Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Buku Langu la Nkhani za m’Bayibolo

Nkhani 75: Anyamata Ŵanayi ku Babiloni

Nkhani 75: Anyamata Ŵanayi ku Babiloni

FUMU Nebukadanezara yinguto Ayisraele wosi akusambira ukongwa kuluta nawu ku Babiloni. Pavuli paki, fumu yingusankhapu anyamata wo ŵenga akutowa kweniso azeru. Anyamata ŵanayi wo utiŵawona pachithuthuzi yapa, mbanyaki mwa wo fumu yingusankha. Yo we panthazi yo ndi Danyele ndipu anyaki ŵatatu wo angupaskika mazina ngakuti: Shadreke, Mesheke kweniso Abedenego ndi ŵanthu a ku Babiloni.

Nebukadanezara wangunozga kuti anyamata yaŵa asambiziki kuti amuteŵetiyengi m’nyumba yachifumu. Iyu wanguti asani asambizika kwa vyaka vitatu, wazamusankhapu anyamata azeru kuti azimuwovyengi mo wangachitiya ndi nkhani zakusuzga. Fumu yo yakhumbanga kuti anyamata wo aje anthazi kweniso ambula kutamatama panyengu yo asambizikanga. Sonu fumu yingukambiya anchitu ŵaki kuti vinyu kweniso vakurya vamampha ukongwa vo yiyu ndi banja laki aryanga ndivu so apaskengi anyamata wo.

Danyele, Shadreke, Mesheke ndi Abedenego akonkhoska chigomezgu chawu

Amuwoni Danyele yo wakamba ndi Ashapenaza, wanchitu mula waku Nebukadanezara. Kumbi waviziŵa vo iyu watimukambiya? Danyele watimukambiya kuti, iyu wakhumba cha kurya vakurya vamampha vo fumu yiturya. Kweni Ashapenaza wangudandawula ndipu wanguti: ‘Fumu ndiyu yasankha vo imwi mutenele kurya ndi kumwa. Sonu asani mulekengi kututuŵa nge anyamata anyinu, fumu yikhoza kundibaya.’

Sonu Danyele wanguluta ku munthu mweniyo Ashapenaza wangumusankha kuti waphweriyengi Danyele ndi anyaki ŵatatu. Ndipu wanguti: ‘Chondi tiyeseni dankha kwa mazuŵa 10. Mutipaskengi waka mphangwi ndi maji ngakumwa. Ndipu pavuli paki muziwoni wo azamuwoneka akututuŵa pakati paku isi ndi anyamata wo aturya vakurya vo fumu yiturya.’

Sonu yo waŵaphweriyanga wanguzomera kuti ndivu wachitengi. Ndipu mazuŵa 10 ngati ngakapu, Danyele ndi anyaki ŵatatu angututuŵa kuluska anyamata anyawu wosi. Ndipu yo waŵaphweriyanga wanguŵazomerezga kuti alutirizgi kurya mphangwi m’malu mwa kurya vo fumu yaŵapaskanga.

Pati pajumpha vyaka vitatu, anyamata wosi anguluta nawu kwaku Nebukadanezara. Ndipu fumu yati yakambiskana nawu, yinguwona kuti Danyele ndi anyaki ŵatatu ndiwu ŵenga ndi zeru ukongwa. Sonu yinguŵasankha kuti ayiwovyengi panyumba yachifumu. Ndipu nyengu zosi asani fumu yifumba mafumbu pamwenga kuŵapaska nkhani yakusuzga, Danyele, Shadreke, Mesheke ndi Abedenego ndiwu amukanga mwazeru ukongwa, mwakuti asembi ndi ŵanthu azeru wo fumu yathembanga abiriyangamu kwakukwana 10.

Danyele 1:1-21.



Mafumbu

  • Kumbi anyamata ŵanayi wo utiŵawona pachithuthuzi po mbayani, nanga nchifukwa wuli ŵenga ku Babiloni?
  • Kumbi Nebukadanezara wanguŵanozgiyanji anyamata ŵanayi, ndipu wangupereka dangu wuli ku anchitu ŵaki?
  • Kumbi Danyele wangupemphanji pankhani ya chakurya ndi vakumwa vaku iyu ndi anyaki ŵatatu?
  • Ŵati arya mphangwi kwa mazuŵa 10, kumbi Danyele ndi anyaki ŵatatu apambananga wuli ndi anyamata anyaki wosi?
  • Kumbi Danyele ndi anyaki ŵatatu angusanilika wuli m’nyumba yachifumu, nanga yiwu apharanga wuli asembi kweniso ŵanthu azeru?

Mafumbu ngakusazgiyapu

  • Ŵerenga Danyele 1:1-21.

    Kumbi titenele kuyesesa wuli asani tikhumba kumalana ndi mayeseru kweniso ndi vakufoka? (Dan. 1:8; Chiya. 39:7, 10; Ŵaga. 6:9)

    Kumbi ndi nthowa nizi zo achinyamata mazuŵa nganu angayeseke pamwenga kuchichizgika kuchita vinthu vo anyaki ativiwona ngati ‘vamampha’? (Dan. 1:8; Ntha. 20:1; 2 Ŵako. 6:17-7:1)

    Kumbi nkhani ya m’Bayibolo ya anyamata ŵanayi Achihebere, yititiwovya kuziŵanji pankhani ya masambiru nga kucharu? (Dan. 1:20; Yesa. 54:13; 1 Ŵako. 3:18-20)