wangulongozga Ayisraele kupunda arwani ŵawu pa nkhondu zinandi. Sauli wenga ndi mwana wambula mantha, Jonafani. Ndipu Jonafani wanguwovya Ayisraele kupunda nkhondu zinandi. Afilisti ŵenga ŵeche kuŵatinkha ukongwa Ayisraele. Zuŵa linyaki Afilisti anandi ukongwa anguza kuzirwana nkhondu ndi Ayisraele.

Samuele wangukambiya Sauli kuti walindizgi dankha mpaka po iyu waziyengi kuzipereka sembi kwaku Yehova. Kweni Samuele wanguza mwakuswela. Sonu Sauli wanguchita mantha kuti Afilisti akhoza kwamba nkhondu, mwaviyo iyu wangupereka sembi. Ndipu Samuele wati waza, wangukambiya Sauli kuti wenga wambula kuvwa. Samuele wanguti: ‘Yehova wasankhengi munthu munyaki kuŵa fumu ya Yisraele.’

Nyengu yinyaki Sauli wanguvwiya mbwenu cha. Sonu Samuele wangumukambiya kuti: ‘Nkhwamampha kuvwiya Yehova kuphara kumupaska sembi ya mbereri yamampha. Sonu chifukwa chakuti iwi waleka kuvwiya Yehova, Iyu wazomerezgengi cha kuti ulutirizgi kuja fumu ya Yisraele.’

Nkhani iyi ye ndi sambiru lamampha ukongwa kwaku isi. Yititilongo kuti kuvwiya Yehova nyengu zosi nkhwakukhumbika ukongwa. Kweniso yititilongo kuti munthu wamampha nge po wenge Sauli pakwamba, wakhoza kusintha ndi kuja muheni. Isi tikhumba cha kuja ŵanthu aheni, asi viyo?

1 Samuele chaputala 9 mpaka 11; 13:5-14; 14:47-52; 15:1-35; 2 Samuele 1:23.



Mafumbu

  • Kumbi Samuele wachitanji pachithuthuzi po ndipu nchifukwa wuli wachita venivo?
  • Kumbi nchifukwa wuli Yehova wangwanja Sauli, ndipu iyu wenga munthu wa mtundu wuli?
  • Kumbi mwana munthurumi waku Sauli wenga yani, ndipu iyu wanguzichitanji?
  • Nchifukwa wuli Sauli wangupereka sembi mumalu mwakulindizga Samuele kuti ndiyu wazipereki?
  • Kumbi nkhani yaku Sauli yititisambizanji?

Mafumbu ngakusazgiyapu

  • Ŵerenga 1 Samuele 9:15-21 ndi 10:17-27.

    Kumbi mtima wakuzika weniwo Sauli wangulongo ungumuwovya wuli kuleka kuchita vinthu mwakuthaŵiliya po ŵanthu anyaki akambanga vinthu vambula ulemu vakukwaskana ndi iyu? (1 Samu. 9:21; 10:21, 22, 27; Ntha. 17:27)

  • Ŵerenga 1 Samuele 13:5-14.

    Kumbi ndi ubudi wuli wo Sauli wanguchita ku Gilgala? (1 Samu. 10:8; 13:8, 9, 13)

  • Ŵerenga 1 Samuele 15:1-35.

    Kumbi ndi ubudi ukulu wuli wo Sauli wanguchita wakukwaskana ndi Agagi, fumu ya Amaleke? (1 Samu. 15:2, 3, 8, 9, 22)

    Kumbi Sauli wangwesa wuli kujirunjikiska pa vo wanguchita? (1 Samu. 15:24)

    Kumbi ndi chenjezu wuli lo titenele kulondo asani tichenyeka? (1 Samu. 15:19-21; Sumu 141:5; Ntha. 9:8, 9; 11:2)